സൂപ്പർ ട്വിസ്​റ്റ്​: ഇന്ത്യക്ക്​ ടൈ കെട്ടി ശ്രീലങ്ക

കൊളംബോ: ഇന്ത്യ-ശ്രീലങ്ക ആദ്യ ഏകദിനത്തിന്​ സൂപ്പർ ട്വിസ്​റ്റ്​​. ആദ്യം ബാറ്റുചെയ്​ത ലങ്ക എട്ടുവിക്കറ്റ്​ നഷ്​ടത്തിൽ ഉയർത്തിയ 230 റൺസ്​ പിന്തുടർന്ന ഇന്ത്യയുടെ പോരാട്ടവും അതേ സ്​കോറിൽ അവസാനിക്കുകയായിരുന്നു. തുല്യ സ്​കോറിൽ നിൽക്കേ ഇന്ത്യയുടെ ശിവം ദുബേയെയും അർഷ്​ദീപ്​ സിങ്ങിനെയും തുടരെയുള്ള പന്തുകളിൽ പുറത്താക്കിയ അസലങ്കയാണ്​ ലങ്കക്ക്​ വിജയത്തോളം പോന്ന ടൈ നൽകിയത്​. പുതിയ കോച്ച്​ ഗൗതം ഗംഭീറി​െൻറ ശിക്ഷണത്തിൽ ആദ്യ ഏകദിനത്തിനിറങ്ങിയ ഇന്ത്യക്ക്​ മത്സരം നൽകിയത്​ നിരാശ മാത്രം​.

ആദ്യം ബാറ്റുചെയ്​ത ലങ്ക പതും നിസ്സാങ്കയുടെയും (56) ദുനിത്​ വെല്ലാലഗെയുടെയും (67) മികവിലാണ് ​പൊരുതാവുന്ന സ്​കോറുയർത്തിയത്​​. 142 റൺസിന്​ ആറ്​ വിക്കറ്റ്​ വീണ ലങ്കയെ വനിന്ദു ഹസരങ്കയെയും (24), ധനഞ്​ജയയെും (17) കൂട്ടുപിടിച്ച്​ വെല്ലാലഗെ 230ലെത്തിക്കുകയായിരുന്നു. ഇന്ത്യക്കായി അർഷ്​ദീപ്​ സിങ്ങും അക്​സർ പ​ട്ടേലും രണ്ടും മുഹമ്മദ്​ സിറാജ്,​ ശിവം ദുബെ, കുൽദീപ്​ യാദവ്​, വാഷിങ്​ടൺ സുന്ദർ എന്നിവർ ഓരോ വിക്കറ്റ്​ വീതവും വീഴ്​ത്തി.

മറുപടി ബാറ്റിങ്ങിനിറ​ങ്ങിയ ഇന്ത്യക്ക്​ ക്യാപ്​റ്റൻ രോഹിത്​ ശർമ 58 (47) മിന്നും തുടക്കമാണ്​ നൽകിയത്​. എന്നാൽ മറ്റുള്ള ബാറ്റർമാർ നിലയുറപ്പിക്കാൻ ശ്രമിച്ചെങ്കിലും ആർക്കും ടീമിനെ വിജയത്തിലേക്ക്​ എത്തിക്കാനായില്ല. ശുഭ്​മൻ ഗിൽ (16), വിരാട്​ കോലി (24), വാഷിങ്​ടൺ സുന്ദർ (5), ശ്രേയസ്​ അയ്യർ (23), കെ.എൽ രാഹുൽ (31), അക്​സർ പ​ട്ടേൽ (33), ശിവം ദുബൈ (25) എന്നിങ്ങനെയാണ്​ മറ്റു ബാറ്റർമാരുടെ സ്​കോറുകൾ.

ടൈ പിറന്നതിങ്ങനെ

ബൗളർമാരെയും കൂട്ടുപിടിച്ച്​ ദുബെ ഇന്ത്യയെ വിജയത്തിലെത്തിക്കുമെന്ന്​ തോന്നിപ്പിച്ചു. ഇന്ത്യൻ സ്​കോർ എട്ടിന്​ 211ൽ നിൽക്കേ ക്രീസിലെത്തിയ സിറാജിനെ കൂട്ടുപിടിച്ച്​ ദുബെ ഇന്ത്യൻ സ്​കോർ 230ലെത്തിച്ചു. എന്നാൽ അസലങ്കയുടെ പന്ത്​ ദുബെയുടെ പാഡിൽ തട്ടി തെറിച്ചതോടെ റൺസ്​ ഓടിയെടുത്ത ഇന്ത്യ വിജയം ആഘോഷിക്കവേ ​ലങ്ക റിവ്യൂ ചെയ്യുന്നു. ദുബെ വിക്കറ്റിനുമുന്നിൽ കുടുങ്ങിയെന്ന്​ റിവ്യൂവിൽ വ്യക്തം. തുടർന്ന്​ ക്രീസിലെത്തിയ അർഷ്​ദീപ്​ സിങ്ങിനെയും ആദ്യ പന്തിൽ തന്നെ അസലങ്ക വിക്കറ്റിന്​ മുന്നിൽ കുരുക്കി. ഇന്ത്യ റിവ്യൂ ചെയ്​തെങ്കിലും അത്​ വിഫലമായി. ഫലത്തിൽ ലങ്കക്ക്​ ലഭിച്ചത്​ വിജയത്തോളം പോന്ന സമനില.