സിറിയൻ ​ജയിലിലെ ക്രൂരതകൾ ലോകത്തോട്​ വിളിച്ചുപറഞ്ഞ ഹമദയുടെ മൃതദേഹം കണ്ടെത്തി; ഏറ്റുവാങ്ങിയത്​ കൊടിയ പീഡനം

ദമസ്​കസ്​: സിറിയൻ ജയിലിലെ ക്രൂരതകൾ ലോകത്തോട്​ വിളിച്ചുപറഞ്ഞ മനുഷ്യാവകാശ പ്രവർത്തകൻ മസെൻ ഹമദയുടെ മൃതദേഹം കണ്ടെത്തി. ദമസ്​കസിന്​ സമീപത്തെ കുപ്രസിദ്ധമായ സെദ്​നയ ജയിലിലായിരുന്നു ഇദ്ദേഹം ഉണ്ടായിരുന്നത്​. സിറിയൻ പ്രസിഡൻറ്​ ബശ്ശാറുൽ അസദി​െൻറ ഭരണത്തിന്​ കീഴിൽ കൊടിയ പീഡനങ്ങൾ ഏറ്റുവാങ്ങിയാണ്​ ഹമദ മരണത്തിന്​ കീഴടങ്ങിയത്​.

ഹർസത ആശുപത്രിയിലെ മോർച്ചറിയിൽ സൂക്ഷിച്ച നിലയിലായിരുന്നു മൃതദേഹം. ശരീരത്തിലാകെ പീഡനത്തി​െൻറ തെളിവുകൾ ദൃശ്യമാണ്​. ജയിലിൽവെച്ച്​ കൊല്ലപ്പെടുന്നവരുടെ മൃതദേഹങ്ങൾ ഹർസത ആശുപത്രിയിലെ മോർച്ചറിയിലാണ്​​ സൂക്ഷിക്കുന്നത്​. ഇവിടെനിന്ന്​ കൂട്ടക്കുഴിമാടത്തിലേക്ക്​ കൊണ്ടുപോകും.

മൃതദേഹം കണ്ടെത്തിയതോടെ നിരവധി പേരാണ്​ സാമൂഹിക മാധ്യമങ്ങളിൽ അനുശോചന കുറിപ്പുകൾ പങ്കുവെച്ചിട്ടുള്ളത്​. ‘ഹമദ, ഞങ്ങളെല്ലാവരും പരാജയപ്പെട്ടു, ഞങ്ങളോട്​ ക്ഷമിക്കൂ, ഈ ലോകം വളരെ മലിനമായതിൽ ഞാൻ ഖേദിക്കുന്നു. നിങ്ങളുടെ കണ്ണുകൾ ഇത്രയും കാലം ഈറനണഞ്ഞതിൽ ഞാൻ ഖേദിക്കുന്നു’ -സിറിയൻ ആക്​റ്റിവിസ്​റ്റായ സെലീൻ കസം ‘എക്​സി’ൽ കുറിച്ചു.

‘അദ്ദേഹം ഏറ്റുവാങ്ങിയ പീഡനങ്ങളുടെ ​ചിത്രം മതി 1000 വിപ്ലവങ്ങളുണ്ടാകാൻ. അദ്ദേഹം എക്കാലവും സിറിയയിലെ ധീരനായ വീരൻമാരിൽ ഉൾപ്പെടും’ -മറ്റൊരാൾ കുറിച്ചു.

സിറിയയിലെ തടങ്കൽ കേന്ദ്രങ്ങളിൽ താൻ അനുഭവിച്ച ഭീകരതയുടെയും ഭരണകൂടത്തി​െൻറ ആസൂത്രിത പീഡനത്തി​െൻറയും അനുഭവങ്ങൾ സിറിയൻ എമർജൻസി ടാസ്​ക്​ ഫോഴ്​സിന്​ നൽകിയ അഭിമുഖത്തിൽ ഹമദ വിശദമായി പറഞ്ഞിരുന്നു. ജയിലിൽ നേരിട്ട മർദനവും ലൈംഗികാതിക്രമവും പട്ടിണിയും നിരന്തരമായുള്ള മാനസിക പീഡനവുമെല്ലാം​ അദ്ദേഹം പറഞ്ഞപ്പോൾ, ആ വാക്കുകൾ ലോകത്ത്​ തന്നെ പ്രതിധ്വനിച്ചിരുന്നു.

