ഖുർആൻ കത്തിക്കുന്നത് വിലക്കി ഡെൻമാർക്ക്; പിന്തുണച്ച് അറബ് പാർലമെൻറ്

വിശുദ്ധ ഖുർആൻ ഉൾപ്പെടെ മതഗ്രന്ഥങ്ങൾ പൊതു ഇടങ്ങളിൽ അവഹേളിക്കുന്നത് വിലക്കി നിയമനിർമാണം നടത്താനുള്ള ഡെൻമാർക്ക്​ തീരുമാനത്തെ പിന്തുണച്ച്​ അറബ്​ പാർലമെൻറ്. അറബ്​, മുസ്​ലിം ലോകത്തിന്റെ ആവശ്യം അംഗീകരിക്കാൻ ഡെൻമാർക്ക്​ ഭരണകൂടം കൈക്കൊണ്ട തീരുമാനം പ്രശംസനീയമെന്ന്​ അറബ്​ ലീഗി​ന്റെ ഭാഗമായ അറബ്​ പാർലമെൻറ്​ നേതൃത്വം വ്യക്തമാക്കി. വിവിധ ഗൾഫ്​ രാജ്യങ്ങളും ഡെൻമാർക്ക്​ നടപടിയെ പിന്തുണച്ച്​ രംഗത്തുവന്നു.

ഖുർആൻ കത്തിക്കുന്നത്​ വിലക്കുന്ന നിയമനിർമാണം സംബന്​ധിച്ച ബിൽ സെപ്​റ്റംബർ ഒന്നിന്​ പാർലമെൻറിൽ അവതരിപ്പിക്കുമെന്ന്​ കഴിഞ്ഞ ദിവസമാണ്​ ഡെൻമാർക്ക്​ ഭരണകൂടം അറിയിച്ചത്​. നിയമം ലംഘിക്കുന്നവർക്ക്​ രണ്ടു വർഷം വരെ തടവ്​ ലഭിക്കും. രാജ്യത്തി​െൻറ പൊതു താൽപര്യം മുൻനിർത്തിയാണ്​ നടപടിയെന്നും ഡെൻമാർക്ക്​ നേതൃത്വം വിശദീകരിച്ചു. ഖുർആൻ, ബൈബിൾ, തോറ ഉൾപ്പെടെ മതഗ്രന്​ഥങ്ങളുടെ പവിത്രത കാത്തു സൂക്ഷിക്കാനുള്ള ഡെൻമാർക്ക്​ നീക്കത്തെ അഭിനന്ദിക്കുന്നതായി അറബ്​ പാർലമെൻറ്​ സ്​പീക്കർ ആദിൽ ബിൻ അബ്​ദുർറഹ്​മാൻ അൽ അസൂമി പറഞ്ഞു. വിശുദ്ധ ഖുർആൻ കത്തിച്ച സംഭവങ്ങൾ അറബ്​, മുസ്​ലിം ലോകത്തിന്റെ വ്യാപകമായ എതിർപ്പിന്​ ഇടയാക്കിയിരുന്നു.

ശക്​തമായ നടപടി സ്വീകരിക്കണമെന്ന്​ ഒ.ഐ.സി, അറബ്​ ലീഗ്​ കൂട്ടായ്​മകളും ഡെൻമാർക്കിനോട്​ ആവശ്യപ്പെട്ടതാണ്​. ഡാനിഷ്​ ഉൽപന്നങ്ങൾ ബഹിഷ്​കരിക്കാനുള്ള അറബ്​ രാജ്യങ്ങളുടെ നീക്കവും തിരുത്തൽ നടപടി സ്വീകരിക്കാൻ പ്രേരണയായി. ഡെൻമാർക്കിന്റെ മാതൃക പിന്തുടർന്ന്​ മതഗ്രന്​ഥങ്ങളുടെ പവിത്രത നിലനിർത്താൻ ശക്​തമായ നിയമ നടപടി സ്വീകരിക്കാൻ തയാറാകണമെന്ന്​ അറബ്​ പാർലമെൻറ്​ യൂറോപ്യൻ യൂനിയനോടും ആവശ്യപ്പെട്ടു. ഇതുമായി ബന്​ധപ്പെട്ട്​ യൂറോപ്യൻ പാർലമെൻറ്​ നടപടി സ്വീകരിക്കാൻ വൈകരുതെന്നും അറബ്​ പാർലമെൻറ്​ നേതൃത്വം വ്യക്​തമാക്കി