മയക്കുമരുന്നിനെ പടിക്ക് പുറത്ത് നിര്‍ത്താന്‍ നിയമം കര്‍ശനമാക്കി യുഎഇ

യു.എ.ഇയിൽ മയക്കുമരുന്നിന്റെ ഉപയോഗം ഇല്ലാതാക്കാൻ കടുത്ത നിയമങ്ങൾ വരുന്നു. കർശന നിയമങ്ങളിലൂടെയല്ലാതെ മയക്കുമരുന്നുപയോഗം തടയാൻ കഴിയില്ലെന്ന കണ്ടെത്തലിനെ തുർന്നാണ്​ ആഭ്യന്തര വകുപ്പ്​ നിയമം പരിഷ്​ക്കരിക്കാൻ ഒരുങ്ങുന്നത്​.

നിയമത്തിൽ വരുത്തേണ്ട മാറ്റങ്ങളെക്കുറിച്ചുള്ള ശിപാർശകൾ നൽകിയിട്ടുണ്ടെന്ന്​ ദുബൈ പൊലീസ്​ മയക്കുമരുന്ന്​ വിരുദ്ധവിഭാഗം വെളിപ്പെടുത്തി. പുതിയ തരം മയക്കുമരുന്നുകളെക്കുറിച്ചും അവ കടത്താനുപയോഗിക്കുന്ന മാർഗങ്ങളെക്കുറിച്ചും സുരക്ഷാ ഏജൻസികൾ പരിശോധന നടത്തുകയാണ്​.

മയക്കുമരുന്ന്​ കേസുകളിലെ പ്രതികളോട്​ ദയ കാണിക്കുന്നത്​ ഉപയോഗം കൂട്ടാൻ പാതയൊരുക്കുന്നുണ്ട്​. 20നും 30 നും ഇടയിൽ പ്രായമുള്ളവർക്കിടയിലാണ് ​മയക്കുമരുന്ന്​ ഉപയോഗം കൂടുതൽ. 2016ൽ 3,774 കേസുകളാണ്​ രജിസ്​റ്റർ ചെയ്​തത്​. 5,130 പേരെ അറസ്​റ്റ് ​ചെയ്​തു. 9,640 കിലോ ലഹരിവസ്​തുക്കളും മയക്കുമരുന്നും കണ്ടെടുത്തു. എന്നാൽ 2017ൽ 4,444 കേസുകൾ രജിസ്​റ്റർ ചെയ്യപ്പെട്ടു. 6,440 ​പേർ അറസ്​റ്റിലായി. 61,525 കിലോ മയക്കുമരുന്നുകൾ പിടിച്ചെടുക്കപ്പെട്ടു.

മയക്കുമരുന്ന്​ ഉപയോഗം പ്രോൽസാഹിപ്പിക്കുന്ന വെബ്​സൈറ്റുകളുടെ എണ്ണത്തിലും വർധനയുണ്ടായി. അടുത്തിടെ ഇത്തരത്തിലുള്ള 180 വെബ്​സൈറ്റുകളുടെ പ്രവർത്തനം തടഞ്ഞുവെന്നും അദ്ദേഹം പറഞ്ഞു. ഈ സാഹചര്യത്തിലാണ്​ കടുത്ത ശിക്ഷകൾ ഉൾപ്പെടുത്തി നിയമം ഭേദഗതി ചെയ്യുന്നത്​.