അജ്മീറിൽ ദലിത് വിദ്യാർഥിയെ ക്രൂരമായി മർദിച്ചു; ദേഹത്ത് മൂത്രമൊഴിച്ചതായും പരാതി

അജ്മീർ: രാജസ്ഥാനിലെ അജ്മീറിൽ ഒരുസംഘം ആളുകൾ ദലിത് വിദ്യാർഥിയെ ക്രൂരമായി മർദിച്ചതായും ദേഹത്തേക്ക് മൂത്രമൊഴിച്ചതായും പരാതി. 10-12 യുവാക്കളുടെ സംഘമാണ് പത്താംക്ലാസുകാരനെ മർദിച്ചത്. സംഭവത്തിന്റെ വീഡിയോ പ്രതികൾ സോഷ്യൽമീഡിയയിൽ പ്രചരിപ്പിക്കുകയും ചെയ്തു. വീഡിയോ വൈറലായതിന് പിന്നാലെ സംഭവത്തിൽ വ്യാപക പ്രതിഷേധമുയർന്നു.

സംഭവത്തിൽ നടപടിയെടുക്കണമെന്നാവശ്യപ്പെട്ട് ബി.ജെ.പി പൊലീസിന് പരാതി. ഈ മാസം 26 നാണ് സംഭവം നടന്നത്. എന്നാൽ വീഡിയോ പുറത്ത് വന്നതോടെയാണ് സംഭവം പുറത്തറിയുന്നത്. താൻ ഫോണിൽ റീൽ ചിത്രീകരിക്കുന്ന സമയത്ത് 10-12 പേർ വടിയുമായി അടുത്തുവന്നെന്നും തന്നെ മർദിക്കാൻ തുടങ്ങിയെന്നും പരാതിയിൽ പറയുന്നതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. മർദനത്തിന്റെ ഇടയിൽ മർദിച്ചവരിൽ ചിലർ തന്റെ ദേഹത്തേക്ക് മൂത്രമൊഴിച്ചതായും പരാതിയിലുണ്ട്.