വില 2.70 കോടി, നികുതിമാത്രം 46 ലക്ഷം; ഫഹദ് സ്വന്തമാക്കിയത് കേരളത്തിലെ ആദ്യ ഡിഫൻഡർ ഡി 90

മലയാള താരങ്ങൾ സ്വന്തമാക്കുന്ന വാഹനങ്ങൾ പലപ്പോഴും വാർത്തകളിൽ ഇടം നേടാറുണ്ട്. ഇപ്പോഴിതാ ഫഹദ് ഫാസിലും നസ്രിയയും സ്വന്തമാക്കിയ ഡിഫൻഡർ ഡി 90 യുടെ വിശേഷങ്ങളാണ് പുറത്തുവരുന്നത്. കേരളത്തിലെ ആദ്യ ഡിഫൻസർ ഡി 90 ആണ് താര ദമ്പതികൾ സ്വന്തമാക്കിയിരിക്കുന്നത്. 2.18 കോടിയാണ് വാഹനത്തിന്റെ എക്‌സ് ഷോറൂം വില. നികുതിമാത്രം 46 ലക്ഷം വരും. 2.70 കോടിയാണ് വാഹനത്തിന്റെ ഓൺറോഡ് പ്രൈസ്.

അടുത്തിടെ ബിഎംഡബ്ല്യു 740ഐ താരം തന്റെ ഗാരേജിലെത്തിച്ചിരുന്നു. പോർഷെയും മിനി കൺട്രിമാനും ലംബോർഗിനി ഉറുസും റേഞ്ച് റോവറുമാണ് ഫഹദിന്റെ വാഹനശ്രേണിയിലെ മറ്റു വമ്പൻമാർ.

5.0 ലിറ്റർ വി8 പെട്രോൾ എൻജിനാണ് ഡിഫൻഡർ ഡി90 ന് കരുത്ത് പകരുന്നത്. 535 ബിഎച്ച്പി കരുത്തും 650 എൻഎം ടോർക്കുമുണ്ട്. 100 കിലോമീറ്റർ വേഗത്തിലെത്താൻ വാഹനത്തിൻ 5.2 സെക്കന്റ് മാത്രം മതി. ഉയർന്ന വേഗം 240 കിലോമീറ്ററാണ്.

സുരക്ഷയ്ക്ക് ഏറെ പ്രാധാന്യം നൽകുന്ന വാഹനത്തിൽ ആറ് എയർബാഗുകളുണ്ട്. ഇതിനു പുറമേ ആന്റി ലോക്ക് ബ്രേക്കിങ് സിസ്റ്റം, ബ്രേക്ക് അസിസ്റ്റ്, പവർഡോർ ലോക്ക്, ചൈൽഡ് സേഫ്റ്റി ലോക്സ്, ആന്റി തെഫ്റ്റ് അലാം, ടയർപ്രഷർ മോണിറ്റർ ക്രാഷ് സെൻസർ, ഇലക്ട്രോണിക് സ്റ്റബിലിറ്റി കൺട്രോൾ, ഹിൽ അസിസ്റ്റ് എന്നിവയും ഉൾപ്പെടുത്തിയിട്ടുണ്ട്.

വയർലെസ് ഫോൺ ചാർജിങ്, യുഎസ്ബി, ബ്ലൂടൂത്ത് കണക്ടിവിറ്റി, മെറിഡിയൻ സറൗണ്ട് ഇൻഫോടെയിൻമെന്റ് സിസ്റ്റം, 10 ഇഞ്ച് ടച്ച് സ്‌ക്രീൻ, ആൻഡ്രോയിഡ് ഓട്ടോയും ആപ്പിൾ കാർപ്ലേയും ഉൾക്കൊള്ളുന്ന കണക്ടിവിറ്റി എന്നീ സൗകര്യങ്ങളും വാഹനത്തിൽ നൽകിയിട്ടുണ്ട്.