കൂടുതൽ ഇലക്ട്രിക്​ വാഹനങ്ങൾ നിരത്തിലിറക്കാനുറച്ച്​ ദുബൈ റോഡ്​ ഗതാഗത അതോറിറ്റി

കൂടുതൽ ഇലക്ട്രിക്​ വാഹനങ്ങൾ നിരത്തിലിറക്കാനുറച്ച്​ ദുബൈ റോഡ്​ ഗതാഗത അതോറിറ്റി. പുതുതായി 360 ഇലക്ട്രിക്, ഹൈബ്രിഡ്​​ വാഹനങ്ങൾ ലഭ്യമാക്കാൻ ആർ.ടി.എ അൽഫുത്തൈം ഓട്ടോമാറ്റീവുമായി കരാറിൽ ഒപ്പുവെച്ചു. 2050 ഓടെ കാർബൺ രഹിത പൊതുഗതാഗതം എന്ന ലക്ഷ്യം ഉറപ്പാക്കാനുള്ള നീക്കത്തിന്റെ ഭാഗമായാണ്​ നടപടി.

കരാർ പ്രകാരം പത്ത്​ ഇലക്​ട്രിക്​ ബസുകൾ, 250 ഇലക്​ട്രിക്​ വാഹനങ്ങൾ, നൂറ്​ ഹൈബ്രിഡ്​ വാഹനങ്ങൾ എന്നിവയാണ്​ അൽഫുത്തൈം, ആർ.ടി.എക്ക്​ നിർമിച്ചു നൽകുക. ഇലക്​ട്രിക്​ ചാർജിങ്​ശൃംഖലയും ഇതുമായി ബന്​ധപ്പെട്ട സാ​ങ്കേതിക സൗകര്യങ്ങളും അൽഫുത്തൈം തന്നെ ലഭ്യമാക്കും. 2050 ഓടെ എല്ലാ പൊതുഗതാഗത വാഹനങ്ങളും ഇലക്​ട്രിക്​, ഹൈബ്രിഡ്​ സ്വഭാവത്തിലേക്ക്​ മാറ്റാനുള്ള തയാറെടുപ്പിലാണ്​ ആർ.ടി.എ. ദുബൈ സാമ്പത്തിക അജണ്ട ഡി 33 ​െൻറ ലക്ഷ്യങ്ങളിൽ ഇതും ഉൾപ്പെടുന്നുണ്ട്​. 2040 ഓടെ തന്നെ എല്ലാ ടാക്​സികളും ഇലക്​ട്രിക്​ ആയി മാറും.

ബാഴ്​സലോണയിൽ നടന്ന ചടങ്ങിലാണ്​ ആർ.ടി.എയും അൽഫുത്തൈമും തമ്മിൽ കരാറിൽ ഒപ്പുവെച്ചത്​. ആർ.ടി.എ മേധാവി മതാർ അൽ തായറും അൽ ഫുത്തൈം ഓ​ട്ടോമാറ്റീവ്​ പ്രസിഡൻറ്​ പോൾ വില്ലിസും കരാറിൽ ഒപ്പിട്ടു. നിരവധി ഉന്നത ഉദ്യോഗസ്​ഥരും സന്നിഹിതരായിരുന്നു. പൊതു ഗതാഗത രംഗം മെച്ചപ്പെടുത്തുന്നതിന്​ സ്വകാര്യ മേഖലയുടെ പങ്കാളിത്തവും ഫ​ലപ്രദമായി പ്രയോജനപ്പെടുത്തുമെന്ന്​ മതാർ അൽ തായർ പറഞ്ഞു.