മുകേഷ് ഓഡിയോ ലോഞ്ചിനിടെ
പറഞ്ഞ കാര്യങ്ങളില്‍ ഗാന്ധിജിയൊക്കെ ഉണ്ട്, വെട്ടി നുറുക്കി കൊടുത്തുകളയരുത്; ഓണ്‍ലൈന്‍ മാധ്യമങ്ങളെ ട്രോളി മുകേഷ്
|അനിഖ സുരേന്ദ്രന്‍ നായികയായി അരങ്ങേറ്റം കുറിക്കുന്ന 'ഓ മൈ ഡാര്‍ലിംഗ്' എന്ന സിനിമയുടെ ഓഡിയോ ലോഞ്ചിനിടെയാണ് മുകേഷിന്‍റെ പരാമര്‍ശം
കൊച്ചി: ഓണ്‍ലൈന്‍ മാധ്യമങ്ങളെ ട്രോളി നടനും എം.എല്‍.എയുമായ മുകേഷ്. അനിഖ സുരേന്ദ്രന്‍ നായികയായി അരങ്ങേറ്റം കുറിക്കുന്ന 'ഓ മൈ ഡാര്‍ലിംഗ്' എന്ന സിനിമയുടെ ഓഡിയോ ലോഞ്ചിനിടെയാണ് മുകേഷിന്‍റെ പരാമര്‍ശം. താനിവിടെ സംസാരിച്ചതില്‍ മഹാത്മാ ഗാന്ധിയൊക്കെയുണ്ട് അതു വെട്ടി നുറുക്കി ഗാന്ധിജിയെ പറ്റി അങ്ങനെ പറഞ്ഞു എന്നൊക്കെ കൊടുത്തു കളയരുത് എന്നാണ് മുകേഷ് പറഞ്ഞത്.
ഒരു വിവാഹവീട്ടില്‍ നിന്ന് ഭക്ഷണം കഴിച്ചിറങ്ങിയ മുകേഷിനെക്കുറിച്ചുള്ള വാർത്തയിൽ ' മദ്യപിച്ച് മദോൻമത്തനായി മുകേഷ്' എന്ന തലക്കെട്ടുകൾ നൽകി വാർത്തകൾ പ്രചരിച്ചിരുന്നു. ഇതിന്‍റെ അടിസ്ഥാനത്തിലാണ് നടന്‍റെ പ്രതികരണം. ചിത്രത്തിന്‍റെ നിര്‍മാതാവിനെ പരിചയപ്പെട്ടതിനെ കുറിച്ച് പറഞ്ഞപ്പോള്‍ നൈല്‍ നദിയുടെ ഉത്ഭവം കാണാന്‍ പോയതിനെ കുറിച്ചും പിന്നീട് അതിനടുത്തുള്ള ഗാന്ധി പ്രതിമ കണ്ടതിനെ കുറിച്ചും മുകേഷ് സംസാരിച്ചിരുന്നു. അപ്പോഴാണ് മഹാത്മ ഗാന്ധിജിയുടെ പ്രതിമയെ കുറിച്ച് താരം സംസാരിച്ചത്.
മുകേഷിന്‍റെ വാക്കുകള്‍
നൈല്‍ നദിയുടെ ഉല്‍ഭവം കാണാന്‍ വന്ന ലോകമെമ്പാടുമുള്ള ആളുകള്‍ വന്ന് ഒരു പ്രതിമയ്ക്ക് മുന്നില്‍ പുഷ്പാര്‍ച്ചന നടത്തുന്നുണ്ട്. ഏത് പ്രതമിയുടെ മുന്നിലാണെന്ന് നോക്കുമ്പോഴാണ് അത്ഭുതപ്പെടുന്നത്. നമ്മുടെ രാഷ്ട്രപിതാവ് മഹാത്മ ഗാന്ധിജിയുടെ പ്രതിമയുടെ മുമ്പില്‍ ഈ വിദേശികള്‍ എല്ലാം പുഷ്പം അര്‍പ്പിച്ചിട്ടാണ് പോകുന്നത്. അന്ന് മലയാളി എന്ന നിലയില്‍ അഭിമാനം തോന്നി. പിന്നീട് വര്‍ഷങ്ങള്‍ക്ക് ശേഷം ഈ സിനിമയില്‍ ഇങ്ങനെ ഒരു റോളുണ്ടെന്ന് പറഞ്ഞു. കഥ കേട്ടപ്പോള്‍ നമ്മള്‍ തന്നെ അഭിനയിക്കേണ്ട സിനിമയാണെന്ന് തോന്നി. ഒറ്റ ഷെഡ്യൂളില്‍ തന്നെ തീര്‍ത്തു. വളരെ സന്തോഷത്തോടെ ഈ സിനിമയ്ക്ക് എല്ലാ ആശംസകളും നേരുന്നു അതോടൊപ്പം ഞാന്‍ പറഞ്ഞ കാര്യങ്ങളില്‍ മഹാത്മ ഗാന്ധിജി ഒക്കെയുണ്ട് കെട്ടോ, വെട്ടിനുറുക്കി ഗാന്ധിജിയെ പറ്റി അങ്ങനെ പറഞ്ഞു എന്നൊക്കെ പറഞ്ഞ് കൊടുത്ത് കളയരുത്..''