ഡല്‍ഹി ഹൈക്കോടതി
എല്ലാവര്‍ക്കും അന്തസുണ്ട്; ഭര്‍ത്താവിനെ നിരന്തരം അധിക്ഷേപിച്ചാല്‍ വിവാഹമോചനം തന്നെയെന്ന് ഡല്‍ഹി ഹൈക്കോടതി
|കുടുംബ കോടതിയുടെ വിവാഹമോചന ഉത്തരവിനെ ചോദ്യം ചെയ്ത് സ്ത്രീ സമര്‍പ്പിച്ച ഹരജിയിലാണ് കോടതിയുടെ നിരീക്ഷണം
ഡല്‍ഹി: ഭര്‍ത്താവിനെയും കുടുംബത്തെയും നിരന്തരം അധിക്ഷേപിച്ചാല്‍ ക്രൂരതയായി കണക്കാക്കുമെന്നും വിവാഹമോചനത്തിന് കാരണമാകാമെന്നും ഡല്‍ഹി ഹൈക്കോടതി. അന്തസോടെയും ബഹുമാനത്തോടെയും ജീവിക്കാൻ ഓരോ വ്യക്തിക്കും അർഹതയുണ്ട്. നിരന്തരമായി അധിക്ഷേപം ഏറ്റുവാങ്ങി ആരും ജീവിക്കാൻ ആഗ്രഹിക്കുന്നില്ലെന്നും കോടതി വ്യക്തമാക്കി. കുടുംബ കോടതിയുടെ വിവാഹമോചന ഉത്തരവിനെ ചോദ്യം ചെയ്ത് സ്ത്രീ സമര്‍പ്പിച്ച ഹരജിയിലാണ് കോടതിയുടെ നിരീക്ഷണം.
വിവാഹമോചനം അനുവദിച്ച കുടുംബ കോടതിയുടെ ഉത്തരവിനെ ചോദ്യം ചെയ്ത് യുവതി നൽകിയ അപ്പീൽ തള്ളിയ ഹൈക്കോടതി, പുരുഷനോട് ക്രൂരമായി പെരുമാറിയെന്ന വിചാരണക്കോടതിയുടെ കണ്ടെത്തലിൽ അപാകതയില്ലെന്ന് പറഞ്ഞു.ഹിന്ദു വിവാഹ നിയമത്തിലെ സെക്ഷൻ 13(1)(i-a) പ്രകാരം തെളിയിക്കപ്പെട്ട ക്രൂരതയാണിതെന്നും സഞ്ജീവ് സച്‍ദേവ, വികാസ് മഹാജന്‍ എന്നിവരടങ്ങിയ ബെഞ്ച് ചൂണ്ടിക്കാട്ടി. ഭാര്യയുടെ ക്രൂരതയുടെ പേരില്‍ വിവാഹമോചനം നല്‍കിയ വിധിയില്‍ തെറ്റൊന്നും കാണുന്നില്ലെന്നും കോടതി പറഞ്ഞു. ഭാര്യയുടെ പെരുമാറ്റം ഭർത്താവിന് മാനസികമായ വേദനയും ദേഷ്യവും ഉണ്ടാക്കുന്നുണ്ടെങ്കില്‍ ക്രൂരതയാണ്. "ഓരോ വ്യക്തിക്കും അന്തസോടെയും ബഹുമാനത്തോടെയും ജീവിക്കാൻ അർഹതയുണ്ട്.പ്രസ്താവിച്ച വാക്കുകൾ... ഒരു വ്യക്തിക്കെതിരെ ഉപയോഗിച്ചാൽ, അത് വ്യക്തിക്ക് വളരെ നിന്ദ്യവും അപമാനകരവുമാണെന്നും കോടതി വ്യക്തമാക്കി.
വഴക്കുണ്ടാകുമ്പോഴെല്ലാം ഭാര്യ വാക്കുകൾ ഉപയോഗിച്ച് തന്നെയും കുടുംബത്തെയും അപമാനിക്കുമെന്നായിരുന്നു ഭർത്താവിന്‍റെ വാദം. ''മോശം വാക്കുകളുടെ ആവര്‍ത്തിച്ചുള്ള ഉപയോഗം...വ്യക്തമായും അപമാനകരമാണ്, അത് തീർച്ചയായും ക്രൂരതയ്ക്ക് തുല്യമാണ്.ഒരു വ്യക്തിയും നിരന്തരം അധിക്ഷേപിക്കപ്പെട്ടുകൊണ്ട് ജീവിക്കുമെന്ന് പ്രതീക്ഷിക്കാനാവില്ല'' ബെഞ്ച് ചൂണ്ടിക്കാട്ടി.ആരോപിക്കപ്പെടുന്ന ക്രൂരത എപ്പോൾ നടന്നുവെന്നതിന്റെ നിർദിഷ്ട തീയതിയും സമയവും പരാമർശിച്ചിട്ടില്ലെന്ന യുവതിയുടെ അഭിഭാഷകന്‍റെ വാദവും നിരസിച്ചു.ക്രൂരതയെക്കുറിച്ചുള്ള ആരോപണങ്ങൾ അടിസ്ഥാനരഹിതമാണെന്നും ആരോപിക്കപ്പെടുന്ന ക്രൂരത എപ്പോൾ നടന്നുവെന്നതിനെ കുറിച്ച് പരാമർശിച്ചിട്ടില്ലെന്നും യുവതി ഹരജിയില്‍ പറഞ്ഞിരുന്നു.
2022 ജൂലൈയിലെ ഉത്തരവിൽ, പുരുഷൻ ക്രൂരതയുടെ ആരോപണങ്ങൾ തെളിയിച്ചിട്ടുണ്ടെന്നും ഭര്‍ത്താവിനോടും കുടുംബത്തോടുമുള്ള സ്ത്രീയുടെ പെരുമാറ്റം സൗഹാർദ്ദപരമല്ലെന്നും അവർ അവരെ ദുരുപയോഗം ചെയ്യാറുണ്ടെന്നും കുടുംബകോടതി ചൂണ്ടിക്കാട്ടിയിരുന്നു.