യു.പിയിൽ യുവാക്കളെ മതപരിവർത്തന കേസിൽ കുടുക്കിയ പൊലീസിനെതിരെ രൂക്ഷവിമർശനവുമായി കോടതി; നടപടിക്ക് ഉത്തരവ്

ലഖ്നൗ: യു.പിയിൽ രണ്ട് യുവാക്കൾക്കെതിരെ നിർബന്ധിത മതപരിവർത്തമാരോപിച്ച് കേസെടുത്ത പൊലീസിനെതിരെ രൂക്ഷവിമർശനവുമായി കോടതി. രണ്ട് പേർ ഹിന്ദുക്കളെ ക്രിസ്ത്യൻ മതത്തിലേക്ക് മതപരിവർത്തനം നടത്തിയെന്ന് ആരോപിച്ച് കേസെടുത്ത നടപടിയിലാണ് ബറേലി കോടതി പൊലീസിനെതിരെ വിമർശനം ഉന്നയിച്ചത്. ഹിന്ദുത്വനേതാക്കളുടെ പരാതിക്കു പിന്നാലെയായിരുന്നു അഭിഷേക് ഗുപ്ത (41), കുന്ദൽ ലാൽ എന്നിവർക്കെതിരെ നിയമവിരുദ്ധ മതപരിവർത്തന നിരോധന നിയമം- 2021 പ്രകാരം പൊലീസ് കേസെടുത്തത്.

2022 മെയ് മാസത്തിൽ ബറേലിയിലെ ബിച്ച്പുരി ഗ്രാമത്തിൽ ഒരു പ്രാർഥനാ യോഗത്തിനിടെ ഇരുവരും ഹിന്ദു സമുദായാംഗങ്ങളെ പ്രലോഭനത്തിലൂടെ ക്രിസ്തുമതത്തിലേക്ക് പരിവർത്തനം ചെയ്തുവെന്ന് ആരോപിച്ചാണ് പൊലീസ് എഫ്.ഐ.ആർ ഫയൽ ചെയ്തത്. എന്നാൽ, ഇരുവർക്കുമെതിരായ ആരോപണങ്ങൾ അടിസ്ഥാനരഹിതമാണെന്ന് കോടതി കണ്ടെത്തി.

നിയമം ദുരുപയോഗം ചെയ്ത ബറേലി പൊലീസ് നടപടിയെ അപലപിച്ച കോടതി, ഈ കേസ് പരിഷ്കൃത സമൂഹത്തെ ആശങ്കപ്പെടുത്തുന്നതാണെന്നും ചൂണ്ടിക്കാട്ടി. തങ്ങളുടെ നിക്ഷിപ്ത താൽപ്പര്യങ്ങൾക്കായി എഫ്.ഐ.ആർ ഫയൽ ചെയ്ത് ഏതൊരു വ്യക്തിക്കും മറ്റൊരാൾക്കെതിരെ ക്രിമിനൽ നടപടികൾ ആരംഭിക്കാവുന്ന അവസ്ഥയാണ്. ബാഹ്യശക്തികളാൽ സ്വാധീനിക്കപ്പെട്ട പൊലീസിൻ്റെ കൃത്യവിലോപമാണ് കേസെന്നും കോടതി വ്യക്തമാക്കി.

കൃത്യവിലോപം നടത്തിയ പൊലീസ് ഉദ്യോഗസ്ഥർക്കെതിരെ നിയമനടപടി സ്വീകരിക്കാനും കോടതി ഉത്തരവിട്ടു. “ഈ കേസിൽ കുറ്റാരോപിതനായ അഭിഷേക് ഗുപ്തയ്ക്ക് ജോലി നഷ്ടപ്പെടുക മാത്രമല്ല, സാമ്പത്തികവും സാമൂഹികവുമായ നഷ്ടവും അനുഭവിക്കേണ്ടി വന്നു. കുന്ദൻ ലാൽ സംഭവസ്ഥലത്ത് ഉണ്ടായിരുന്നതായി ഒരു സാക്ഷി പോലും വിവരിച്ചിട്ടില്ല”- കോടതി ചൂണ്ടിക്കാട്ടി.

'പബ്ലിസിറ്റിക്ക് വേണ്ടി പരാതിക്കാർ നൽകിയ പരാതിക്കും സമ്മർദത്തിനും വഴങ്ങി അടിസ്ഥാനരഹിതവും കെട്ടിച്ചമച്ചതും സാങ്കൽപ്പികവുമായ കഥയ്ക്ക് നിയമരൂപം നൽകാനുള്ള ശ്രമമാണ് പൊലീസ് നടത്തിയത്. ഇതുമൂലം പൊലീസിൻ്റെ മാത്രമല്ല, കോടതിയുടെയും വിലപ്പെട്ട സമയവും അധ്വാനവും പണവും പാഴായി'- അഡീഷണൽ സെഷൻസ് ജഡ്ജി ജ്ഞാനേന്ദ്ര ത്രിപാഠി കൂട്ടിച്ചേർത്തു.