‘നിങ്ങളുടെ ഹീറോ ഇപ്പോൾ എന്ത് ചെയ്യുന്നു’

‘നിങ്ങളുടെ ഹീറോ ഇപ്പോൾ എന്തെടുക്കുന്നു’400 സീറ്റിലും ബി.ജെ.പി ജയിക്കുന്നതും മോദി അജയ്യനായി മൂന്നാം തവണയും ഭരണത്തിലെത്തുന്നത്​​ സ്വപ്നം കണ്ടവർ രാഹുൽ ഗാന്ധിയെയും ഇൻഡ്യാ മുന്നണിയെയും പരിഹസിക്കാൻ എടുത്തുവെച്ച ചോദ്യമായിരുന്നു ഇത്​. ബി.ജെ.പി അനുകൂലികളായ മാധ്യമപ്രവർത്തകർ വരെ ചാനലിലൂടെ അത് വിളിച്ചു പറയുകയും ചെയ്​തു.എന്നാൽ വോ​ട്ടെണ്ണൽ ആരംഭിച്ചതോടെ എൻ.ഡി.എക്ക്​ കനത്തവെല്ലുവിളി ഉയർത്തുന്ന പ്രകടനമാണ്​ ഇൻഡ്യാ മുന്നണി കാഴ്ചവെച്ചത്​.

കേവല ഭൂരിപക്ഷമെന്ന മാജിക്​ നമ്പരിലേക്കും ​ അധികാരത്തിലേക്കുമെത്തിക്കാൻ കഴിഞ്ഞില്ലെങ്കിലും ഇന്ന്​ ഇൻഡ്യാ സഖ്യത്തെയും കോൺഗ്രസിനെയും ആർജ്ജവത്തോടെ തല ഉയർത്തി നിർത്തുന്നതിൽ ആരാധകരുടെ ‘രാഗ’ യെന്ന​ രാഹുൽ ഗാന്ധിയുടെ പങ്ക്​ വലുതാണ്​. അധികാര ഇടവഴിയിൽ രാഹുൽ സജീവമായിട്ട്​ രണ്ട് പതിറ്റാണ്ട്​ പിന്നിടുന്നു. 20 വർഷത്തിൻറെ രാഷ്ട്രീയ പാകത രാഹുലിൻറെ ശരീരഭാഷയിലും പ്രതികരണങ്ങളിലും ചിരിയിലും പോലും വലിയ മാറ്റമുണ്ടാക്കിയിരിക്കുന്നു.രാഷ്ട്രിയത്തിലേക്ക്​ ഇറങ്ങിയത്​ തന്നെ അധികാരത്തിലേക്ക്​.ആ പത്തുവർഷ​ം രാജ്യം കണ്ട രാഹുൽ അല്ലായിരുന്നു പ്രതിപക്ഷത്തിരുന്നപ്പോൾ.

2014 ലെ പരാജയം യു.പി.എ 2019 ലും ആവർത്തിച്ചതോടെ രാഹുൽ ഗാന്ധിയെന്ന ചെറുപ്പക്കാരനെ എഴുതിത്തള്ളിയിരുന്നു കോൺഗ്രസിലെ ഒരു വിഭാഗം നേതാക്കൾ പോലും. മോദിയും ബി.ജെ.പിയും മാത്രമല്ല ഇടതുപക്ഷമടക്കം വ്യക്​തിപരമായി​ അധിക്ഷേപിക്കുകയും ചെയ്തു. 2019 ൽ യു.പി.എക്ക്​ ഏറ്റ കനത്ത പരാജയം രാഹുലിനെ പിന്നോട്ടടിപ്പിച്ചു. തോൽവിയുടെ പൂർണ ഉത്തരവാദിത്തം ഏറ്റെടുത്ത്​ രാഹുൽ എ​.ഐ.സി.സി പ്രസിഡണ്ട്​ പദവിയൊഴിഞ്ഞു. തോൽക്കുക എന്നത് പോലും രാഷ്ട്രിയത്തിൽ പുതിയ അവസരമാണെന്ന ബാലപാഠം പോലും രാഹുലിന്​ അറിയില്ലെ എന്ന്​ സംശയിച്ചവരിൽ ഖദറിട്ടവർ പോലുമുണ്ടായിരുന്നു.

