മൂന്ന് ജില്ലകളിലെ കലക്ടര്‍മാര്‍ക്ക് മാറ്റം; ശ്രീറാം വെങ്കിട്ടരാമൻ ധനകാര്യ വകുപ്പിലേക്ക്
|തിരുവനന്തപുരം കലക്ടറായിരുന്ന ജെറോമിക് ജോർജിനെ മാറ്റി പകരം ഐ.ടി മിഷന്‍ ഡയറക്ടറായ അനു കുമാരിയെ നിയമിച്ചു.
തിരുവനന്തപുരം: മൂന്ന് ജില്ലകളിലെ കലക്ടര്‍മാര്‍ക്ക് മാറ്റം. തിരുവനന്തപുരം, കോട്ടയം, ഇടുക്കി, ജില്ലാ കലക്ടര്‍മാരെയാണ് മാറ്റിയത്. തിരുവനന്തപുരം കലക്ടറായിരുന്ന ജെറോമിക് ജോർജിനെ മാറ്റി പകരം ഐ.ടി മിഷന്‍ ഡയറക്ടറായ അനു കുമാരിയെ നിയമിച്ചു. ജെറോമിക് ജോര്‍ജിന് പിന്നാക്ക വികസന വകുപ്പ് ഡയറക്ടർ സ്ഥാനം നൽകി.
ഇടുക്കി ജില്ലാ കലക്ടറായിരുന്ന ഷീബാ ജോര്‍ജിനെ റവന്യൂ വകുപ്പ് അഡീഷണല്‍ സെക്രട്ടറിയായി നിയമിച്ചു. നിലവിലെ കോട്ടയം ജില്ലാ കലക്ടറായ വി. വിഗ്‌നേശ്വരി ഇടുക്കി കലക്ടറാവും. പിന്നാക്ക വികസനവകുപ്പ് ഡയറക്ടറായ ജോണ്‍ വി. സാമുവല്‍ കോട്ടയം കലക്ടറാവും.
അതേസമയം, മാധ്യമപ്രവർത്തകനായ കെ.എം ബഷീറിനെ കാറിടിപ്പിച്ചു കൊന്ന കേസിലെ പ്രതിയായ ശ്രീറാം വെങ്കിട്ടറാമിനെ ധനവകുപ്പ് ജോയിന്റ് സെക്രട്ടറിയും ഓഫീസര്‍ ഓണ്‍ സ്പെഷ്യല്‍ ഡ്യൂട്ടിയുമായും നിയമിച്ചു. സപ്ലൈകോ സി.എം.ഡി സ്ഥാനത്തുനിന്നും നീക്കിയ ശ്രീറാമിന് പകരം നിയമനം നല്‍കിയിരുന്നില്ല. ഷീബാ ജോര്‍ജും അനുകുമാരിയും നിലവില്‍ വഹിക്കുന്ന അധിക ചുമതലകളിൽ തുടരും.