ഇന്ത്യ-ഒമാൻ ഉഭയകക്ഷി വ്യാപാരത്തിൽ വര്‍ദ്ധന

2016-17 സാമ്പത്തിക വർഷം നാല്​ ശതകോടി ഡോളർ ആയിരുന്നത്​ നടപ്പ് സാമ്പത്തിക വർഷം 6.7 ശതകോടി ഡോളറായാണ്​ ഉയർന്നത്

ഇന്ത്യ,ഒമാൻ ഉഭയകക്ഷി വ്യാപാരത്തിൽ ഒരു വർഷത്തിനുള്ളിൽ 69 ശതമാനത്തിന്റെ വർധന. 2016-17 സാമ്പത്തിക വർഷം നാല്​ ശതകോടി ഡോളർ ആയിരുന്നത്​ നടപ്പ് സാമ്പത്തിക വർഷം 6.7 ശതകോടി ഡോളറായാണ്​ ഉയർന്നത്​.

ഇരു രാഷ്ട്രങ്ങളും തമ്മിലുള്ള എക്കാലത്തെയും ഉയർന്ന ഉഭയകക്ഷി വ്യാപാര നിരക്കാണ്​ ഇതെന്ന്​ ഇന്ത്യൻ സർക്കാരിന്റെ കണക്കുകൾ പറയുന്നു. എണ്ണവിലയിലെ വർധനവിനൊപ്പം ഇറക്കുമതിയിലെ വര്‍ദ്ധനവുമാണ്​ വ്യാപാര മൂല്യം കൂടാൻ പ്രധാന കാരണം. ഉഭയകക്ഷി വ്യാപാരത്തിലെ വർധനവിൽ സന്തോഷമുണ്ടെന്ന്​ അംബാസഡർ ഇന്ദ്രമണി പാണ്ഡെ പറഞ്ഞു.

ഒമാനിലേക്കുള്ള കയറ്റുമതി ഉൽപന്നങ്ങളുടെ എണ്ണം വർധിപ്പിക്കുന്നതടക്കം നടപടികൾ ഭാവിയിൽ ഉണ്ടാകും. ഇരു രാഷ്ട്രങ്ങളിലെയും ബിസിനസുകാർ തമ്മിലെ സഹകരണം വർധിപ്പിക്കുന്നതിലും ഉഭയകക്ഷി വ്യാപാരവും നിക്ഷേപവും വർധിപ്പിക്കുന്നതിനുള്ള ശ്രമങ്ങളിലും മസ്കത്ത്​ ഇന്ത്യൻ എംബസി സുപ്രധാന പങ്കാണ്​ വഹിച്ചുവരുന്നത്​. നിക്ഷേപകരുടെ ഇന്ത്യയിൽ നിന്ന്​ ഒമാനിലേക്കും തിരിച്ചുമുള്ള സന്ദർശനത്തിന്​ എംബസി മുൻകയ്യെടുത്ത്​ വരുന്നുണ്ട്.