ആർട്ടിഫിഷ്യൽ ഇൻ്റലിജൻസ് ക്യാൻസർ ഗവേഷണത്തിന്: നെതർലൻഡ് സര്‍വകലാശാലയുമായി ചേർന്ന് എൻ.ഐ.ടിയും എം.വി.ആർ ക്യാൻസർ സെൻ്ററും
പ്രശസ്ത ക്ലിനിക്കൽ ഡാറ്റാ സയന്‍റിസ്റ്റ് ഡോ. ആന്ദ്രേ ഡെക്കർ ഗവേഷകരെ അഭിസംബോധന ചെയ്തു.
കോഴിക്കോട്: നാഷണൽ ഇൻസ്റ്റിറ്റ്യൂട്ട് ഓഫ് ടെക്‌നോളജി കാലിക്കറ്റും (എൻ.ഐ.ടി.സി) കോഴിക്കോട്ടെ എം.വി.ആർ കാൻസർ സെന്‍റര്‍ ആൻഡ് റിസർച്ച് ഇൻസ്റ്റിറ്റ്യൂട്ടും (എം.വി.സി.സി.ആർ.ഐ) ചേർന്ന്, ആർട്ടിഫിഷ്യൽ ഇന്‍റലിജൻസ്, മെഷീൻ ലേണിംഗ്, ഡാറ്റ സയൻസ് എന്നീ സാങ്കേതിക വിദ്യകൾ കാൻസർ ഗവേഷണത്തിനു പ്രയോഗിക്കുന്നതിൽ മുൻനിര സ്ഥാപനങ്ങളായ നെതർലൻഡ്‌സിലെ മാസ്ട്രിച്ച് യൂണിവേഴ്‌സിറ്റി, മാസ്‌ട്രോ ക്ലിനിക്ക് എന്നിവയുമായി സംയുക്ത ഗവേഷണം ശക്തിപ്പെടുത്താൻ തീരുമാനിച്ചു.
പ്രശസ്ത ക്ലിനിക്കൽ ഡാറ്റ സയന്‍റിസ്റ്റും മാസ്ട്രിച്ച് സർവകലാശാലയിലെ ക്ലിനിക്കൽ ഡാറ്റ സയൻസ് ഡിപ്പാർട്ട്മെന്റ് പ്രൊഫസറുമായ ഡോ. ആന്ദ്രെ ഡെക്കർ എൻ.ഐ.ടി.സിയിലെ ഗവേഷകരെയും എം.വി.ആർ.സി.സി.ആർ.ഐയിലെ ഡോക്ടർമാരെയും അഭിസംബോധന ചെയ്തു. ക്യാൻസർ നേരത്തേ കണ്ടെത്തുന്നതിനും ചികിത്സിക്കുന്നതിനുമായി നവീന മെഷീൻ ലേണിംഗ് രീതികൾ പ്രയോഗിക്കുന്നതിന്‍റെ സാധ്യതകൾ അദ്ദേഹം ഊന്നിപ്പറഞ്ഞു. മാസ്ട്രിച്ച് സർവകലാശാലയിലെ ഫാക്കൽറ്റി അംഗവും ക്ലിനിക്കൽ ഡാറ്റാ സയന്‍റിസ്റ്റുമായ ഡോ. ലിയോനാർഡ് വീയും ഡാറ്റ സയൻസ്, കാൻസർ റിസർച്ച് എന്നിവയിലെ അനുഭവം പങ്കുവച്ചു. ഡോ. ആൻഡ്രെയും ഡോ. ലെനും വ്യാഴാഴ്ച എൻ.ഐ.ടിയും എം.വി.ആർ ക്യാൻസർ സെന്‍ററും സന്ദർശിച്ചു.
