ജൂഡ് ആന്റണി സംഭവത്തില്‍ വിശദീകരണവുമായി സൗമിനി ജയിന്‍ജൂഡ് ആന്റണി സംഭവത്തില്‍ വിശദീകരണവുമായി സൗമിനി ജയിന്‍
|സഹപ്രവർത്തകരുടെ മുന്നിൽ വച്ച് സ്ത്രീത്വത്തെ അപമാനിക്കുന്ന രീതിയിൽ സംസാരിച്ചതുകൊണ്ടാണ് താൻ പരാതി നൽകിയത്
സംവിധായകൻ ജൂഡ് ആന്‍റണിക്കെതിരെ നൽകിയ പരാതിക്ക് വിശദീകരണവുമായി കൊച്ചി മേയർ സൗമിനി ജെയിൻ. വിഷയത്തിൽ ജൂഡ് ഫേസ്ബുക്കിലൂടെ നടത്തിയ വിശദീകരണത്തിനുള്ള മറുപടിയും സംഭവത്തിൽ തനിക്ക് പറയാനുള്ളതുമാണ് കൊച്ചി മേയര്‍ ഫേസ്ബുക്കിലൂടെ വ്യക്തമാക്കിയിരിക്കുന്നത്.
ജൂഡ് നല്ലൊരു സംവിധായകനാണെന്ന മുഖവുരയോടെ തുടങ്ങുന്ന ഫേസ്‍ബുക്ക് വിശദീകരണത്തിൽ മികച്ച തിരക്കഥ തയാറാക്കി ഇരയെ വേട്ടക്കാരനാക്കാനും അദ്ദേഹത്തിന് കഴിവുണ്ടെന്ന് സൗമിനി ആരോപിക്കുന്നു. സഹപ്രവർത്തകരുടെ മുന്നിൽ വച്ച് സ്ത്രീത്വത്തെ അപമാനിക്കുന്ന രീതിയിൽ സംസാരിച്ചതുകൊണ്ടാണ് താൻ പരാതി നൽകിയത്. ജൂഡ് മുമ്പ് മറ്റ് പലരെയും ഫേസ്ബുക്കിലൂടെ ആക്ഷേപിച്ച കാര്യവും സൗമിനി ഓർമിപ്പിക്കുന്നു. മന്ത്രി എം.എം.മണിയെയും ഫേസ്ബുക്കിൽ തന്‍റെ പോസ്റ്റിനെതിരേ പ്രതികരിച്ച ഒരാളുടെ പിതാവിന് പറഞ്ഞതും എല്ലാം താങ്കളുടെ സ്വഭാവ വൈകല്യം തെളിയിക്കുന്നതാണെന്നും സൗമിനി ആരോപിക്കുന്നു. ഒരു സ്ത്രീയെന്ന ഒറ്റക്കാരണത്താൽ തന്നെ അപമാനിച്ച വ്യക്തി സ്ത്രീകൾക്കും കുട്ടികൾക്കും വേണ്ടി ഹ്രസ്വചിത്രം എടുത്ത് ബോധവത്കരണം നടത്തുന്നത് വിരോധാഭാസമാണെന്നും സൗമിനി ജെയിൻ ഫേസ്‍ബുക്ക് പോസ്റ്റില്‍ കുറിക്കുന്നു.