അമിതാഭ് ബച്ചന്‍റെ വസതി പൊളിക്കാനൊരുങ്ങി മുംബൈ കോര്‍പറേഷന്‍

റോഡ് വീതികൂട്ടുന്നതിനായി ബോളിവുഡ് നടൻ അമിതാഭ് ബച്ചന്‍റെ വസതിയുടെ ഒരുഭാഗം പൊളിച്ചുമാറ്റാൻ നടപടി. മുംബൈയിലെ വസതിയുടെ ഒരു ഭാഗം പൊളിക്കാനാണ്​ ബൃഹാൻ മുബൈ കോർപറേഷൻ (ബിഎംസി) ഒരുങ്ങുന്നത്​. അമിതാഭ് ബച്ചന്​ 2017ൽ കോർപറേഷൻ ​ നോട്ടീസ്​ നൽകിയിരുന്നു. അന്ന്​ രാജ്കുമാർ ഹിരാനി ഉൾപ്പെടെ ഏഴുപേർക്കാണ്​ അനധികൃത നിർമാണം ആരോപിച്ച് കെട്ടിടം പൊളിക്കാൻ കോർപറേഷൻ നോട്ടീസ് നൽകിയത്​. എന്നാൽ, പിന്നീട്​ നടപടിയൊന്നും എടുത്തിരുന്നില്ല.

ബച്ചനെതിരെ നടപടിയെടുക്കുന്നില്ലെന്നാരോപിച്ച് കോൺഗ്രസ് കൗൺസിലർ തുലിപ് ബ്രിയാൻ മിറാൻഡയാണ് ഈ വിഷയം വീണ്ടും ഉന്നയിച്ചത്. ചുറ്റുമുള്ള മറ്റെല്ലാ വീടുകളും പൊളിച്ചിട്ടും ബച്ചനെതിരെ നടപടിയെടുക്കാത്തത്​ എന്തുകൊണ്ടാണെന്ന്​ ഇദ്ദേഹം ചോദിച്ചു.

റോഡ് വീതികൂട്ടുന്നതു സംബന്ധിച്ച് നോട്ടീസ് നൽകിക്കഴിഞ്ഞാൽ പിന്നെ നടപടിയെടുക്കാൻ താമസിക്കേണ്ടതില്ലെന്നും മിറാൻഡ പറഞ്ഞു. തുടർന്നാണ് ബിഎംസി വസതിയുടെ ഒരു ഭാഗം പൊളിക്കാൻ തീരുമാനിച്ചത്. ബച്ചന്‍റെ വസതിയോട് ചേർന്നുള്ള സ്ഥലത്തിന്‍റെ മതിൽ പൊളിച്ച്​ ഓവുചാൽ നിർമിച്ചിരുന്നു. എന്നാൽ വീട് സ്​ഥിതിചെയ്യുന്ന സ്​ഥലത്ത്​ മാത്രം ഒന്നും ചെയ്​തില്ല.