തീരദേശത്ത് റോഡ് ഷോയുമായി തരൂർ

മത്സ്യത്തൊഴിലാളി മേഖലയായ കരുംകുളം പുതിയ തുറയിൽ ശശി തരൂരിന്റെ റോഡ് ഷോ. മത്സ്യത്തൊഴിലാളികളെ തരൂർ അപമാനിച്ചെന്ന ആരോപണത്തിനു മറുപടിയായിട്ടായിരുന്നു പുതിയ തുറയിലെ സ്വീകരണം. തരൂരിന് തെരഞ്ഞെടുപ്പിൽ കെട്ടിവയ്ക്കാനുള്ള തുകയും മത്സ്യത്തൊഴിലാളികൾ നൽകി.

പുതിയ തുറയിൽ വന്നിറങ്ങിയ ശശി തരൂരിനെ ചുമലിലേറ്റി കോൺഗ്രസ് പ്രവർത്തകരുടെ ആഹ്ളാദ പ്രകടനം. അവിടെ നിന്ന് തരൂർ നേരെ മത്സ്യത്തൊഴിലാളികൾക്കിടയിലേക്ക്. വിവാദങ്ങൾക്ക് വിരാമമിട്ട് കൈകൊണ്ട് തന്നെ മീൻ എടുത്തുയർത്തി. രാഷ്ട്രീയമല്ല ഹൃദയബന്ധമാണ് മത്സ്യതൊഴിലാളികളുമായി ഉള്ളതെന്ന് തരൂർ പറഞ്ഞു.

മത്സ്യത്തൊഴിലാളികളെ അപമാനിച്ചെന്ന ആരോപണം തീരദേശ മണ്ഡലങ്ങളിൽ തിരിച്ചടിയാകുമെന്ന തിരിച്ചറിവിലാണ് കോൺഗ്രസിന്റെ പ്രതിരോധം. കഴിഞ്ഞ ലോക്സഭാ തെരഞ്ഞെടുപ്പിൽ തരൂരിന്റെ വിജയം ഉറപ്പിച്ചതും കോവളം ഉൾപ്പെടെയുള്ള തീരദേശ മണ്ഡലങ്ങളായിരുന്നു.