ക്രൈസ്​തവ ദേവാലയത്തിന് യൂസുഫലിയുടെ​ ഒരു കോടി സഹായം

ചർച്ച്​ ഓഫ്​ സൗത്ത്​ ഇന്ത്യ അബൂദബി അബു മുറൈഖയിൽ നിർമിക്കുന്ന ദേവാലയത്തിന് ലുലു ഗ്രൂപ്പ്​ മേധാവി എം.എ യൂസുഫലി​ ഒരു കോടി രൂപ സഹായം നൽകി. 15,000 ചതുരശ്ര അടി വിസ്തൃതിയിൽ നിർമ്മിക്കുന്ന പള്ളിയിൽ 750 പേർക്ക്​ പ്രാർഥനാ സൗകര്യമുണ്ട്​. ഈ വർഷം അവസാനത്തോടെ പള്ളിയുടെ നിർമാണപ്രവൃത്തി പൂർത്തിയാകും.

അബൂദബി കിരീടാവകാശിയും യു.എ.ഇ സായുധസേനാ ഡെപ്യൂട്ടി സുപ്രീം കമാണ്ടറുമായ ശൈഖ് മുഹമ്മദ് ബിൻ സായിദ് ആൽ നഹ്​യാൻ അനുവദിച്ച 4.37 ഏക്കർ ഭൂമിയിൽ നിർമിക്കുന്ന പള്ളിക്കാണ്​ സഹായം നൽകിയത്​. അബൂദബി സി.എസ്.ഐ പാരിഷ് വികാരി റവ. ലാൽജി എം. ഫിലിപ്പിന്​ യൂസഫലി തുക കൈമാറി. സി.എസ്.ഐ മധ്യകേരള മഹാഇടവക ബിഷപ്പ് റവ. ഡോ. മലയിൽ സാബു കോശി ചെറിയാൻ ഓൺലൈനായി ചടങ്ങിൽ പങ്കെടുത്തു.

അബൂദബി കിരീടാവകാശി അനുവദിച്ച സ്​ഥലത്ത്​ നിർമിക്കുന്ന ബാപ്​സ്​ ഹിന്ദു ക്ഷേത്രത്തിന്​ സമീപമാണ്​ പള്ളിയും പണിയുന്നത്​.യു.എ.ഇ സഹിഷ്ണുതാ വകുപ്പ് മന്ത്രി ശൈഖ് നഹ്​യാൻ ബിൻ മുബാറക് ആൽ നഹ്യാനാണ് ദേവാലയത്തിന്‍റെ ശിലാസ്ഥാപനം നിർവഹിച്ചത്​. എല്ലാ മതവിഭാഗങ്ങളുടെയും ആരാധനാലയങ്ങളുള്ള യു.എ.ഇയിൽ വ്യത്യസ്ത മതക്കാർക്ക് സഹകരണത്തോടെ കഴിയാനുള്ള സാഹചര്യമാണ് ഭരണാധികാരികൾ ഉറപ്പുനൽകുന്നതെന്ന് യൂസഫലി പറഞ്ഞു. യു.എ.എ രാഷ്​ട്രപിതാവ് ശൈഖ് സായിദ് ബിൻ സുൽത്താൻ ആൽ നഹ്യാൻ ആവിഷ്കരിച്ച സഹിഷ്ണുതാ ആശയങ്ങളാണ് യു.എ.ഇ ഭരണകൂടം പിന്തുടരുന്നത്. സാഹോദര്യത്തിന്‍റെയും മാനവികതയുടെയും പുതിയ മാതൃകയാണ് യു.എ.ഇ ലോകത്തിനു മുന്നിൽ അവതരിപ്പിക്കുന്നതെന്നും യൂസഫലി കൂട്ടിച്ചേർത്തു.