ബിജെപിക്ക് വോട്ടു തേടി സുരേഷ് ഗോപി കാസര്‍കോട്
Update: 2018-05-06 23:11 GMT
സിനിമാ താരം പങ്കെടുത്തെങ്കിലും സാധാരണയില്‍ കവിഞ്ഞ പങ്കാളിത്തം ഉണ്ടായില്ല
ബിജെപി സ്ഥാനാര്‍ഥികളുടെ തെരഞ്ഞെടുപ്പ് പ്രചാരണത്തിന് സിനിമാ താരം സുരേഷ് ഗോപി കാസര്‍കോട് ജില്ലയിലെത്തി. ബിജെപിക്ക് ഏറെ വിജയ പ്രതീക്ഷയുള്ള കാസര്‍കോട്, മഞ്ചേശ്വരം മണ്ഡലങ്ങളിലെ തെരഞ്ഞെടുപ്പ് കണ്‍വെന്‍ഷനുകളിലാണ് സുരേഷ് ഗോപി പങ്കെടുത്തത്.
ശക്തമായ ത്രികോണമത്സരം നടക്കുന്ന മഞ്ചേശ്വരം മണ്ഡലത്തിലെ ബിജെപി സ്ഥാനാര്‍ഥി കെ സുരേന്ദ്രന്റെ തെരഞ്ഞെടുപ്പ് കണ്‍വെന്‍ഷനായിരുന്നു സുരേഷ് ഗോപിയുടെ ആദ്യ പരിപാടി. യുഡിഎഫ് സര്‍ക്കാരിനെ പിടിച്ചുകെട്ടാന്‍ നിയമസഭയില്‍ ബിജെപി എംഎല്‍എമാരില്ലാതെ പോയതാണ് സംസ്ഥാനത്തെ ഏറ്റവും വലിയ നഷ്ടമെന്ന് സുരേഷ് ഗോപി.
യുഡിഎഫും ബിജെപിയും നേരിട്ട് മത്സരിക്കുന്ന കാസര്‍കോട് മണ്ഡലത്തിലായിരുന്നു താരത്തിന്റെ അടുത്ത പരിപാടി. ബിജെപി സ്ഥാനാര്‍ഥി രവീശ തന്ത്രിയുടെ തെരഞ്ഞെടുപ്പ് കണ്‍വെന്‍ഷന്‍ സുരേഷ് ഗോപി ഉദ്ഘാടം ചെയ്തു. കണ്‍വെന്‍ഷനുകളില്‍ സിനിമാ താരം പങ്കെടുത്തെങ്കിലും സാധാരണയില്‍ കവിഞ്ഞ പങ്കാളിത്തം ഉണ്ടായില്ലെന്നത് ശ്രദ്ധേയമാണ്.