കശ്മീരിൽ ഭീകരാക്രമണം; മൂന്ന് സാധാരണക്കാർ കൊല്ലപ്പെട്ടു
|കാറിലെത്തിയ രണ്ട് പേരാണ് ആക്രമണം നടത്തിയതെന്ന് അധികൃതര്‍ അറിയിച്ചു.
ശ്രീനഗർ: കശ്മീരിൽ ഭീകരാക്രമണത്തിൽ മൂന്ന് സാധാരണക്കാർ കൊല്ലപ്പെട്ടു. രജൗരിയിലെ ഡാംഗ്രി മേഖലയിലാണ് വെടിവയ്പ്പുണ്ടായത്. ആക്രമത്തിൽ ഏഴ് പേർക്ക് പരിക്കേറ്റു.
പരിക്കേറ്റവർ രജൗരിയിലെ ആശുപത്രിയിൽ ചികിത്സയിലാണ്. ആക്രമണത്തിനു പിന്നാലെ പൊലീസും ജില്ലാ ഭരണകൂടവും സ്ഥലത്തെത്തി.
പരിക്കേറ്റ ഒരാളുടെ ശരീരത്തിൽ ഒന്നിലധികം ബുള്ളറ്റ് മുറിവുകൾ കണ്ടെത്തിയതായി രജൗരിയിലെ അസോസിയേറ്റഡ് ഹോസ്പിറ്റൽ മെഡിക്കൽ സൂപ്രണ്ട് ഡോ. മെഹ്മൂദ് പറഞ്ഞു.
കാറിലെത്തിയ രണ്ട് പേരാണ് ആക്രമണം നടത്തിയതെന്ന് അധികൃതര്‍ അറിയിച്ചു. തുടർന്ന് ഈ കാറിൽ തന്നെ ഇവർ രക്ഷപെട്ടു. മൂന്ന് വീടുകളെയാണ് ഭീകരര്‍ ലക്ഷ്യം വച്ചത്.
ഭീകരർക്കായി സുരക്ഷാ സൈനികര്‍ തെരച്ചില്‍ ആരംഭിച്ചു. ജില്ലയില്‍ കഴിഞ്ഞ രണ്ട് ആഴ്ചയ്ക്കിടെ നടക്കുന്ന രണ്ടാമത്തെ ഭീകരാക്രമണമാണിത്. ഡിസംബർ 16ന് നടന്ന ആക്രമണത്തിൽ രണ്ട് സാധാരണക്കാര്‍ കൊല്ലപ്പെട്ടിരുന്നു.