ശ്വാസകോശ അർബുദത്തിനുള്ള ചികിത്സ മെച്ചപ്പെടുത്തുന്നതിനായി 'ഫെഡറേറ്റഡ് ലേണിംഗ്' രീതി ഉപയോഗിച്ച് മൂന്ന് സ്ഥാപനങ്ങൾ ഉൾപ്പെടുന്ന ഒരു സംയുക്ത ഗവേഷണ പ്രവർത്തനം ഇതിനകം പുരോഗമിക്കുകയാണ്. ഫാക്കൽറ്റി അംഗങ്ങൾ, ഡോക്ടർമാർ, ഗവേഷകർ എന്നിവരുടെ സജീവ പങ്കാളിത്തത്തോടെ എൻഐടിസിയിൽ നടന്ന ചർച്ചയിൽ, ക്യാൻസർ പോലെയുള്ള രോഗങ്ങളുടെ ഫലപ്രദമായ ചികിത്സയ്ക്കായി മെഡിക്കൽ പ്രൊഫഷണലുകളെ സഹായിക്കുന്നതിന് മെഷീൻ ലേണിംഗ്, ഡാറ്റ സയൻസ് എന്നിവയുടെ പ്രയോഗത്തെക്കുറിച്ച് വിവിധ ആശയങ്ങൾ പങ്കുവെച്ചു.
എൻ.ഐ.ടി.സി ഡയറക്ടർ പ്രൊഫ. പ്രസാദ് കൃഷ്ണ, യുവ ഗവേഷകരോട് തങ്ങളുടെ ഗവേഷണ സാധ്യതകൾ അനുകമ്പയോടെ വിനിയോഗിക്കാനും മനുഷ്യരാശിക്ക് ആശ്വാസം പകരാനും ആഹ്വാനം ചെയ്തു. ഡോ. ദിനേശ് മക്കുനി (ഹെഡ്, ഡിപ്പാർട്ട്മെന്റ് ഓഫ് റേഡിയേഷൻ ഓങ്കോളജി, എംവിആർസിസിആർഐ), ഡോ. മധുസൂദനൻ പിള്ള (ഡീൻ, ആർ ആൻഡ് സി, എൻഐടിസി), ഡോ. സമീർ എസ് എം (ഡീൻ-അക്കാദമിക്, എൻഐടിസി), ഡോ. മധുകുമാർ എസ് ഡി (പ്രൊഫസർ, സിഎസ്ഇ), ഡോ. അബ്ദുൾ നസീർ കെ എ (പ്രൊഫസർ, സിഎസ്ഇ & ചെയർമാൻ, സെന്റർ ഫോർ പബ്ലിക് റിലേഷൻസ്, എൻഐടിസി), ഡോ. രവി വർമ്മ എം കെ (പ്രൊഫസർ, ഫിസിക്സ് & ചെയർമാൻ, സെന്റർ ഫോർ ഇന്റർനാഷണൽ റിലേഷൻസ്, എൻഐടിസി), ഡോ. ജോസ് മാത്യു (പ്രൊഫസർ, എംഇഡി & ചെയർമാൻ , സെന്റർ ഫോർ ഇൻഡസ്ട്രി ഇൻസ്റ്റിറ്റ്യൂട്ട് ഇന്ററാക്ഷൻ, എൻഐടിസി), ഡോ. നിയാസ് പുഴക്കൽ (ചീഫ് മെഡിക്കൽ ഫിസിസിസ്റ്റ്, എംവിആർസിസിആർഐ), ഡോ. ജയരാജ് പി ബി, ഡോ പൗർണമി പി എൻ (അസിസ്റ്റന്റ് പ്രൊഫസർമാർ, സിഎസ്ഇ, എൻഐടിസി), ഡോ. പ്രവീൺ ശങ്കരൻ (അസിസ്റ്റൻറ് പ്രൊഫസർ, ഇലക്ട്രോണിക്സ്), ലക്ഷ്മി പി ചന്ദ്രൻ (ഗവേഷക, സി.എസ്.ഇ) എന്നിവർ ചടങ്ങിൽ സംസാരിച്ചു.
Artificial Intelligence for Cancer Research: NIT and MVR Cancer Center in collaboration with the University of the Netherlands
