ബോളിവുഡില്‍ ഇഷ്ടക്കാരുടെ ക്യാംപുകളുണ്ട്: നടി തപ്സി പന്നു
|സിനിമാ മേഖലയില്‍ എല്ലാം നല്ല രീതിയില്‍ നടക്കുന്നുവെന്ന കാഴ്ചപ്പാട് എനിക്കില്ല
കരിയറിന്റെ തുടക്കകാലത്ത് ബോളിവുഡ് ഇന്‍ഡസ്ട്രിയില്‍ നിന്ന് അനുഭവിക്കേണ്ടി വന്ന പ്രതിസന്ധികള്‍ തുറന്നുപറഞ്ഞ് പ്രിയങ്കാ ചോപ്ര ഈയിടെ നടത്തിയ പ്രസ്താവന ചര്‍ച്ചയായിരുന്നു.
ബോളിവുഡ് സിനിമാ ജീവിതത്തെക്കുറിച്ചും ഹോളിവുഡിലേക്കുള്ള ചുവടുമാറ്റത്തിനെക്കുറിച്ചും, ഇന്‍ഡസ്ട്രിയിലെ ഒറ്റപ്പെടലിനെക്കുറിച്ചുമെല്ലാം താരം പറഞ്ഞിരുന്നു. ഒരു അന്താരാഷ്ട്ര മാധ്യമത്തിന് നല്‍കിയ അഭിമുഖത്തിലായിരുന്നു പ്രിയങ്കാ ചോപ്രയുടെ തുറന്നുപറച്ചില്‍.
പ്രിയങ്കക്ക് പിന്നാലെ ബോളിവുഡില്‍ നിലനില്‍ക്കുന്ന രഹസ്യ കൂട്ടുകെട്ടുകളെക്കുറിച്ചും ഇഷ്ടക്കാരുടെ ക്യാമ്പുകളെക്കുറിച്ചുമുള്ള തന്റെ കാഴ്ചപ്പാടുകള്‍ വ്യക്തമാക്കിക്കൊണ്ട് എത്തിയിരിക്കുകയാണ് ബോളിവുഡ് താരം തപ്സി പന്നുവും. ബോളിവുഡ് ഇന്‍ഡസ്ട്രിയില്‍ ഇത് ഏറെക്കാലമായി നിലനില്‍ക്കുന്നതാണെന്നും താരം പറയുന്നു.
'ബോളിവുഡില്‍ നിലനില്‍ക്കുന്ന ക്യാംപുകളെക്കുറിച്ച് ആളുകള്‍ക്ക് അറിയാത്തതൊന്നുമല്ല. കാലാകാലങ്ങളായി നിലനിന്ന് പോരുന്ന ഒന്നാണത്. അതൊരു സിനിമാ താരത്തിന്റെ സൗഹൃദ വലയങ്ങളാകാം, ഏജന്‍സിയോ ഗ്രൂപ്പുകളോ ആകാം. എന്ത് തന്നെയായാലും ഇഷ്ടത്തിനനുരിച്ച് ആരെ വേണെമെങ്കിലും അവര്‍ക്ക് സ്വന്തം സിനിമകളില്‍ ഉള്‍പ്പെടുത്താം. തങ്ങളുടെ കരിയറിനെക്കുറിച്ച് ചിന്തിക്കുന്ന അത്തരക്കാരെ മോശക്കാരാക്കാനാവില്ല.
സിനിമാ മേഖലയില്‍ എല്ലാം നല്ല രീതിയില്‍ നടക്കുന്നുവെന്ന കാഴ്ചപ്പാട് എനിക്കില്ല. ഇവിടെ പക്ഷപാതിത്തമുണ്ടെന്ന് എനിക്കറിയാം. ഇവിടെ നടക്കുന്നതൊന്നും നീതിയുക്തമല്ലെന്നുമറിയാം. ഇതെല്ലാം അറിഞ്ഞിട്ടും നമ്മള്‍ ആ ഇന്‍ഡസ്ട്രിയില്‍ തുടരുന്നുണ്ടെങ്കില്‍, അത് നിങ്ങളുടെ താല്‍പര്യമാണ്. പിന്നീട് അതിനെക്കുറിച്ച് കുറ്റം പറഞ്ഞിട്ട് കാര്യമില്ല.
ഇത്തരം പക്ഷപാതിത്തമൊന്നും ഒരു പരിധിക്കപ്പുറം നിലനില്‍ക്കില്ല. അവസരങ്ങളെല്ലാം ഓരോരുത്തരുടെ കഴിവിനനുസരിച്ചാണ്, അതില്‍ ഭാഗ്യത്തിന് പങ്കൊന്നുമില്ല,' തപ്സി പറഞ്ഞു.
ഷാരൂഖ് ഖാന്‍ നായകനാകുന്ന 'ഡുങ്കി'യാണ് തപ്‌സിയുടെ ഇറങ്ങാനിരിക്കുന്ന പുതിയ ചിത്രം.