കേന്ദ്രധനമന്ത്രി നിർമല സീതാരാമൻ ആശുപത്രിയിൽ

ന്യൂഡൽഹി: കേന്ദ്ര ധനമന്ത്രി നിർമല സീതാരാമൻ ആശുപത്രിയിൽ. ഡൽഹിയിലെ ഓൾ ഇന്ത്യ മെ‍ഡിക്കൽ ഇൻസ്റ്റിറ്റ്യൂട്ടിലാണ് മന്ത്രിയെ പ്രവേശിപ്പിച്ചിരിക്കുന്നത്.

വയറിൽ അണുബാധയെ തുടർന്നാണ് നിർമലയെ ആശുപത്രിയിൽ പ്രവേശിപ്പിച്ചതെന്നാണ് റിപ്പോർട്ട്. ഉച്ചയ്ക്ക് 12ഓടെയാണ് മന്ത്രിയെ ആശുപത്രിയിൽ പ്രവേശിപ്പിച്ചത്.

മന്ത്രിയുടെ ആരോഗ്യനില തൃപ്തികരമാണെന്നും മികച്ച വൈദ്യസഹായം നൽകുന്നുണ്ടെന്നും ബന്ധപ്പെട്ട വൃത്തങ്ങൾ അറിയിച്ചു. 63കാരിയായ കേന്ദ്രമന്ത്രിയെ ഉടൻ തന്നെ ഡിസ്ചാർജ് ചെയ്യുമെന്ന് വാർത്താ ഏജൻസിയായ എ.എൻ.ഐ റിപ്പോർട്ട് ചെയ്യുന്നു.

ശനിയാഴ്ച ചെന്നൈയിലെ തമിഴ്‌നാട് ഡോ. എം.ജി.ആർ മെഡിക്കൽ യൂണിവേഴ്‌സിറ്റിയുടെ 35-ാമത് വാർഷിക ബിരുദദാന ചടങ്ങിൽ നിർമല സീതാരാമൻ പങ്കെടുത്തിരുന്നു.

ഇന്നലെ, മുൻ പ്രധാനമന്ത്രി അടൽ ബിഹാരി വാജ്‌പേയിയുടെ ജന്മവാർഷികത്തിൽ ന്യൂഡൽഹിയിലെ 'സദൈവ് അടലിൽ' അവർ പുഷ്പാർച്ചന നടത്തിയിരുന്നു.