ജനറൽ ബിപിൻ റാവത്തിന്റെയും മധുലികയുടേയും ചിതാഭസ്മം ഇന്ന് ഹരിദ്വാറിൽ നിമജ്ജനം ചെയ്യും

സൈനിക ഹെലികോപ്ടർ അപകടത്തിൽ മരണപ്പെട്ട സംയുക്തസൈനികമേധാവി ബിപിൻ റാവത്തിന്റെയും ഭാര്യ മധുലികയുടെയും ചിതാഭസ്മം ഇന്ന് ഹരിദ്വാറിൽ നിമജ്ജനം ചെയ്യും. ഇതിനായി ബിപിൻ റാവത്തിന്റെ സംസ്‌കാരം നടന്ന ബ്രാർ സ്‌ക്വയറിൽ നിന്ന് ചിതാഭസ്മം ശേഖരിച്ചു.

ചിതാഭസ്മവുമായി ബന്ധുക്കൾ ഹരിദ്വാറിലേക്ക് തിരിച്ചു. കേന്ദ്ര മന്ത്രി അജയ് ഭട്ടും സംസ്ഥാനത്തെ മറ്റ് മന്ത്രിമാരും ചിതാഭസ്മ നിമജ്ജന ചടങ്ങിൽ പങ്കെടുക്കും. വെള്ളിയാഴ്ച വൈകിട്ട് ബ്രാർ സ്‌ക്വയറിലായിരുന്നു സൈനിക മേധാവിയുടെയും ഭാര്യയുടെയും സംസ്‌കാര ചടങ്ങുകൾ നടന്നത്. മക്കളായ കൃതികയും തരുണിയും ചേർന്നായിരുന്നു ചിതക്ക് തീ കൊളുത്തിയത്. സർവ സൈനിക ബഹുമതികളോടു കൂടിയായിരുന്നു ബിപിൻ റാവത്തിന് രാജ്യം യാത്രയപ്പ് നൽകിയത്.