നാറ്റോ ഇതര സഖ്യപദവി -ഖത്തറിന് നേട്ടമാകുന്നത് എങ്ങനെ ?

നാറ്റോ ഇതര സഖ്യരാജ്യമായി നിര്‍ദേശിക്കുമെന്ന യു.എസ് പ്രസിഡന്റിന്റെ പ്രഖ്യാപനം ഖത്തറിന് വലിയ ‌അവസരങ്ങളാണ് തുറന്നിടുന്നത്.നാറ്റോ ഇതര സഖ്യപദവിയിലേക്ക്​ മാറുന്നതോടെ, അമേരിക്കയുമായി സാമ്പത്തിക, സൈനിക മേഖലകളിൽ പ്രത്യേക പദവിയും ആനുകൂല്യങ്ങൾക്കും ഖത്തറിന്​ അർഹതയുണ്ടാവും. പ്രതിരോധ ഇടപാടുകള്‍, സുരക്ഷാ സഹകരണം, ആയുധ കൈമാറ്റം തുടങ്ങിയ കാര്യങ്ങളില്‍ ഖത്തറിന് ഇതോടെ മുന്‍ഗണന ലഭിക്കും.

വർഷങ്ങളായി വിവിധ മേഖലകളിൽ അമേരിക്കയുമായി അടുത്ത സൗഹൃദം നിലനിർത്തുന്ന രാജ്യമെന്ന നിലയിൽ ഖത്തറിനെ സഖ്യപദവിയിലേക്ക്​ നിർദേശിച്ചുകൊണ്ട്​​ ബൈഡൻ യു.എസ്​ പ്രതിനിധി സഭാ സ്പീക്കർക്ക്​ കത്തെഴുതി. ഏറെ വൈകിയ തീരുമാനം എന്നായിരുന്നു ബൈഡൻ നിർദേശത്തെ വിശേഷിപ്പിച്ചത്​.

​അമേരിക്കയുമായി നയതന്ത്ര-സാമ്പത്തിക മേഖലകളിലെ അടുത്ത ബന്ധത്തിന്‍റെ പ്രതീകമായാണ്​ പ്രധാന നാറ്റോ ഇതര സഖ്യ പദവി നൽകുന്നത്​. സൗഹൃദരാജ്യങ്ങളോടുള്ള അമേരിക്കയുടെ ബഹുമാനവും ആദരവുമാണ്​ ഇതുവഴി പ്രകടിപ്പിക്കുന്നതെന്ന്​ അമേരിക്കൻ പ്രതിരോധ വിഭാഗം പുറത്തിറക്കിയ പ്രസ്താവനയിൽ പറഞ്ഞു.

ഗൾഫ്​ മേഖലയിൽ നിന്നും അമേരിക്കയുടെ നാറ്റോ ഇതര സഖ്യരാജ്യമായി മാറുന്ന മൂന്നാമത്തെ രാജ്യമാണ്​ ഖത്തർ. 2004ൽ ജോർജ്​ ഡബ്ല്യൂ ബുഷ്​ ​സർക്കാർ കുവൈത്തിനെ ഉൾപ്പെടുത്തിയ ശേഷം ആദ്യമായാണ്​ ഗൾഫ്​ മേഖലയിൽ നിന്നുള്ള ഒരു രാജ്യത്തെ ഈ പട്ടികയിൽ ഉൾപ്പെടുത്തുന്നത്​.

ബഹ്​റൈനാണ്​ മേഖലയിൽ നിന്നുള്ള മറ്റൊരു രാജ്യം.നാറ്റോ ഇതര സഖ്യങ്ങളുടെ പട്ടികയിലെ 19ാമത്തെ രാജ്യമാണ്​ ഖത്തർ. ഡൊണാൾഡ്​ ട്രംപ്​ പ്രസിഡന്‍റായിരിക്കെ 2019ൽ ബ്രസീലിനെ ഉൾപ്പെടുത്തിയ ശേഷം ആദ്യമായാണ്​ പട്ടികയിലേക്ക്​ പുതിയ നിർദേശം. അഫ്ഗാന്‍ ഭരണം താലിബാന്‍ പിടിച്ചെടുത്തതിനെ തുടര്‍ന്നുണ്ടായ പ്രതിസന്ധി കൈകാര്യം ചെയ്യുന്നതില്‍ ഖത്തര്‍ നിര്‍വഹിച്ച സ്തുത്യര്‍ഹമായ സേവനങ്ങളാണ് ഖത്തറിനെ ബൈഡന്‍റെ പ്രിയങ്കരമാക്കിയത്​. നേരത്തേ തന്നെ താലിബാനുമായുള്ള യു.എസ് സമാധാന ചര്‍ച്ചകള്‍ക്ക് നേതൃത്വം നല്‍കുന്നതില്‍ ഖത്തര്‍ മധ്യസ്ഥ റോള്‍ നിര്‍വഹിച്ചിരുന്നു.

ഖത്തറിലെ അല്‍ ഉദൈദില്‍ അമേരിക്കയുടെ സേനാ താവളത്തിന് ആതിഥ്യമരുളുന്ന ഖത്തറായിരുന്നു കഴിഞ്ഞ വര്‍ഷം ഇസ്രായേലും ഹമാസുമായുണ്ടായ സംഘര്‍ഷം അവസാനിപ്പിക്കുന്നതില്‍ നിര്‍ണായക പങ്കുവഹിച്ചതും. അഫ്​ഗാനിൽ നിന്നും അമേരിക്കൻ സേന പിൻവാങ്ങിയതോടെ നാറ്റോ രാജ്യങ്ങളിലെ പൗരന്മാരും അഫ്​ഗാനികളും ഉൾപ്പെടെ ഒന്നേകാൽ ലക്ഷത്തോളം പേരെയാണ്​ ഖത്തർ കാബൂളിൽ നിന്നും ഒഴിപ്പിച്ചത്​. രാജ്യാന്തര തലത്തിൽ ഇതും ഖത്തറിന്​ നേട്ടമായി മാറി.

News Summary : How does a non-NATO alliance benefit Qatar?