എടപ്പാടി പളനിസ്വാമി
ധാര്‍മികതയുണ്ടെങ്കില്‍ സെന്തില്‍ ബാലാജി രാജി വയ്ക്കണമെന്ന് എടപ്പാടി പളനിസ്വാമി
|ബാലാജിയുടെ അറസ്റ്റിനിടെയുള്ള മനുഷ്യാവകാശ ലംഘന ആരോപണങ്ങൾ തള്ളിയ ഇപിഎസ്, സുപ്രീം കോടതിയുടെ നിർദ്ദേശപ്രകാരമാണ് എൻഫോഴ്‌സ്മെന്‍റ് ഡയറക്ടറേറ്റ് പ്രവർത്തിക്കുന്നതെന്ന് പറഞ്ഞു
ചെന്നൈ: കോഴക്കേസില്‍ അറസ്റ്റിലായ സെന്തില്‍ ബാലാജി ധാര്‍മികതയുണ്ടെങ്കില്‍ മന്ത്രിസഭയില്‍ നിന്നും രാജി വയ്ക്കണമെന്ന് തമിഴ്‌നാട് നിയമസഭാ പ്രതിപക്ഷ നേതാവും എഐഎഡിഎംകെ ജനറൽ സെക്രട്ടറിയുമായ എടപ്പാടി പളനിസ്വാമി. ബാലാജിയുടെ അറസ്റ്റിനിടെയുള്ള മനുഷ്യാവകാശ ലംഘന ആരോപണങ്ങൾ തള്ളിയ ഇപിഎസ്, സുപ്രീം കോടതിയുടെ നിർദ്ദേശപ്രകാരമാണ് എൻഫോഴ്‌സ്മെന്‍റ് ഡയറക്ടറേറ്റ് പ്രവർത്തിക്കുന്നതെന്ന് പറഞ്ഞു. ഇ.ഡി അവരുടെ കടമ നിറവേറ്റുകയാണെന്നും അദ്ദേഹം കൂട്ടിച്ചേര്‍ത്തു. ചെന്നൈയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു ഇപിഎസ്.
ബുധനാഴ്ച പുലര്‍ച്ചെയാണ് വൈദ്യുതി മന്ത്രിയായ ബാലാജിയെ ഇ.ഡി അറസ്റ്റ് ചെയ്യുന്നത്. ''സെന്തിൽ ബാലാജിക്കെതിരെ നാല് വർഷം മുമ്പാണ് അന്വേഷണം ആരംഭിച്ചത്. ഇന്നോ അടുത്ത കാലത്തോ തനിക്കെതിരെ കേസെടുത്തത് പോലെയല്ല.60 ദിവസത്തിനകം നടപടിയെടുക്കാനും അന്വേഷണം നടത്താനും സുപ്രീം കോടതി ഉത്തരവിട്ടു.ഇഡി പരാജയപ്പെട്ടാൽ വിഷയം അന്വേഷിക്കാൻ പ്രത്യേക അന്വേഷണ സംഘത്തെ (എസ്ഐടി) രൂപീകരിക്കുമെന്നും കോടതി പറഞ്ഞു.ഈ ഉത്തരവിന്റെ അടിസ്ഥാനത്തിൽ ഇഡി ഉദ്യോഗസ്ഥർ സെന്തിൽ ബാലാജിയുടെയും ബന്ധുക്കളുടെയും സുഹൃത്തുക്കളുടെയും ഉടമസ്ഥതയിലുള്ള സ്ഥലങ്ങളിൽ റെയ്ഡ് നടത്തുകയും അറസ്റ്റ് ചെയ്യുകയും ചെയ്തു, ”ഇപിഎസ് കൂട്ടിച്ചേർത്തു.2016ൽ സെക്രട്ടേറിയറ്റിൽ ആദായനികുതി വകുപ്പ് നടത്തിയ പരിശോധനയിൽ പ്രതിപക്ഷ നേതാവായിരിക്കെ മുഖ്യമന്ത്രി എം.കെ സ്റ്റാലിൻ നടത്തിയ പരാമർശങ്ങൾ വാർത്താ സമ്മേളനത്തിൽ ഇപിഎസ് എടുത്തുപറഞ്ഞു.ഇപ്പോൾ സെന്തിൽ ബാലാജിയുടെ അറസ്റ്റിനെക്കുറിച്ച് പരാതി പറയുന്ന അതേ സ്റ്റാലിൻ പറഞ്ഞത് കേന്ദ്ര സർക്കാരിന്‍റെ നിയന്ത്രണത്തിലാണെങ്കിലും ഐ-ടി വകുപ്പിന് അതിന്റേതായ നിയമങ്ങളുണ്ട്.കേസുമായി ബന്ധപ്പെട്ട് ചില തെളിവുകളുണ്ടെന്ന് ഏജൻസി ശക്തമായി വിശ്വസിക്കുന്നതിനാലാണ് തിരച്ചിൽ നടത്തുന്നതെന്നും അദ്ദേഹം പറഞ്ഞിരുന്നു. സെന്തിൽ ബാലാജിയുമായി ബന്ധമുള്ള സ്ഥലങ്ങളിൽ ഇഡി ഇപ്പോൾ നടത്തുന്ന തിരച്ചിലുകളും തെളിവുകളുടെ അടിസ്ഥാനത്തിലായിരിക്കണം.'' പളനിസ്വാമി പറഞ്ഞു.
2016ൽ സെക്രട്ടേറിയറ്റിൽ നടന്ന ഐടി പരിശോധന സംസ്ഥാനത്തിന് അപമാനമാണെന്ന് സ്റ്റാലിൻ വിശേഷിപ്പിച്ചിരുന്നു.എന്നാൽ ഇന്ന് മന്ത്രിയുടെ ചേംബറിൽ നടക്കുന്ന പരിശോധനകൾ തമിഴ്നാടിന് അപമാനമാണെന്നും ഇപിഎസ് പറഞ്ഞു.സെന്തിൽ ബാലാജിയുമായി ബന്ധമുള്ള സ്ഥലങ്ങളിൽ പരിശോധനയ്ക്ക് നിയോഗിച്ച ആദായനികുതി ഉദ്യോഗസ്ഥന് നേരെയുണ്ടായ ആക്രമണത്തെയും അദ്ദേഹം അപലപിച്ചു. ഇത്തരമൊരു സാഹചര്യം രാജ്യത്ത് ഒരിടത്തും ഉണ്ടായിട്ടില്ലെന്നും അദ്ദേഹം പറഞ്ഞു. സെന്തിൽ ബാലാജിക്ക് ഉദ്യോഗസ്ഥരുമായി സഹകരിക്കാൻ കഴിയാത്തത് എന്തുകൊണ്ടാണെന്നും ഇപിഎസ് ചോദിച്ചു.