കോൺഗ്രസിനെ ഇനിയാരു നയിക്കും, ​ഇന്ത്യൻ രാഷ്ട്രിയത്തിൽ ​കോൺഗ്രസ്​ അപ്രസക്​തമാകുന്നുവെന്ന്​ വിധിയെഴുതി രാഹുലിനൊപ്പം നിന്നവർ പോലും ​​നേരം ഇരുട്ടിവെളുത്തപ്പോൾ മറുകണ്ടം ചാടി. പക്ഷെ രാഹുൽ അധികാരപദവിയിൽ നിന്ന്​ ഇറങ്ങിപ്പോയത്​ രാഷ്ട്രിയം അവസാനിപ്പിക്കാനായിരുന്നില്ല. സ്വയം നവീകരിക്കാനും ഹിന്ദുത്വ സർക്കാരിനെ ​നേരിടാനുള്ള സ്​ട്രാറ്റജി മാറ്റിപിടിക്കാനുമായിരുന്നു.താനുള്ള​ടത്തോളം കോൺഗ്രസിൻറെ മുന്നിലുണ്ടാകുമെന്ന്​ പറഞ്ഞ്​ രാഹുൽ ജനങ്ങളിലേക്ക്​ ഇറങ്ങിയപ്പോൾ ഒപ്പം നിന്ന നേതാക്കളെയും പ്രവർത്തകരെയും അണിനരത്തി രാഹുൽ കോൺഗ്രസിനെ ചലിപ്പിച്ചു തുടങ്ങി. അതുവരെയുള്ള രാഷ്ട്രിയ ഭാഷയായിരുന്നില്ല രാഹുലിൻറേത്​. മോദിയെയ​ും അമിത്​ഷായെയും വസ്തുനിഷ്ഠമായി കടന്നാക്രമിച്ചു. അദാനിയെയും,അംബാനിയെയും മാത്രമല്ല ചങ്ങാത്തമുതലാളിമാർക്ക്​ വേണ്ടി മോദി​ വഴിവിട്ട്​ നടത്തിയ അഴിമതിക​ളെയെല്ലാം മുഖം നോക്കാതെ തുറന്ന്​ കാട്ടി.ഗോദി മീഡിയകളുൾപ്പടെ ദേശീയ മാധ്യമങ്ങളെല്ലാം രാഹുലിനെ അവഗണിച്ചെങ്കിലും പോരാട്ടവുമായി രാഹുൽ മുന്നോട്ട് പോയി. രാജ്യത്തെ പ്രതിപക്ഷ നിരയിലുള്ള നേതാക്കളും സർക്കാരുകളുമായി ബന്ധം ശക്​തമാക്കി. തെര​െഞ്ഞെടുപ്പ്​ പ്രചാരണത്തിൽ സാധാരണക്കാർക്ക്​ വേണ്ടി സംസാരിച്ചു. പട്ടിണിയും തൊഴിലില്ലായ്മയും വിലക്കയറ്റവും വർഗീയതയുമൊക്കെ പ്രധാനവിഷയമാക്കി രാഹുൽ.

മോദിയുടെ അധികാരത്തണലിൽ സംഘ്​പരിവാർ രാജ്യത്ത്​ വി​ദ്വേഷവും വെറുപ്പും പടർത്തുന്നതിനിടയിലാണ്​ ​രാഹുൽ കന്യാകുമാരി മുതൽ കശ്മീർ വരെ ഭാരത്​ ജോഡോ യാത്രയുമായി ഇറങ്ങുന്നത്​.ജനങ്ങളിലേക്ക്​ ഇറങ്ങി ചെല്ലാൻ അത്തരമൊരു യാത്ര വേണോ എന്ന ആശങ്ക കോൺഗ്രസിനകത്ത്​ തന്നെയുണ്ടായിരുന്നു. ഓരോ തോൽവിയും ജനങ്ങളിലേക്ക്​ കൂടുതൽ ഇറങ്ങിച്ചെല്ലണമെന്ന തിരിച്ചറിവുണ്ടായിക്കഴിഞ്ഞു അപ്പോഴേക്കും രാഹുലിന്​. ജനങ്ങളിലേക്ക്​ ഇറങ്ങി ചെന്ന് കൈവിട്ടുപോയ​ അധികാരം തിരിച്ചുപിടിച്ച ഇ​ന്ദിരാഗാന്ധിയുടെ ചെറുമകൻ​ ആ രാഷ്ട്രീയ പാഠം വീണ്ടും ആവർത്തിച്ചപ്പോൾ ജനം ഒപ്പം നിന്നുവെന്നതിന്​ തെളിവാണ്​ കോൺഗ്രസ്​ 99 സീറ്റിൽ ജയിച്ചതും ഇൻഡ്യാ മുന്നണി 234 സീറ്റിലെത്തിയതും. 83 കാരനായ ശരദ്​ പവാറിനെയും 81 കാരനായ മല്ലികാർജുൻ ഖാർഗെയു​മൊക്കെ ഒപ്പം നിർത്തി രാഹുൽ ഗാന്ധി ഇറങ്ങിയത്​ പ്രതിപക്ഷത്തിരിക്കാനല്ല എന്നുറപ്പാണ്​.