മാതളം പറിച്ചെന്ന്; 14കാരനായ ദലിത് ബാലനെ കൈകാലുകൾ കെട്ടി മർദിച്ച് റിട്ട. ഹെഡ്മാസ്റ്റർ

ഹൈദരാബാദ്: തന്റെ വീട്ടിലെ മരത്തിൽ നിന്നും മാതളം പറിച്ചെന്ന് ആരോപിച്ച് ദലിത് ബാലനെ കൈകാലുകൾ കെട്ടിയിട്ട് മർദിച്ച് റിട്ട. ഹെഡ്മാസ്റ്റർ. ഹൈദരാബാദ് ഷബാദ് മണ്ഡലിലെ കേശാറാം ​ഗ്രാമത്തിൽ ജൂൺ 22നാണ് സംഭവം.

'മാതളം പറിക്കാൻ കുട്ടി വീടിൻ്റെ കോമ്പൗണ്ട് മതിലിൽ കയറുന്നത് റിട്ട. ​ഗവ. സ്കൂൾ ഹെഡ്മാസ്റ്ററായ പ്രതി കണ്ടു. ഇതോടെ ഇയാൾ കുട്ടിയെ പിടികൂടുകയും കൈയും കാലും കയർ കൊണ്ട് കെട്ടി മർദിക്കുകയായിരുന്നു'- പൊലീസ് പറഞ്ഞു.

കൈകാലുകൾ ബന്ധിക്കപ്പെട്ട് നിലത്തുകിടക്കുന്ന കുട്ടിയുടെ ചിത്രങ്ങൾ സോഷ്യൽമീഡിയയിൽ പ്രചരിച്ചിരുന്നു. സംഭവത്തിൽ, കുട്ടിയുടെ മാതാവിന്റെ പരാതിയിൽ പൊലീസ് വീട്ടുമടയ്ക്കും മകനുമെതിരെ കേസെടുത്തു.

ഐപിസി 342 (തടഞ്ഞുവയ്ക്കൽ), 324 (മനഃപൂർവം പരിക്കേൽപ്പിക്കൽ) എന്നിവയും ജുവനൈൽ ജസ്റ്റിസ് ആക്ടിലെയും പട്ടികജാതി-വർ​ഗങ്ങൾക്കെതിരായ അതിക്രമം തടയൽ നിയമത്തിലേയും വിവിധ വകുപ്പുകളും ചുമത്തിയാണ് കേസെടുത്തതെന്ന് പൊലീസ് അറിയിച്ചു.

സംഭവമറിഞ്ഞ് പ്രതിയുടെ വീട്ടിലെത്തിയ കുട്ടിയുടെ അമ്മയെ ഇയാൾ അധിക്ഷേപിച്ചതായും പരാതിയിൽ ചൂണ്ടിക്കാട്ടുന്നു. കേസിൽ അന്വേഷണം പുരോ​ഗമിക്കുകയാണമെന്ന് പൊലീസ് അറിയിച്ചു.