അബൂദബിയിൽ പി.സി.ആർ ടെസ്റ്റിന്റെ നിരക്ക് പുതുക്കി നിശ്ചയിച്ചു

അബൂദബിയിൽ പി.സി.ആർ ടെസ്റ്റിന്റെ നിരക്ക് പുതുക്കി നിശ്ചയിച്ചു. എല്ലാ കേന്ദ്രങ്ങളിലും 65 ദിർഹമായിരിക്കും നിരക്കെന്ന്​ ആരോഗ്യ വകുപ്പ് അറിയിച്ചു. അമിത നിരക്ക്​ ഈടാക്കിയാൽ സ്ഥാപനത്തിന്റെ ലൈസൻസ് റദ്ദാക്കുന്നതടക്കമുള്ള കർശന നടപടികള്‍ സ്വീകരിക്കുമെന്ന് അധികൃതർ മുന്നറിയിപ്പ്​ നൽകി.

അബൂദബി എമിറേറ്റിലെ എല്ലാ ആരോഗ്യ പരിപാലന കേന്ദ്രങ്ങളിലും കോവിഡ് പി.സി.ആർ പരിശോധനക്ക് 65 ദിർഹമായിരിക്കും നിരക്കെന്ന്​ ആരോഗ്യ വകുപ്പ് അറിയിച്ചു. സ്രവ ശേഖരണം, പരിശോധന, ഫലങ്ങൾ റിപ്പോർട്ട് ചെയ്യൽ എന്നിവ ഉൾപ്പെടുന്ന പി.സി.ആർ പരിശോധനാ പ്രക്രിയയുടെ നിരക്ക് 65 ദിർഹം മാത്രമായിരിക്കും. അടിയന്തിര സ്വഭാവത്തിൽ റിപ്പോർട്ട്​ ലഭ്യമാക്കുന്നതിനും നിരക്ക്​ ഇതു തന്നെയായിരിക്കും.

കൂടുതൽ നിരക്ക്​ ഈടാക്കിയാൽ പി.സി.ആർ പരിശോധന നടത്താനുള്ള സ്ഥാപനത്തിന്റെ ലൈസൻസ്​ റദ്ദാക്കും. ഇതിനു പുറമെ നിയമപ്രകാരം ഫൈന്‍ ഈടാക്കുമെന്നും ആരോഗ്യ വകുപ്പ് പ്രസ്​താവനയിൽ അറിയിച്ചു. കോവിഡ്​ ആരംഭിച്ച ആദ്യകാലത്ത്​ അബൂദബിയിൽ പി.സി.ആർ നിരക്ക്​ 370 ദിർഹമായിരുന്നു. പിന്നീട്​ ഘട്ടംഘട്ടമായാണ്​ നിരക്കിളവ്​ പ്രഖ്യാപിച്ചത്​. യു.എ.ഇയിൽ ഏറ്റവും കുറഞ്ഞ നിരക്കും അബൂദബിയിലാണ്​.

കോവിഡ് രോഗ സന്ദർഭത്തിലും നിർബന്ധിത ക്വാറന്റീന്‍ ഘട്ടത്തിലും പരിശോധനാ ചെലവ് സർക്കാർ വഹിക്കും. രോഗലക്ഷണങ്ങളില്ലെങ്കിൽ പി.സി.ആർ ടെസ്​റ്റ്​ ചെലവ്​ വ്യക്തികൾ തന്നെ വഹിക്കേണ്ടിവരും.