സുരേഷ് ഗോപിയുടെ ഭാഗത്തുനിന്നുണ്ടായത് തെറ്റായ പ്രവണതയെന്ന് എം.എം ഹസൻ

സുരേഷ് ഗോപിയുടെ ഭാഗത്തുനിന്നുണ്ടായത് തെറ്റായ പ്രവണതയെന്ന് യു.ഡി.എഫ് കൺവീനർ എം.എം ഹസൻ. ചോദ്യങ്ങൾ ഉന്നയിക്കുമ്പോൾ സുരേഷ് ഗോപി അസഹിഷ്ണുത കാണിക്കുകയാണ്. ബി.ജെ.പി നേതൃത്വം വിഷയത്തെ രാഷ്ട്രീയ ഗൂഢാലോചന എന്ന് ആരോപിക്കുന്നത് ശരിയായ നടപടിയല്ല. മാധ്യമപ്രവർത്തകയുടെ പ്രതിഷേധത്തിൽ പങ്കുചേരുകയാണെന്നും എം.എം ഹസൻ പറഞ്ഞു.

സംഭവത്തിൽ സുരേഷ് ഗോപി ക്ഷമാപണം നടത്തിയിട്ടുണ്ടെങ്കിലും മാധ്യമ പ്രവർത്തകരോട് രാഷ്ട്രീയ നേതാക്കളോ സെലിബ്രിറ്റികളോ അപമര്യാദയായി പെരുമാറുന്നത് തെറ്റാണ്. ചോദ്യങ്ങളോട് അസഹിഷ്ണുത പ്രകടിപ്പിക്കുന്നതിന് പകരം അതിനോട് ശക്തമായി പ്രതികരിക്കുകയാണ് വേണ്ടതെന്നും എം.എം ഹസൻ പറഞ്ഞു.