ഗള്‍ഫ് പ്രതിസന്ധി; പ്രശ്നപരിഹാര ചർച്ചകൾ തള്ളാതെ കുവൈത്തും അമേരിക്കയും

ഗൾഫ്​ രാഷ്ട്രങ്ങൾക്കിടയിൽ ​ഐക്യം ഉറപ്പാക്കുകയെന്ന ലക്ഷ്യത്തോടെ ശ്രമങ്ങൾ തുടരുമെന്നാണ്​ ഇരുകൂട്ടരും വ്യക്തമാക്കുന്നത്​

ഗൾഫ്​ പ്രതിസന്ധിയില്‍ ഇരുപക്ഷവും കടുത്ത നിലപാടിൽ ഉറച്ചു നിൽക്കുമ്പോൾ തന്നെ പ്രശ്നപരിഹാര ചർച്ചകൾ തള്ളാതെ കുവൈത്തും അമേരിക്കയും. ഗൾഫ്​ രാഷ്ട്രങ്ങൾക്കിടയിൽ ​ഐക്യം ഉറപ്പാക്കുകയെന്ന ലക്ഷ്യത്തോടെ ശ്രമങ്ങൾ തുടരുമെന്നാണ്​ ഇരുകൂട്ടരും വ്യക്തമാക്കുന്നത്​.

നൂറിലേറെ ദിനങ്ങൾ പിന്നിട്ട ഗൾഫ്​ പ്രതിസന്ധി പരിഹാര നടപടികൾ തീർത്തും ഉപേക്ഷിച്ചിട്ടില്ലെന്ന്​ വൈറ്റ്​ ഹൗസും കുവൈത്ത്​ അധികൃതരും വ്യക്തമാക്കി. ന്യൂയോർക്കിൽ തുടരുന്ന യു.എൻ പൊതുസഭാ സമ്മേളനത്തിൽ ഖത്തർ അമീറും സൗദി പക്ഷവും തങ്ങളുടെ നിലപാടിനെ ന്യായീകരിച്ചാണ്​ സംസാരിച്ചത്​. പരമാധികാരം ചോദ്യം ചെയ്യാത്ത ഏതു ചർച്ചക്കും ഒരുക്കമാണെന്ന ഖത്തർ അമീർ വ്യക്തമാക്കി. എന്നാൽ ഉപാധികളിൽ വ്യക്തമായ തീർപ്പിലെത്താതെ തുടർ ചർച്ചയില്ലെന്നു തന്നെയാണ്​ സൗദി പക്ഷം ആവർത്തിക്കുന്നത്​.

പ്രശ്നപരിഹാര നീക്കങ്ങൾ തുടരണമെന്ന സന്ദേശം തന്നെയാണ്​ യുഎസ്​ പ്രസിഡന്റ്​ ട്രംപ്​ ഖത്തർ അമീറിനെ അറിയിച്ചത്​. സൗദി അനുകൂല നേതാക്കൾക്കു മുമ്പാകെയും വൈറ്റ്​ ഹൗസ്​ ഇക്കാര്യം തന്നെ വ്യക്തമാക്കുന്നു. കുവൈത്ത്​ അമീറിന്റെ അഭ്യർഥനയെ തുടർന്നാണ്​ മധ്യസ്ഥ നീക്കത്തിന്​ ഡൊണാൾഡ്​ ട്രംപ്​ തയ്യാറായതെന്ന്​ കുവൈത്തിലെ യു.എസ്​ സ്ഥാനപതി ലോറൻസ്​ സിൽവർമാൻ പറഞ്ഞു. കുവൈത്തുമായി ചേർന്ന്​ മധ്യസ്ഥ നീക്കങ്ങൾ തുടരുമെന്നും അദ്ദേഹം അറിയിച്ചു.

മേഖലയിൽ ഇറാൻ സ്വാധീനം കുറച്ചു കൊണ്ടു വരണമെങ്കിൽ ഖത്തറും മറ്റു ഗൾഫ്​ രാജ്യങ്ങളും ഒന്നിക്കണമെന്ന വിലയിരുത്തലിൽ ആണ്​ വൈറ്റ്​ ഹൗസ്​. ഇറാനെതിരെ കടുത്ത നിലപാട്​ ട്രംപ്​ സ്വീകരിച്ച സാഹചര്യത്തിൽ ഗൾഫ്​ പ്രതിസന്ധി തുടരുന്നത്​ ​വൈറ്റ്​ഹൗസിന്​ തിരിച്ചടിയാകും. ഇറാനും തുർക്കിയും ഖത്തറുമായി കൂടുതൽ അടുക്കുന്നത്​ അത്ര താൽപര്യത്തോടെയല്ല ട്രംപ്​ ഭരണകൂടം നോക്കി കാണുന്നത്​. ഇരുപക്ഷത്തിന്റെയും വികാരം മാനിച്ചു കൊണ്ടുള്ള ഒത്തുതീർപ്പ്​ ഫോർമുലക്ക്​ രൂപം നൽകാൻ അമേരിക്ക തയ്യാറാകുന്നതായും റിപ്പോർട്ടുണ്ട്​.