"എന്‍റെ പത്താം നമ്പര്‍ ജഴ്സി നിനക്കുള്ളത്"; നെയ്മര്‍ വിരമിക്കുമെന്ന സൂചന നല്‍കി സഹതാരം

 ബ്രസീൽ സൂപ്പർ താരം നെയ്മർ ഡാ സിൽവ ഖത്തര്‍ ലോകകപ്പോടെ അന്താരാഷ്ട്ര ഫുട്‌ബോളിൽ നിന്ന് വിരമിക്കുമെന്ന വാർത്തകൾ സജീവമാണ്. ലോകകപ്പോടെ താൻ വിരമിക്കുമെന്ന സൂചനകൾ താരം തന്നെ നേരത്തേ നൽകിയിരുന്നു.

ഇപ്പോൾ റയൽ മാഡ്രിഡ് യുവതാരവും ബ്രസീലിൽ നെയ്മറിന്‍റെ സഹതാരവുമായ റോഡ്രിഗോ കൂടി നെയ്മർ വിരമിക്കുമെന്ന വാർത്തകളെ ബലപ്പെടുത്തുന്ന വെളിപ്പെടുത്തൽ നടത്തിയിരിക്കുകയാണ് .

ഒരഭിമുഖത്തിൽ വച്ചാണ് നെയ്മർ വിരമിക്കാൻ തയ്യാറെടുക്കുകയാണെന്ന് റോഡ്രിഗോ വെളിപ്പെടുത്തിയത്. വിരമിക്കുമ്പോൾ പത്താം നമ്പർ ജഴ്‌സി തനിക്ക് തരാമെന്ന് നെയ്മർ വാഗ്ദാനം ചെയ്തതെന്ന് റോഡ്രിഗോ പറഞ്ഞു. നെയ്മർ വിരമിക്കാൻ തയ്യാറെടുക്കുന്ന കാര്യം പറഞ്ഞപ്പോൾ തനിക്ക് കൃത്യമായ മറുപടി നൽകാൻ കഴിഞ്ഞില്ലെന്നും താരം കൂട്ടിച്ചേര്‍ത്തു. 

2010 ൽ തന്‍റെ 18ാം വയസ്സില്‍ ബ്രസീലിനായി അരങ്ങേറ്റം കുറിച്ച നെയ്മർ രാജ്യത്തിനായി 119 മത്സരങ്ങളിൽ നിന്നായി 74 ഗോളുകൾ നേടിയിട്ടുണ്ട്. ബ്രസീലിന്‍റെ എക്കാലത്തേയും മികച്ച ഗോൾവേട്ടക്കാരുടെ പട്ടികയിൽ പെലേക്ക് താഴെ രണ്ടാമതാണ് നെയ്മർ.