മൈക്കിളിന്റെ വരവറിയിച്ച് അമൽ നീരദ്; 'ഭീഷ്മ പർവ്വം' റിലീസ് തിയതി പുറത്തുവിട്ടു
|ചിത്രത്തിന്റെ ടീസർ നാളെ വൈകുന്നേരം 6 മണിക്ക് പുറത്തിറങ്ങുമെന്നും സംവിധായകൻ അമൽ നീരദ് അറിയിച്ചു
മമ്മൂട്ടിയെ കേന്ദ്ര കഥാപാത്രമാക്കി ബിഗ്ബിക്ക് ശേഷം അമൽ നീരദ് സംവിധാനം ചെയ്യുന്ന ഭീഷ്മപർവ്വത്തിന്റെ റിലീസ് തിയതി പുറത്തുവിട്ടു. ചിത്രം മാർച്ച് 3ന് വേൾഡ് വൈഡ് റിലീസ് ചെയ്യും. ചിത്രത്തിന്റെ ടീസർ നാളെ വൈകുന്നേരം 6 മണിക്ക് പുറത്തിറങ്ങുമെന്നും സംവിധായകൻ അമൽ നീരദ് അറിയിച്ചു.
ചിത്രത്തിൽ മൈക്കിൾ എന്നാണ് മമ്മൂട്ടിയുടെ കഥാപാത്രത്തിന്റെ പേര്. അമൽ നീരദും ദേവദത്ത് ഷാജിയും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ദിലീഷ് പോത്തന്റെ സംവിധാന സഹായിയാണ് ദേവദത്ത്. പി.ടി.രവിശങ്കറാണ് അഡീഷണൽ സ്‌ക്രീൻപ്ലേ. ആർ.ജെ മുരുകൻ(മനു ജോസ്) അഡീഷണൽ ഡയലോഗും.
ചിത്രത്തിലെ ക്യാരക്ടർ പോസ്റ്ററുകൾ സമൂഹ മാധ്യമങ്ങളിൽ സംവിധായകൻ നേരത്തെ പങ്കുവെച്ചിരുന്നു. നദിയാ മൊയ്തു, സൗബിൻ ഷാഹിർ, ശ്രീനാഥ് ഭാസി, ഷൈൻ ടോം ചാക്കോ, ലെന തുടങ്ങി വൻ താരനിരയാണ് ചിത്രത്തിലുള്ളത്. ആനന്ദ് സി ചന്ദ്രനാണ് ക്യാമറ ചലിപ്പിക്കുന്നത്. ബിലാൽ ചിത്രീകരിക്കാനിരുന്നതും ആനന്ദ് സി.ചന്ദ്രൻ ആയിരുന്നു. വിവേക് ഹർഷൻ എഡിറ്റിംഗും സുഷിൻ ശ്യാം സംഗീതവും നിർവഹിച്ചിരിക്കുന്നു.