'പറക്കും തളിക'യുമായി വ്ലോഗർ മല്ലു ട്രാവലർ കുടുംബസമേതം ഒമാനിൽ

പ്രത്യേകം സജ്ജീകരിച്ച 'പറക്കുംതളിക' വാഹനവുമായി യൂട്യൂബറായ മല്ലുട്രാവലർ (ശാക്കിർ സുബ്​ഹാൻ) ഒമാനിലുമെത്തി. ​ലോക സഞ്ചാരത്തിന്‍റെ ഭാഗമായാണ്​ അ​​ദ്ദേഹവും ഭാര്യയും രണ്ട്​ കുട്ടികളും മസ്കത്തിലെത്തിയത്​. ഒന്നരവർഷത്തോളം നീളുന്ന യാത്രയിൽ കുടുംബവും കൂടെയുണ്ട്​ എന്നതാണ്​ ഇപ്രാവശ്യത്തെ പ്രത്യേകയെന്ന്​ ശാക്കിർ പറഞ്ഞു.

'പറക്കുംതളിക'യെന്ന പേരിൽ കാർ പ്രത്യേകം സജ്ജീകരിച്ചാണ്​ യാത്ര നടത്തുന്നത്​.​ ഫ്രിഡ്ജ്​, കിടക്കാൻ ബെഡുകൾ, കിച്ചൺ, സോളാർ പവർ സിസ്റ്റം, ഇലക്​ട്രിക്ക്​ സ്റ്റൗ, ഗ്യാസ്​ സ്​റ്റൗ, ഡ്യൂൽ ബാറ്ററി സിസ്റ്റം തുടങ്ങിയ സൗകര്യങ്ങൾ വണ്ടിയിൽ ഒരുക്കിയിട്ടുണ്ട്​. മലയാളികൾ ആദ്യമായി വാൻ ലൈഫ്​ പരിചയപ്പെടുന്നത്​ പറക്കും തളിക എന്ന സിനിമയിലൂടെയാണ്​. അതിലെ താമരാക്ഷൻപിള്ള ബസ് മലയാളികൾക്ക്​​ മറക്കാൻ പറ്റാത്തതാണ്​. സിനിമയുടേതിന്​ സമാനമായ വാൻലൈഫിന്​ ഞങ്ങളുടെ ​ യാത്രക്കും സാമ്യമുണ്ട്​. അതിനാലാണ്​ കസ്റ്റമൈസ്​ ചെയ്ത വാഹനത്തിന് പറക്കും തളിക എന്ന്​ പേര്​ നൽകിയതെന്ന്​ മല്ലു ട്രവലർ പറഞ്ഞു​.

മുംബൈ വഴി ദുബൈയിൽ എത്തിച്ച്​ 24 ലക്ഷത്തോളം രൂപ ചെലവഴിച്ചാണ്​ വഹനം യാത്രക്കായി ഒരുക്കിയിരിക്കുന്നത്. ശാക്കിർ ആദ്യമായിട്ട്​ ഒമാനിൽ എത്തുന്നത്​ 'ആമിന' ബൈക്കുമായാണ്​​. എന്നാൽ ഇത്തവണ കുടുംബം കൂടെയുള്ളതും ഒമാൻ ടൂറിസം അധികൃതർ ഞങ്ങൾക്ക്​ നൽകുന്നപിന്തുണയും കൂടുതൽ സന്തോഷം നൽകുന്നുണ്ടെന്ന്​ അ​ദ്ദേഹം പറഞ്ഞു.യാത്രയുടെ ഒന്നാം ഘട്ടത്തിന്‍റെ ഭാഗമായി നിലവിൽ കുവൈത്ത്​ ഒഴികെയുള്ള ജി.സി.സി രാജ്യങ്ങളായിരിക്കും സന്ദർശിക്കുക. യു.എ.ഇ.യിൽനിന്നാണ്​ ഒമാനിലേക്ക്​ വന്നത്​. ഇവിടെനിന്ന്​ സൗദി, ഖത്തർ, ബഹ്​റൈൻ തുടങ്ങിയ രാജ്യങ്ങളിലേക്ക്​ യാത്ര തിരിക്കും. പിന്നീട്​ യു.എ.ഇയിലെത്തി ഒരു ചെറിയ ഇടവേളക്കള ​ശേഷം യൂറോപ്യൻ യാത്ര തുടങ്ങാനാണ്​ ഇവരുടെ തീരുമാനം.