ഹരിയാനയില്‍ 90 സീറ്റുകളിലും ആം ആദ്മി പാര്‍ട്ടി ഒറ്റക്ക് മത്സരിക്കുമെന്ന് ഭഗവന്ത് മന്‍
|രണ്ട് സംസ്ഥാനങ്ങളില്‍ എഎപിക്ക് സര്‍ക്കാരുണ്ടെന്ന് മന്‍ വാര്‍ത്താസമ്മേളനത്തില്‍ പറഞ്ഞു
ചണ്ഡീഗഡ്: നിയമസഭാ തെരഞ്ഞെടുപ്പില്‍ ഹരിയാനയിലെ 90 സീറ്റുകളിലും ആം ആദ്മി പാര്‍ട്ടി ഒറ്റക്ക് മത്സരിക്കുമെന്ന് പഞ്ചാബ് മുഖ്യമന്ത്രി ഭഗവന്ത് മന്‍. ഇന്‍ഡ്യാ മുന്നണിയുടെ ഭാഗമായ എഎപി ലോക്സഭാ തെരഞ്ഞെടുപ്പില്‍ ഹരിയാനയില്‍ കോണ്‍ഗ്രസുമായി സഖ്യം ചേര്‍ന്നാണ് മത്സരിച്ചത്. എന്നാല്‍ വരുന്ന ഒക്ടോബറില്‍ നടക്കുന്ന നിയമസഭാ തെരഞ്ഞെടുപ്പില്‍ ഒറ്റക്ക് ജനവിധി തേടാനാണ് ആം ആദ്മിയുടെ തീരുമാനം.
രണ്ട് സംസ്ഥാനങ്ങളില്‍ എഎപിക്ക് സര്‍ക്കാരുണ്ടെന്ന് മന്‍ വാര്‍ത്താസമ്മേളനത്തില്‍ പറഞ്ഞു. പാർട്ടി രാജ്യസഭാ എംപി, ദേശീയ വക്താവ് സഞ്ജയ് സിംഗ്, രാജ്യസഭാ എം.പി, ദേശീയ ജനറൽ സെക്രട്ടറി (ഓർഗനൈസേഷൻ) സന്ദീപ് പതക്, പാർട്ടി ഹരിയാന പ്രസിഡൻ്റ് സുശീൽ ഗുപ്ത എന്നിവരും വാര്‍ത്താസമ്മേളനത്തില്‍ പങ്കെടുത്തിരുന്നു. ഗുജറാത്തില്‍ അഞ്ച് എം.എല്‍.എമാരും ഗോവയില്‍ രണ്ട് എം.എല്‍.എമാരുമുണ്ട്. ഗുജറാത്തിൽ 14% വോട്ട് നേടിയതിന് ശേഷം തെരഞ്ഞെടുപ്പ് കമ്മീഷൻ അംഗീകരിച്ച ദേശീയ പാർട്ടിയാണ് എഎപിയെന്ന് പറഞ്ഞ മൻ, ഹരിയാനയിലെ ജനങ്ങൾ എല്ലാ പാർട്ടികൾക്കും അവസരം നൽകിയെന്നും എന്നാൽ എല്ലാവരും ഹരിയാനയെ കൊള്ളയടിച്ചെന്നും അതിനാൽ ഹരിയാനയിലെ ജനങ്ങൾ ഇപ്പോൾ ഒരു മാറ്റം ആഗ്രഹിക്കുന്നുവെന്നും കൂട്ടിച്ചേര്‍ത്തു. ''അടുത്തിടെ നടന്ന നിയമസഭാ ഉപതെരഞ്ഞെടുപ്പിൽ ജലന്ധർ മണ്ഡലത്തിൽ നിന്ന് ആം ആദ്മി പാർട്ടി ഏകപക്ഷീയമായ വിജയം നേടിയിരുന്നു. ലോക്സഭാ തെരഞ്ഞെടുപ്പിൽ സംഗ്രൂർ, ഹോഷിയാർപൂർ, അനന്തപൂർ സീറ്റുകളിൽ വിജയിച്ചു'' ഭഗവന്ത് മന്‍ പറഞ്ഞു.
മുഖ്യമന്ത്രി നയാബ് സൈനിയുടെ നേതൃത്വത്തിലുള്ള ഹരിയാന ബി.ജെ.പി സർക്കാരിനെ രൂക്ഷമായി വിമർശിച്ച സഞ്ജയ് സിങ്, ഇന്ന് ഹരിയാന കൊള്ള സംഘങ്ങളുടെ ശക്തികേന്ദ്രമായി മാറിയെന്നും ആരോപിച്ചു. സമരത്തിൽ ഹരിയാനയിലെ കർഷകരെ ലാത്തിച്ചാർജ്ജ് ചെയ്തതും ഹരിയാനയിലെയും പഞ്ചാബിലെയും കർഷകരുടെ ആവശ്യങ്ങളിൽ വിട്ടുവീഴ്ച ചെയ്തതും നമ്മൾ കണ്ടു.ഹരിയാനയുടെ ഏറ്റവും വലിയ പ്രശ്‌നമാണ് തൊഴിലില്ലായ്മയെന്നും അദ്ദേഹം പറഞ്ഞു. പഞ്ചാബിലെ മൻ സർക്കാർ രണ്ട് വർഷത്തിനുള്ളിൽ 43,000 സർക്കാർ ജോലികൾ നൽകിയിട്ടുണ്ടെന്നും ഒരു കൈക്കൂലിയോ കടലാസ് ചോർച്ചയോ ഉണ്ടായിട്ടില്ലെന്നും പറഞ്ഞ അദ്ദേഹം ഡൽഹി മോഡൽ ഇന്ന് രാജ്യം മുഴുവൻ ചർച്ചാ വിഷയമായി മാറുകയാണെന്നും പറഞ്ഞു.
എഎപി ഇതിനകം 6500 ഗ്രാമങ്ങളിലും പരിവർത്തൻ ജൻസംവാദ് സഭ നടത്തിയിട്ടുണ്ടെന്നും ഇത്തവണ ഹരിയാനയിലെ ജനങ്ങൾ ഒരു മാറ്റത്തിലേക്കാണ് ഉറ്റുനോക്കുന്നതെന്നും പതക് പറഞ്ഞു.