കൈയിൽ ചങ്ങലയിട്ട്​ മേൽക്കൂരയിൽ ​തൂക്കിയിടുക, കാവൽക്കാർ ദേഹത്ത്​ ചാടി വാരിയെല്ല്​ തകർക്കുക, സിഗരറ്റ്​ കുറ്റികൾ കൊണ്ട്​ തൊലിയിൽ പൊള്ളലേൽപ്പിക്കുക എന്നിങ്ങനെ നിരവധി പീഡനങ്ങൾക്കാണ്​ ഇദ്ദേഹം ഇരയായത്​. ഇതിന്​ പുറമെ ലൈംഗികാതിക്രമം, ഷോക്കടിപ്പിക്കൽ എന്നിവക്കും വിധേയനായി.

ജയിലിൽനിന്ന്​ അഭയാർഥിയിലേക്ക്​

കിഴക്കൻ സിറിയയിലെ ഡെയർ എസ്സോർ സ്വദേശിയായിരുന്നു ഹമദ. എണ്ണ മേഖലയിൽ ജോലി ചെയ്യുന്നതിനിടെയാണ്​ 2011ൽ സിറിയൻ വിപ്ലവമുണ്ടാകുന്നത്​. ഇതിനെ തുടർന്ന്​ 2011​ലും 2012ലും നിരവധി തവണ അറസ്​റ്റ്​ ചെയ്യപ്പെട്ടു.

2014ൽ ജയിലിൽനിന്ന്​ വിട്ടയച്ചതിനെ തുടർന്ന്​ നെതർലാൻഡിൽ അഭയാർഥിയായി. തുടർന്ന്​ അസദി​െൻറ ഭരണകൂടം നടത്തുന്ന പീഡനങ്ങളെക്കുറിച്ച്​ ജനങ്ങളിൽ അവബോധം സൃഷ്​ടിക്കാനായി ജീവിതം സമർപ്പിച്ചു. യൂറോപ്പിലും അമേരിക്കയിലുമുടനീളം യാത്ര ചെയ്​തു. അസദ്​ സർക്കാരി​നെ വിചാരണ ചെയ്യാനുള്ള അന്താരാഷ്​ട്ര ശ്രമങ്ങളിലും അദ്ദേഹം പങ്കാളിയായി.

2020ൽ അദ്ദേഹം ജന്മനാട്ടിലേക്ക്​ മടങ്ങിയെത്തി​. തന്നെ പിടികൂടിലെന്ന്​ സർക്കാരിൽനിന്ന്​ ഉറപ്പ്​ ലഭിച്ചിട്ടുണ്ടെന്ന്​ പറഞ്ഞായിരുന്നു തിരിച്ചുവന്നത്​. എന്നാൽ, അദ്ദേഹത്തെ അറസ്​റ്റ്​ ചെയ്​ത ശേഷം പിന്നെ കാണാതായി. അസദി​െൻറ ഭരണത്തിന്​ അന്ത്യമാകും വരെ ഹമദയെക്കുറിച്ച്​ യാതൊരു വിവരവും ഉണ്ടായിരുന്നില്ല. കഴിഞ്ഞദിവസം സെദ്​നയിൽ നടത്തിയ തിരച്ചിനൊടുവിലാണ്​ മൃതദേഹം കണ്ടെത്തുന്നത്​.

വിമത സേന രാജ്യത്തെ നിരവധി ഭൂഗർഭ രഹസ്യ ജയിലുകളാണ് കഴിഞ്ഞദിവസങ്ങളിൽ കണ്ടെത്തിയത്. ഇവിടെ അനധികൃതമായി തടങ്കലിലാക്കിയിരുന്ന ആയിരങ്ങളെ മോചിപ്പിക്കുകയും ചെയ്​തു. ജയിലുകൾ അസദിന്റെ കശാപ്പ് ശാലകളായിരുന്നു. നരക ജീവിതമായിരുന്നു ഇവിടെ ആളുകൾ നയിച്ചത്​​. നിരവധി മൃതദേഹങ്ങൾ ഇവിടെനിന്ന്​​ കണ്ടെത്തിയിട്ടുണ്ട്​. സെദ്നായിലെ ജയിലിൽ ദിവസവും 50 മുതൽ 100 പേരെയാണ് കൊല്ലാറുണ്ടായിരുന്നത്​.