സൗദി സ്ഥാപക ദിനാഘോഷത്തിന്റെ ഭാഗമായി ലുലുവും; 'വാക്കത്തോൺ 2025' സംഘടിപ്പിച്ചു

സൗദി സ്ഥാപക ദിനാഘോഷത്തിന്റെ ഭാഗമായി ലുലു സൗദി ഹൈപ്പർമാർക്കറ്റ് ലുലു വാക്കത്തോൺ 2025 സംഘടിപ്പിച്ചു. ഫെബ്രുവരി 15 ന് അൽ-ഖോബാറിലെ ന്യു കോർണിഷ് ഖോബാറിലായിരുന്നു പരിപാടി. കായിക മന്ത്രാലയത്തിന്റെയും ആൽ ഖോബർ മുനിസിപ്പാലിറ്റിയുടേയും പിന്തുണയോടെ നടന്ന 3 കിലോ മീറ്റർ വാക്കത്തോണ് ജനപങ്കാളിത്തം കൊണ്ട് ശ്രദ്ധേയമായി. 'ഹാൻഡിക്രാഫ്റ്റ് (ചരിത്രപരമായ കൈത്തൊഴിലുകൾ) സംരക്ഷിക്കുക' എന്ന ആശയം കൈക്കൊണ്ടായിരുന്നു ഈ വർഷത്തെ വാക്കത്തോൺ സംഘടിപ്പിച്ചത്. സൗദി അറേബ്യയുടെ സമ്പന്ന സാംസ്‌കാരിക പൈതൃകത്തെ പ്രതീകപ്പെടുത്തുന്ന സാഫ് എന്ന മാസ്‌കോട്ടും പരിപാടിയിൽ ഏറെ ശ്രദ്ധയാകർശിച്ചു.

കായിക മന്ത്രാലയത്തിലെ താരിഖ് അൽ ഖത്താനി ഔദ്യോഗികമായി വാക്കത്തോൺ ഉദ്ഘാടനം ചെയ്തു. ഔദ്യോഗിക റേസിംഗ് പിസ്റ്റോൾ ഷോട്ട് ഉപയോഗിച്ചാണ് അദ്ദേഹം ഫ്‌ളാഗ് ഓഫ് കർമ്മം നിർവഹിച്ചത്. പരമ്പരാഗത അറബിക് നൃത്തമായ അർദാ, സീ ഷോ, സ്വേ പൂൾ ഡാൻസ് എന്നിവ കൊണ്ട് ആഘോഷപ്രകടനം സമ്പന്നമായി. നെസ്ലെ, മാസ്റ്റർ കാർഡ് തുടങ്ങിയ പ്രമുഖ ബ്രാൻഡുകളോടൊപ്പം പിവിഎം (മെൻോറസ്) ഔദ്യോഗിക റിഫ്രഷ്‌മെൻറ് പാർട്ട്ണറായി അണിചേർന്നു. സൗദി റെഡ് ക്രസന്റ് അതോറിറ്റിയുടേയും ആർപിഎം-ന്റെയും സഹകരണത്തോടെ സുരക്ഷാ ക്രമീകരണങ്ങൾ ഉറപ്പാക്കി. റേഡിയോ മിർച്ചി, ഫാദെൻ മീഡിയ, അൽയൗം എന്നീ മാധ്യമ പങ്കാളികളും ഈ പരിപാടിയ്ക്ക് കരുത്ത് നൽകി. പ്രശസ്ത ഫുട്‌ബോൾ ക്ലബ്ബായ അൽ ഖദ്‌സിയയുടെ പങ്കാളിത്തം പരിപാടിയുടെ മാറ്റ് കൂട്ടി.

പങ്കെടുത്തവർക്കെല്ലാം ലുലു ഹൈപ്പർമാർക്കറ്റിന്റെ സൗജന്യ കിറ്റുകളും, ഗുഡി ബാഗും വിതരണം ചെയ്തു. #LuLu_Khobar_Walkathon എന്ന ഹാഷ്ടാഗ് ഉപയോഗിച്ച് സോഷ്യൽ മീഡിയയിൽ തങ്ങളുടെ അനുഭവങ്ങൾ പങ്കുവെക്കുവാനും അവസരവും നൽകി. അതിൽ നിന്നും തിരഞ്ഞെടുക്കപ്പെട്ട ഏറ്റവും ജനപ്രിയമായ പോസ്റ്റിന് പ്രത്യേക സമ്മാനം നൽകുകയും ചെയ്തു.

കൂടാതെ, പങ്കെടുക്കുന്നവർക്ക് ആസ്വദിക്കുന്നതിനായി വിവിധ ഭക്ഷണ-പാനീയ സ്റ്റാളുകൾ സ്ഥാപിച്ചിരുന്നു. സാംസങ് ഗാലക്‌സി എസ് 25 അൾട്രാ, ഹെൽത്ത് ട്രാക്കിംഗ് ബാൻഡുകൾ, സൈക്കിളുകൾ തുടങ്ങിയ സമ്മാനങ്ങൾ അടങ്ങിയ റാഫിൾ ഡ്രോയും സംഘടിപ്പിച്ചു.

ലുലു സൗദി അറേബ്യയുടെ ഡയറക്ടർ ഷെഹിം മുഹമ്മദ് വാക്ത്തോണിന്റെ പ്രാധാന്യത്തെക്കുറിച്ച് വിശദീകരിച്ചു. 'ലുലു വാക്കത്തോൺ നമ്മുടെ ദൈനംദിന ജീവിതത്തിൽ സുസ്ഥിരതയുടെ പ്രാധാന്യം ഉയർത്തിക്കാട്ടുന്നതിനുള്ള ഒരു വേദി ആയിരുന്നു. ലോകം സുസ്ഥിരമായ ഭാവിയിലേക്ക് നീങ്ങുമ്പോൾ, അവബോധം വളർത്തുന്നതിനും പ്രവർത്തനത്തെ നയിക്കുന്നതിനും ലുലു പ്രതിജ്ഞാബദ്ധമാണ്. ഒരു സമൂഹമെന്ന നിലയിൽ ഒന്നിക്കേണ്ടതിന്റെയും സമൂഹത്തിന്റെയും ലോകത്തിന്റെയും നന്മയ്ക്കായി സുസ്ഥിരതയ്ക്ക് മുൻഗണന നൽകേണ്ടതിന്റെയും ആവശ്യകതയുടെ ഓർമ്മപ്പെടുത്തലായി ഈ പരിപാടി മാറിയെന്നും' അദ്ദേഹം പറഞ്ഞു.

ലുലു മാനേജ്‌മെന്റിലെ എക്‌സിക്യൂട്ടീവ് മാനേജരായ മുഹമ്മദ് അഹമ്മദ് അബ്ദുൽ ജലീൽ ബുബുശൈത്, അഡ്മിനിസ്‌ട്രേഷൻ മാനേജരായ സെയ്ദ് അൽ സുബൈ, കിഴക്കൻ പ്രവിശ്യയിലെ റീജിയണൽ മാനേജരായ മൊയിസ് നൂറുദ്ദീൻ, മദ്ധ്യ പ്രവിശ്യയിലെ റീജിയണൽ ഡയറക്ടറായ ഹാതിം മുസ്തൻസിർ എന്നിവരും പരിപാടിയിൽ പങ്കെടുത്തു.