യുഎഇ വാറ്റ്; സ്വർണ വിലയിൽ അഞ്ചു % നിരക്കു വർധന ഉണ്ടാകും

എന്നാൽ 99 ശതമാനം പരിശുദ്ധിയുള്ള സ്വർണത്തിന്​ മൂല്യവർധിത നികുതി ബാധകമായിരിക്കില്ല

ജനുവരി ഒന്നു മുതൽ 'വാറ്റ്​' നടപ്പാകുന്നതോടെ യു.എ.യിൽ സ്വർണവിലയിൽ അഞ്ചു ​ശതമാനം നിരക്കുവർധന ഉണ്ടാകും. എന്നാൽ 99 ശതമാനം പരിശുദ്ധിയുള്ള സ്വർണത്തിന്​ മൂല്യവർധിത നികുതി ബാധകമായിരിക്കില്ല.

നിപേക്ഷത്തിനുള്ള മികച്ച ഉൽപന്നം എന്ന നിലക്ക്​ മൂല്യവർധിത നികുതിയിൽ നിന്ന്​ സ്വർണ, വജ്രാഭരണങ്ങൾ മാറ്റിനിർത്തണം എന്നായിരുന്നു ദുബൈ ഗോൾഡ്​ ആന്റ്​ ജ്വല്ലറി ഗ്രൂപ്പ്​ സർക്കാരിനോട്​ ആവശ്യപ്പെട്ടത്​. എന്നാൽ മിക്ക ഉൽപന്നങ്ങൾക്കും നികുതി ഏർപ്പെടുത്താൻ തീരുമാനിച്ചിരിക്കെ സ്വർണാഭരണത്തെ അതിൽ നിന്ന്​ മാറ്റി നിർത്താൻ പറ്റില്ലെന്ന്​ ഫെഡറൽ ടാക്സ്​ അതോറിറ്റി അറിയിച്ചു. 99 ശതമാനം പരിശുദ്ധിയുള്ള സ്വർണത്തിനു മാത്രമാണ്​ വാറ്റിൽ ഇളവ്​ നൽകിയിരിക്കുന്നത്​.

ആയിരം ദിർഹമിന്റെ സ്വർണം വാങ്ങുമ്പോൾ അടുത്ത മാസം ഒന്നു മുതൽ അമ്പതു ദിർഹം അധികമായി നൽകേണ്ടി വരും. എങ്കിലും ദുബൈ സ്വർണ വിപണിയെ ഇതൊന്നും ബാധിക്കില്ലെന്നാണ്​ വ്യാപാരികളുടെ പ്രതീക്ഷ. ഗുണമേൻമയും നിക്ഷേപ ഉൽപന്നമെന്ന പരിഗണനയും ആഭരണ വിപണിക്ക്​ പിൻബലമാകുമെന്നും അവർ വിലയിരുത്തുന്നു.