മണ്ഡലത്തിലെ മൂന്ന് പ്രശ്‌നങ്ങള്‍ പോലും പറയാനാകാതെ ശ്രീശാന്ത്മണ്ഡലത്തിലെ മൂന്ന് പ്രശ്‌നങ്ങള്‍ പോലും പറയാനാകാതെ ശ്രീശാന്ത്
|തിരുവനന്തപുരം നിയമസഭാ മണ്ഡലത്തിലെ പ്രധാനപ്പെട്ട മൂന്ന് പ്രശ്‌നങ്ങള്‍ ഏതെന്ന മാധ്യമപ്രവര്‍ത്തകന്റെ ചോദ്യത്തിന് പോലും മറുപടി പറയാനാകാതെ ശ്രീശാന്ത് പതറി...
താന്‍ മത്സരിക്കുന്ന തിരുവനന്തപുരം നിയമസഭാ മണ്ഡലത്തിലെ പ്രധാനപ്പെട്ട മൂന്ന് പ്രശ്‌നങ്ങള്‍ ഏതെന്ന മാധ്യമപ്രവര്‍ത്തകന്റെ ചോദ്യത്തിന് പോലും മറുപടി പറയാനാകാതെ ശ്രീശാന്ത് പതറി. എന്‍ഡിടിവിക്ക് നല്‍കിയ അഭിമുഖത്തിനിടെയാണ് മുന്‍ ഇന്ത്യന്‍ ക്രിക്കറ്റ് താരമായ ശ്രീശാന്ത് പതറിയത്. തിരുവനന്തപുരം മണ്ഡലത്തില്‍ എന്‍ഡിഎ സ്ഥാനാര്‍ഥിയായാണ് ശ്രീശാന്ത് നിയമസഭാ തെരഞ്ഞെടുപ്പില്‍ മത്സരിക്കാന്‍ ഒരുങ്ങുന്നത്.
നിലവിലെ എംഎല്‍എയും ആരോഗ്യമന്ത്രിയുമായ വിഎസ് ശുവകുമാര്‍ മണ്ഡലത്തിന് വേണ്ടി ഒന്നും ചെയ്തില്ലെന്ന ശ്രീശാന്തിന്റെ പരാമര്‍ശത്തിന് പിന്നാലെയായിരുന്നു അവതാരകന്റെ ചോദ്യം. മണ്ഡലത്തിലെ പ്രധാനപ്പെട്ട മൂന്ന് പ്രശ്‌നങ്ങള്‍ എന്തെല്ലാമാണെന്നായിരുന്നു ശ്രീശാന്തിനോട് ചോദിച്ചത്. ആദ്യം ഒഴിഞ്ഞു മാറാന്‍ ശ്രമിക്കുന്നുണ്ടെങ്കിലും താന്‍ രാഷ്ട്രീയത്തില്‍ തുടക്കക്കാരനാണെന്നും ജനങ്ങളെ സേവിക്കാനാണ് ഈ മേഖല തെരഞ്ഞെടുത്തത് എന്നൊക്കെ പറഞ്ഞാണ് ശ്രീശാന്ത് രക്ഷപ്പെടാന്‍ ശ്രമിക്കുന്നത്.
തിരുവനന്തപുരം മണ്ഡലത്തില്‍ ഇടതുമുന്നണി സ്ഥാനാര്‍ഥിയായി ആന്റണി രാജുവും യുഡിഎഫിന്റെ വിഎസ് ശിവകുമാറുമാണ് ശ്രീശാന്തിന്റെ പ്രധാന എതിരാളികളായെത്തുന്നത്.