യു.എ.പി.എ കരിനിയമത്തിനെതിരെ പോരാട്ടം ശക്തമാക്കുമെന്ന് അഖിൽ ​ഗൊ​ഗോയി

യു.എ.പി.എ കേസിൽ നിന്ന് കുറ്റമുക്തനായി പുറത്ത് വന്നതിന് പിന്നാലെ കരിനിയമങ്ങൾക്കെതിരെ പ്രതിഷേധം ആരംഭിക്കാനൊരുങ്ങി അഖിൽ ​ഗൊ​ഗോയ് എം.എൽ.എ. യു.എ.പി.എ മനുഷ്യാവകാശങ്ങൾക്കെതിരായുള്ള ക്രൂര നിയമമാണെന്നും അതിനെതിരെ താൻ പോരാടുമെന്നും അഖിൽ ​ഗൊ​ഗോയി പറഞ്ഞു.

2019 ഡിസംബറിൽ പൗരത്വ ഭേദഗതി നിയമത്തിനെതിരെ അസമിലുണ്ടായ വ്യാപക പ്രക്ഷോഭവുമായി ബന്ധപ്പെട്ട് ചുമത്തിയ കേസുകളിലാണ് എൻ.ഐ.എ കോടതി അഖിൽ ​ഗൊകഗോയിയെ പൂർണമായും കുറ്റവിമുക്തനാക്കിയത്. കഴിഞ്ഞ മാസം 22ന് ഒരു കേസിൽ ഗൊഗോയിയെ കോടതി വെറുതെവിട്ടിരുന്നു.

യു.എ.പി.എ പ്രകാരമാണ് അഖിൽ ​ഗൊ​ഗോയിക്കെതിരെ എൻ.ഐ.എ കേസെടുത്തിരുന്നത്. അസമിൽ പൗരത്വ പ്രക്ഷോഭത്തിനിടെയുണ്ടായിരുന്ന അക്രമസംഭവങ്ങളിലായിരുന്നു കേസ്.

സ്വതന്ത്ര നിയമവ്യവസ്ഥക്ക് ഇത് ചരിത്ര നിമിഷമാണ്. രാജ്യത്ത് അപ്രഖ്യാപിത അടിയന്തരാവസ്ഥയാണുള്ളത്. രാജ്യത്തൊരിടത്തും ജനാധിപത്യമില്ല. എന്നാൽ തനിക്ക് അനുകൂലമായി വന്ന വിധി നീതന്യായ വ്യവസ്ഥയിൽ ശുഭപ്രതീക്ഷ നൽകുന്നതാണെന്നും ​ഗൊ​ഗോയി പറഞ്ഞു. തടവിലിരിക്കെ തനിക്കായി ശബ്ദിച്ച അസമിലേയും രാജ്യത്തേയും ജനങ്ങൾക്ക് ​ഗൊ​ഗോയി നന്ദി അറിയിക്കുകയും ചെയ്തു.

സോഷ്യൽ മീഡിയയിലോ മാധ്യമങ്ങലിലോ മറ്റേത് പൊതുഇടത്തോ നിങ്ങൾ വല്ലതും പറഞ്ഞു പോയാൽ പിടിക്കപ്പെടും. ബി.ജെ.പി ഭരിക്കുന്ന അസമിൽ ഒരിടത്തും ജനാധിപത്യമില്ല. അവർ അസമിനെ മറ്റൊരു ഉത്തർപ്രദേശാക്കി മാറ്റും. അസമിലും ഉടനെ യോ​ഗി ഭരണം വന്നേക്കുമെന്നും അസമിലെ സിബ്സാ​ഗറിൽ നിന്നുള്ള എം.എൽ.എ കൂടിയായ ​ഗൊ​ഗോയി പറഞ്ഞു.

ജയിൽ മോചിതനായ അഖിൽ ​ഗൊ​ഗോയി, സി.എ.എ വിരുദ്ധ സമരത്തിനിടെ പൊലീസ് വെടിവെപ്പിൽ കൊല്ലപ്പെട്ട അഞ്ചുപേരിൽ ഒരാളായ പതിനേഴുകാരന്റെ വിട്ടിലേക്കാണ് ആദ്യം പോയത്. ​ഗുവാത്തിയിൽ ഡിസംബർ 2019ലാണ് പൊലീസ് വെടിവെപ്പ് നടന്നത്.