ആദിവാസി അധ്യാപികയെ ബലാത്സം​ഗം ചെയ്തു; ബിജെപി എം.എൽ.എയുടെ മകൻ അറസ്റ്റിൽ

റായ്പൂർ: ബലാത്സം​ഗക്കേസിൽ ഛത്തീസ്​ഗഢിലെ ബിജെപി എം.എൽ.എയുടെ മകൻ അറസ്റ്റിൽ. പ്രതിപക്ഷ നേതാവ് കൂടിയായ നാരായൺ ചന്ദേലിന്റെ മകൻ പലാഷ് ചന്ദേൽ ആണ് അറസ്റ്റിലായത്. രണ്ട് മാസമായി ഒളിവിലായിരുന്ന ഇയാൾ വ്യാഴാഴ്ച രാത്രിയാണ് പിടിയിലായത്.

ആദിവാസിയായ അധ്യാപികയെ വിവാഹ വാ​ഗ്ദാനം നൽകി വർഷങ്ങളോളം പീഡിപ്പിച്ചു എന്ന കേസിലാണ് അറസ്റ്റ്. എന്നാൽ, ഛത്തീസ്ഗഡ് ഹൈക്കോടതിയിൽ നിന്ന് മുൻകൂർ ജാമ്യം നേടിയതിനാൽ 25,000 രൂപയുടെ ബോണ്ടിൽ പലാഷിനെ വിട്ടയച്ചെന്ന് ഒരു ഉദ്യോഗസ്ഥൻ പറഞ്ഞു.

ജഞ്ജ്​ഗീർ-ചമ്പ ജില്ലാ പൊലീസാണ് പ്രതിയെ പിടികൂടിയത്. ഇയാൾക്ക് ഏപ്രിൽ നാലിനാണ് കോടതി മുൻകൂർ ജാമ്യം നൽകിയത്. അധ്യാപിക നൽകിയ പരാതിയിൽ ജനുവരി 19നാണ് റായ്പൂരിൽ ഇയാൾക്കെതിരെ ബലാത്സം​ഗക്കേസ് രജിസ്റ്റർ ചെയ്യുന്നത്.

വിവാഹ വാ​ഗ്ദാനം നൽകി പലാഷ് തന്നെ വർഷങ്ങളോളം പീഡിപ്പിച്ചു എന്നായിരുന്നു യുവതിയുടെ പരാതി. ​ഗർഭിണിയായപ്പോൾ ​ഗർഭഛിദ്രത്തിന് പ്രേരിപ്പിച്ചെന്നും പരാതിയിൽ പറയുന്നു.

പരാതിയിൽ ഐപിസി 376 (2-എൻ), 313 വകുപ്പുകളും എസ്.സി-എസ്.ടി വിഭാ​ഗങ്ങൾക്കെതിരായ അതിക്രമം തടയൽ നിയമപ്രകാരവുമാണ് ഇയാൾക്കെതിരെ കേസെടുത്തത്. തുടർന്ന് കേസ് ജഞ്ജ്​ഗീർ-ചമ്പ പൊലീസിന് കൈമാറുകയായിരുന്നു.

അതേസമയം, സംഭവത്തിൽ യുവതി സംസ്ഥാന വനിതാ കമ്മീഷനിലും പട്ടികജാതി- വർ​ഗ കമ്മീഷനിലും പരാതി നൽകിയിരുന്നു. ജഞ്ജ്​ഗീർ-ചമ്പ മണ്ഡലത്തിൽ നിന്നുള്ള നിയമസഭാം​ഗമാണ് പലാഷിന്റെ പിതാവ് നാരായൺ ചന്ദേൽ.