വാക്സിൻ വിതരണം വേ​ഗത്തിലാക്കാൻ നടപടികളുമായി സർക്കാർ; നാല്​ കമ്പനികൾ കൂടി ഉൽപാദനം തുടങ്ങും

രാജ്യത്ത് വാക്സിൻ വിതരണം വേ​ഗത്തിലാക്കാൻ നടപടികൾ സ്വീകരിക്കുമെന്ന്​ ആവർത്തിച്ച്​ കേന്ദ്രസർക്കാർ. കേന്ദ്ര ആരോഗ്യമന്ത്രി മൻസുഖ്​ മാണ്ഡവ്യയാണ്​ വാക്​സിൻ ഉൽപാദനം വർധിപ്പിക്കുമെന്ന്​ അറിയിച്ചത്​. ഒക്​ടോബർ-നവംബർ മാസത്തിനുള്ളിൽ നാലോളം സ്വകാര്യ കമ്പനികൾ വാക്​സിൻ ഉൽപാദനം തുടങ്ങുമെന്ന്​ അദ്ദേഹം അറിയിച്ചു.

ഇതുവരെ രാജ്യത്ത് 47 കോടി ഡോസ്​ വാക്​സിൻ നൽകിയിട്ടുണ്ട്​. അതിൽ 11 കോടിയോളം പേർ മാത്രമാണ് രണ്ട് ഡോസ് വാക്സിനും സ്വീകരിച്ചവത്. രാജ്യത്തെ മുഴുവൻ ജനങ്ങൾക്കും എത്രയും പെ​ട്ടെന്ന്​ വാക്​സിൻ നൽകുകയാണ്​ ലക്ഷ്യമെന്നും ബയോളജിക്കൽ ഇ, നോവാർട്ടിസ്​, സിഡുസ്​ കാഡില വാക്​സിനുകൾക്ക്​ വൈകാതെ അനുമതി ലഭിക്കുമെന്നും ആരോഗ്യമന്ത്രി പറഞ്ഞു.

നിലവിൽ ഭാരത്​ ബയോടെക്​, സിറം ഇൻസ്റ്റിറ്റ്യൂട്ട്​ എന്നിവയാണ്​ സർക്കാറിന്​ വാക്​സിൻ നൽകുന്നത്​. സ്​പുട്​നിക്​ വാക്​സിനും സർക്കാറിന്​ ഉടൻ ലഭ്യമാകുമെന്നാണ്​ പ്രതീക്ഷയെന്നും അദ്ദേഹം പറഞ്ഞു. രാജ്യത്ത്​ നിലവിൽ അനുമതി ലഭിച്ചിട്ടുള്ള കോവിഷീൽഡിന്‍റെ പ്രതിമാസ ഉൽപാദനം 120 മില്യൺ ഡോസുകളായും കോവാക്​സിൻ്റേത്​ 58 മില്യൺ ഡോസായും വർധിപ്പിക്കുമെന്നും ആരോഗ്യമന്ത്രി അറിയിച്ചു. ഡിസംബറോടെയായിരിക്കും ഉൽപാദനം വലിയ രീതിയിൽ വർധിപ്പിക്കുക.