ഇന്ത്യ-യുഎഇ സമഗ്രകരാർ: ഗുണഭോക്താക്കളാകാൻ കേരളവും

ഷാര്‍ജ: ഇന്ത്യ-യു.എ.ഇ സമഗ്ര സാമ്പത്തിക കരാറിന്റെ ഗുണഫലം കേരളത്തിനും ലഭിക്കും. കൈത്തറി ഉൾപ്പെടെയുള്ള ഉൽപന്നങ്ങൾ തീരുവയില്ലാതെ യു.എ.ഇയിൽ എത്തിക്കാൻ കഴിയുന്നത്​ സംസ്ഥാനത്തിന്​ കൂടുതൽ വിദേശനാണ്യം ഉറപ്പാക്കും. എന്നാൽ സംസ്​ഥാന സർക്കാറിന്റെ ഭാഗത്തുനിന്ന്​ കൂടുതൽ ശക്തമായ നടപടികൾ ഇക്കാര്യത്തിൽ ആവശ്യമാണെന്ന്​ വാണിജ്യ, വ്യവസായ കേന്ദ്രങ്ങൾ വ്യക്തമാക്കുന്നു.

ഈമാസം ഒന്ന് മുതലാണ് ഇന്ത്യ- യു.എ.ഇ സമഗ്ര സാമ്പത്തിക സഹകരണ കരാർ പ്രാബല്യത്തിൽ വന്നത്. ഇരു രാജ്യങ്ങൾക്കുമിടയിലെ നിക്ഷേപവും കയറ്റിറക്കുമതിയും വിപുലപ്പെടുത്താൻ കരാർ പാതയൊരുക്കും. തീരുവയില്ലാതെ അസംഖ്യം ഉൽപന്നങ്ങൾ ഉദാരമായി കയറ്റുമതി ചെയ്യാനുള്ള അവസരമാണ്​ ഇതിലൂടെ തുറന്നിരിക്കുന്നത്​. ​കൈത്തറി ഉൾപ്പെടെ കേരളത്തിന്റെ തനത്​ ഉൽപന്നങ്ങ​ളെ വിദേശ നാടുകളുമായി ബന്ധിപ്പിക്കാന്‍ യു.എ.ഇ ഇടത്താവളമായി മാറുമെന്ന മെച്ചം കൂടിയുണ്ട്​.

പരമ്പരാഗത ഉൽപന്നങ്ങളുടെ കയറ്റുമതിയും ഇതിലൂടെ സജീവമാകും. കേരളത്തിന്റെ ഉൽപന്നങ്ങൾ കൂടുതലായി യു.എ.ഇ മുഖേന ലോക വിപണിയിലേക്ക്​ എത്തിക്കാൻ എല്ലാ നടപടിയും സ്വീകരിക്കുമെന്ന്​ ലുലു ഗ്രൂപ്പ്​ മേധാവി എം.എ യൂസുഫലി അറിയിച്ചു.

ഇന്ത്യ, യു.എ.ഇ സാമ്പത്തിക കരാറിന്റെ തുടർ നടപടികൾ ചർച്ച ചെയ്യാൻ സംസ്​ഥാന സർക്കാർ മുന്നിട്ടിറങ്ങും എന്നാണ്​ ഗൾഫ്​ വ്യവസായ ലോകത്തി​ന്റെ പ്രതീക്ഷ. കേന്ദ്ര സർക്കാറുമായി സഹകരിച്ച്​ കേരളത്തിൽ നിന്നുള്ള പ്രതിനിധി സംഘം യു.എ. ഇ സന്ദർശിക്കുന്നതും ഗുണം ചെയ്യും. ഇരു രാജ്യങ്ങളുടെയും ചേംബറുകൾ തമ്മിൽ ഇതു സംബന്ധിച്ച ചർച്ചക്കും തുടക്കം കുറിച്ചിട്ടുണ്ട്​.