ഷെയർചാറ്റ് വഴി പരിചയപ്പെട്ട 17കാരിയെ പീഡിപ്പിച്ച കേസ്: പ്രതി അറസ്റ്റിൽ
|വാടകയ്ക്ക് എടുത്ത കാറിലാണ് പ്രതി പെണ്‍കുട്ടിയുമായി കറങ്ങിയിരുന്നത്. വിവിധയിടങ്ങളില്‍ പെണ്കുട്ടിയെ എത്തിച്ച് ലൈംഗികമായി പീഡിപ്പിച്ചതിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചു
തിരുവനന്തപുരം: പ്രായപൂര്‍ത്തിയാകാത്ത പെണ്കുട്ടിയെ പീഡിപ്പിച്ച കേസില്‍ ഇരുപത് വയസുകാരനെ തിരുവനന്തപുരം കഴക്കൂട്ടം പൊലീസ് അറസ്റ്റ് ചെയ്തു. മലപ്പുറം വെങ്ങോട് സ്വദേശി ഗോകുലാണ് അറസ്റ്റിലായത്.
സമൂഹമാധ്യമമായ ഷെയര്‍ചാറ്റിലൂടെ പെണ്കുട്ടിയെ പരിചയപ്പെട്ട ഗോകുല്‍ പലസ്ഥലങ്ങളില്‍ പെണ്കുട്ടിയെ എത്തിച്ചു പീഡിപ്പിച്ചു. വാടകയ്ക്ക് എടുത്ത കാറിലാണ് പ്രതി പെണ്‍കുട്ടിയുമായി കറങ്ങിയിരുന്നത്. വിവിധയിടങ്ങളില്‍ പെണ്കുട്ടിയെ എത്തിച്ച് ലൈംഗികമായി പീഡിപ്പിച്ചതിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചു. പീഡനത്തിന് ശേഷം പെണ്‍കുട്ടിയുടെ മൂന്നരപവന്റെ സ്വര്‍ണാഭരണങ്ങള്‍ പ്രതി കവര്‍ന്നതായി പൊലീസ് പറഞ്ഞു.
കരുനാഗപ്പള്ളിയിലെ ജ്യൂസ് കടയില്‍ ജോലി ചെയ്ത് വരികയായിരുന്നു പ്രതി. പെണ്കുട്ടിയെ പീഡിപ്പിച്ചതിന് ശേഷം കരുനാഗപ്പള്ളിയിലെത്തിയ ഗോകുലിനെ ഇവിടെ നിന്നാണ് പൊലീസ് അറസ്റ്റ് ചെയ്തത്. ഇയാള്‍ക്കെതിരെ പാലക്കാട് ജില്ലയില്‍ സമാനമായ കേസ് ഉണ്ടായിരുന്നതായി പൊലീസ് പറഞ്ഞു. പതിനാറുകാരിയെ പീഡിപ്പിച്ച ഗോകുല്‍ ജയില്‍ശിക്ഷ അനുഭവിച്ചിരുന്നു. ഈ കേസില്‍ ജാമ്യത്തിലിറങ്ങിയ ശേഷമാണ് കഴക്കൂട്ടം പൊലീസ് സ്റ്റേഷന്‍ പരിധിയിലുള്ള പെണ്കുട്ടിയെ ഷെയര്‍ചാറ്റ് വഴി പരിചയപ്പെട്ടതും പിന്നീട് പീഡിപ്പിച്ചതും.
കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ഗോകുലിനെ കസ്റ്റഡിയില്‍ വാങ്ങി വിശദമായ അന്വേഷണം നടത്തുമെന്ന് പൊലീസ് പറഞ്ഞു.