സിറിയയിലെ ഇസ്രായേൽ കടന്നുകയറ്റം ചെറുക്കണം; മുന്നറിയിപ്പുമായി​ അറബ്​ രാജ്യങ്ങൾ

ദമസ്കസ്: സിറിയയിൽ ഇസ്രായേൽ നടത്തുന്ന കടന്നുകയറ്റം ചെറുക്കണമെന്ന മുന്നറിയിപ്പുമായി​ അറബ്​ രാജ്യങ്ങൾ. സിറിയയിൽ അമേരിക്കയുടെയും ഇസ്രായേലിന്‍റെയും താൽപര്യങ്ങൾ വിജയിക്കാൻ അനുവദിച്ചാൽ വലിയ വിലകൊടുക്കേണ്ടി വരുമെന്ന്​ അറബ്​ രാജ്യങ്ങൾക്ക്​ മുന്നറിയിപ്പുമായി ഹിസ്​ബുല്ലയും ഹമാസും രം​ഗത്തെത്തി. ഐ.എസ്​ വിഭാഗത്തിനെതിരെ ആവശ്യമെങ്കിൽ ആക്രമണം തുടരുമെന്ന്​ അമേരിക്ക അറിയിച്ചു. സർക്കാർ രൂപവത്​കരിക്കാനുള്ള വിമതപക്ഷത്തിന്‍റെ നീക്കം തുടരുന്നു.

ബശ്ശാറുൽ അസദ്​ ഭരണം കടപുഴകിയതോടെ സിറിയയിൽ രൂപപ്പെട്ട അരക്ഷിതാവസ്ഥ മുതലെടുക്കാൻ ​ആക്രമണം തുടരുകയാണ് ഇസ്രായേൽ​. അമേരിക്കയുടെ മൗനാനുവാദത്തോടെ സിറിയയുടെ സൈനിക സംവിധാനങ്ങൾ തകർക്കാനുള്ള ആസൂത്രിത നീക്കമാണ്​ പിന്നിട്ട മൂന്ന്​ ദിവസങ്ങളിലായി ഇസ്രായേൽ നടത്തിയത്​. തങ്ങൾക്ക്​ ഭീഷണിയാകുന്ന സൈനിക സംവിധാനങ്ങൾ തകർക്കാൻ ഇനിയും ആക്രമണം തുടരുമെന്നും ഇസ്രായേൽ വ്യക്​തമാക്കി. മുന്നൂറിലേറെ ആക്രമണങ്ങളാണ്​ ഇസ്രായേൽ ഇതിനകം ദമസ്കസ്​ ഉൾപ്പെടെ സിറിയൻ ​പ്രദേശങ്ങളിൽ നടത്തിയത്​.

അസദ് കാലത്തെ വ്യോമ, നാവിക, കര സേനാ താവളങ്ങളെല്ലാം തകർക്കപ്പെട്ടു. ആയുധകേന്ദ്രങ്ങൾ പൂർണമായി ചാമ്പലായി. സിറിയയിൽ ആര് അധികാരത്തിൽ വന്നാലും ഒരുതരത്തിലും തങ്ങൾക്ക്​ ഭീഷണിയാകില്ലെന്നും ഇസ്രായേൽ വിലയിരുത്തുന്നു. സിറിയയിൽ ഇസ്രായേൽ തുടരുന്ന കടന്നാക്രമണങ്ങളെ അപലപിച്ച്​ സൗദി അറേബ്യ ഉൾപ്പെടെ അറബ്​ രാജ്യങ്ങൾ രംഗത്തുവന്നു. അന്തർദേശീയ സമൂഹം മൗനം പാലിക്കുന്നത്​ ഗുരുതര പ്രത്യാഘാതം സൃഷ്ടിക്കുമെന്ന്​ അറബ്​ ലീഗ്​ മുന്നറിയിപ്പ്​ നൽകി.

സിറിയയുടെ പരമാധികാരവും ജനങ്ങളുടെ സ്വാതന്ത്ര്യവും ഉയർത്തി പിടിക്കുന്ന നടപടികൾക്ക്​ അറബ്​ ലീഗും ഇസ്​ലാമിക രാജ്യങ്ങളുടെ പൊതുവേദിയായ ഒ.ഐ.സിയും പൂർണ പിന്തുണ പ്രഖ്യാപിച്ചു. അതേസമയം, ഇസ്രായേൽ സിറിയയിൽ നടത്തുന്ന ആക്രമണവും അധിനിവേശവും ചെറുക്കാൻ കഴിഞ്ഞില്ലെങ്കിൽ അറബ്​ രാജ്യങ്ങൾ വലിയ വിലയൊടുക്കേണ്ടി വരുമെന്ന്​ ലബനാനിലെ ഹിസ്​ബുല്ലയും ഫലസ്തീൻ പ്രതിരോധ സംഘടനയായ ഹമാസും വ്യക്​തമാക്കി. യുഎസും ഇസ്രായേലും സിറിയയിൽ നടത്തുന്ന ആസൂത്രിത നീക്കങ്ങൾ തിരിച്ചറിയാതെ പോകരുതെന്ന്​ ഇരു സംഘടനകളും അറബ്​ മുസ്​ലിം രാജ്യങ്ങളെ ഓർമിപ്പിച്ചു. ആവശ്യമെങ്കിൽ ഭീകരവാദികളെ തുരത്താൻ ഇനിയും ആക്രമണത്തിന്​ മടിക്കില്ലെന്ന്​ യുഎസ്​ സെൻട്രൽ കമാന്‍റ്​ അറിയിച്ചു. സിറിയയിൽ പുതിയ സർക്കാർ രൂപവത്​കരണ നീക്കങ്ങൾ മന്ദഗതിയിൽ തുടരുകയാണ്​.