പിസി ജോര്‍ജ്ജിനെതിരെ നടിയുടെ മൊഴി
Update: 2018-05-09 17:51 GMT
പി സി ജോര്‍ജിന്റെ പരാമര്‍ശം തനിക്ക് മാനഹാനിയുണ്ടാക്കിയെന്ന് നടി മൊഴി നല്‍കി.
പി സി ജോര്‍ജിനെതിരെ കൊച്ചിയില്‍ അക്രമിക്കപ്പെട്ട നടി മൊഴി നല്‍കി. ജോര്‍ജിന്റെ പ്രസ്താവന തനിക്ക് മാനഹാനിയുണ്ടാക്കിയെന്ന് നടി പൊലീസിന് നല്‍കിയ മൊഴിയില്‍ പറയുന്നു. നെടുമ്പാശ്ശേരി പോലീസ് നടിയുടെ വീട്ടിലെത്തിയാണ് മൊഴി രേഖപ്പെടുത്തിയത്.
മോശം പ്രസ്താവനകളിലൂടെ തന്നെ പിസി ജോര്‍ജ് എംഎല്‍എ അവഹേളിക്കുകയാണെന്ന് കാണിച്ച് അക്രമത്തിനിരയായ നടി മുഖ്യമന്ത്രിക്ക് പരാതി നല്‍കിയിരുന്നു. ഇതേത്തുടര്‍ന്ന് അതിക്രമത്തിന് ഇരയായവരുടെ പേര് വെളിപ്പെടുത്തുന്നതിന് എതിരായ വകുപ്പുകള്‍ ചുമത്തി നെടുംബാശ്ശേരി പോലീസ് പിസി ജോര്‍ജിനെതിരെ കേസെ് രജിസ്റ്റര്‍ ചെയ്തിരുന്നു. ഈ കേസിലാണ് നെടുംബാശ്ശേരി പൊലീസ് നടിയുടെ വീട്ടിലെത്തി മൊഴി രേഖപ്പെടുത്തിയത്.
പിസി ജോര്‍ജിന്റെ പ്രസ്ഥാവനകള്‍ വ്യക്തിഹത്യയാണ്. ധാര്‍മികമായി പിന്തുണയ്‌ക്കേണ്ട പൊതുരംഗത്തുള്ളയാള്‍ തന്നെ മോശമായി ചിത്രീകരിച്ചു. പരാമര്‍ശങ്ങള്‍ സാധാരണക്കാരില്‍ പോലും തന്നെക്കുറിച്ച് സംശയങ്ങള്‍ക്ക് ഇടയാക്കി. ഇത് സമൂഹമാധ്യമങ്ങളിലടക്കം തനിക്കെതിരായ പ്രചാരണത്തിന് ഉപയോഗിക്കുന്നതായും നടി മൊഴിയില്‍ പറയുന്നു. മൊഴി വിശദമായി പരിശോധിച്ചശേഷം തുടര്‍ നടപടി സ്വീകരിക്കുമെന്ന് പൊലീസ് അറിയിച്ചു.