'സാമ്പത്തിക നിക്ഷേപ മേഖലകളിൽ സഹകരണം'; യു.എ.ഇ, ഇന്ത്യ, ഫ്രാൻസ് ധാരണ

ആഗോളതാപനം ഉൾപ്പെടെയുള്ള വിഷയങ്ങളിൽ യോജിച്ച പ്രതിരോധ നടപടികൾ സ്വീകരിക്കാൻ യു.എ.ഇ, ഇന്ത്യ, ഫ്രാൻസ്​ ധാരണ. ന്യൂയോർക്കിൽ യു.എൻ പൊതുസഭാ സമ്മേളനത്തിന്റെ ഭാഗമായി മൂന്ന്​ രാജ്യങ്ങളിലെയും വിദേശകാര്യ മന്ത്രിമാർ തമ്മിൽ നടന്ന ചർച്ചയിലാണ്​ തീരുമാനം. സാമ്പത്തിക, നിക്ഷേപ മേഖലകളിൽ സഹകരണം കൂടുതൽ ശക്​തമാക്കാനും മൂന്ന്​ രാജ്യങ്ങളും തീരുമാനിച്ചു.

ന്യൂയോർക്കിൽ ഐക്യരാഷ്ട്ര സഭ ജനറൽ അസംബ്ലിയിൽ പ​​ങ്കെടുക്കാനെത്തിയ ഇന്ത്യ, യു.എ.ഇ, ഫ്രാൻസ്​ വിദേശകാര്യമന്ത്രിമാരാണ്​ ചർച്ച നടത്തിയത്​. യു.എ.ഇ വിദേശകാര്യ-അന്താരാഷ്ട്ര സഹകരണ മന്ത്രി ശൈഖ്​ അബ്​ദുല്ല ബിൻ സായിദ്​ആൽ നഹ്​യാൻ, ഇന്ത്യൻ വിദേശകാര്യ മന്ത്രി എസ്​. ജയ്​ശങ്കർ, ​ഫ്രഞ്ച്​ വിദേശകാര്യ മന്ത്രി കാതറിൽ കൊളോന എന്നിവർ നിലപാടുകൾ അവതരിപ്പിച്ചു.​ മൂന്ന്​ രാജ്യങ്ങളും തമ്മിൽ ഒരുമിച്ച്​ നീങ്ങാവുന്ന മേഖലകളിലെ സഹകരണത്തെ കുറിച്ച്​ ചർച്ച ചെയ്തു. യു.എൻ പൊതുസഭയുടെ സമ്മേളനത്തിന്റെ അനുബന്ധമായിമായി നടന്ന ചർച്ച ഏറെ ഫലപ്രദമായിരുന്നുവെന്ന്​ ഡോ. എസ്​ ജയശങ്കർ അറിയിച്ചു.

സാമ്പത്തിക മുന്നേറ്റം, സുസ്​ഥിര വികസനം എന്നിവയിൽ ഊന്നിയായിരുന്നു മൂന്ന്​ രാജ്യങ്ങൾക്കിടയിലെ ചർച്ച. ആഗോള താപനത്തെ നേരിടാൻ യു.എൻ ആവിഷ്​കരിച്ച പദ്ധതികളും നടപടികളും ഫലപ്രദമായി നടപ്പാക്കാൻ മൂന്നു രാജ്യങ്ങളും തീരുമാനിച്ചു. ഊർജം, ഭക്ഷ്യസുരക്ഷ ഉൾപ്പെടെയുള്ള മേഖലകളിൽ നേരിടുന്ന വെല്ലുവിളി ചെറുക്കാനുള്ള നടപടികളും ത്രികക്ഷി ചർച്ചയുടെ ഭാഗമായിരുന്നു. പൊതുവിഷയങ്ങളിൽ സമാന നിലപാടുകൾ പങ്കുവെക്കുന്ന രാജ്യങ്ങൾ എന്ന നിലക്ക്​ മൂന്ന്​ കൂട്ടർക്കും ജനങ്ങളുടെ മെച്ചപ്പെട്ട ജീവിതം ഉറപ്പാക്കാനുള്ള ലക്ഷ്യത്തിൽ ഏറെ നിർവഹിക്കാനുണ്ടെന്ന്​ ഡോ. എസ്​ ജയശങ്കറും ശൈഖ്​ അബ്​ദുല്ലയും അഭിപ്രായപ്പെട്ടു. യു.എ.ഇ വ്യവസായ, സാ​ങ്കേതിക വിദ്യ വകുപ്പ്​ മന്ത്രി ഡോ. സുൽത്താൻ ബിൻ അഹ്​മദ്​ അൽ ജാബിർ, വിദേശകാര്യ സഹമന്ത്രി ലന സാകി നുസൈബ തുടങ്ങിയവർ പ​ങ്കെടുത്തു.