ഗസ്സയില്‍ അൽജസീറ മാധ്യമപ്രവർത്തകന്റെ 21 അംഗ കുടുംബമടക്കം നൂറ് പേർ കൊല്ലപ്പെട്ടു

ഗസ്സ സിറ്റി: യുദ്ധം രണ്ടു മാസം പിന്നിട്ടിരിക്കെ, ഗസ്സയിലുടനീളം കനത്ത ആക്രമണം തുടർന്ന് ഇസ്രായേൽ. അൽജസീറ ചാനൽ റിപ്പോർട്ടറുടെ 21 അംഗ കുടുംബം ഉൾപ്പെടെ നൂറുകണക്കിന്​ ഫലസ്​തീനികൾ ഇന്നലെയും കൊല്ലപ്പെട്ടു. ഉന്നത സൈനിക മേധാവി ഉൾപ്പെടെ 10 ഇസ്രായേൽ സൈനികരെ ഹമാസ്​ വധിച്ചു. ലോകസമാധാനത്തിന്​ ഭീഷണിയായ സാഹചര്യത്തിൽ ഗസ്സ വിഷയത്തിൽ അടിയന്തര ഇടപെടൽ തേടി യുഎൻ രക്ഷാസമിതിക്ക്​ ചാർട്ടർ 99-ം വകുപ്പു പ്രകാരം സെക്രട്ടറി ജനറൽ സന്ദേശം കൈമാറി.

ഖാൻ യൂനുസ്​, ജബലിയ, ശുജാഇയ പ്രദേശങ്ങളിൽ കരയുദ്ധം കൂടുതൽ രൂക്ഷമാണ്. നിരവധി കവചിത വാഹനങ്ങൾ പ്രദേശത്ത്​ തമ്പടിച്ചതായി ദൃക്​സാക്ഷികൾ അറിയിച്ചു. വ്യോമാക്രമണവും ഷെല്ലാക്രമണവും വ്യാപകമായിരിക്കുകയാണ്. സിവിലിയൻ കേന്ദ്രങ്ങൾക്കു നേരെ നടന്ന ആക്രമണങ്ങളിൽ സ്​ത്രീകളും കുട്ടികളും ഉൾപ്പെടെ നിരവധി പേരാണ്​ മരിച്ചത്​.

അൽജസീറ അറബിക് ചാനലിന്‍റെ റിപ്പോർട്ടർ മോമിൻ അൽഷറഫിയുടെ 21 അംഗ കുടുംബവും ഇസ്രായേൽ വ്യോമാക്രമണത്തിൽ കൊല്ലപ്പെട്ടു. വടക്കൻ ഗസ്സയിലെ ജബലിയ അഭയാർഥി ക്യാമ്പിൽ കുടുംബം താമസിച്ചിരുന്ന കെട്ടിടത്തിന് മേൽ ഇസ്രായേൽ സൈന്യം ബോംബിടുകയായിരുന്നു. നടപടി കിരാതമെന്ന്​ അൽ ജസീറ അധികൃതർ പറഞ്ഞു.

അതേസമയം, ആശുപത്രികളുടെ പ്രവർത്തനം തടഞ്ഞതിനു പിന്നിൽ ഇസ്രായേലിന്‍റെ ഗൂഢലക്ഷ്യം പകൽ പോലെ വ്യക്​തമാണെന്ന്​ ഹമാസ്​ പറഞ്ഞു. ലബനാനിലെ ഹിസ്​ബുല്ല കേന്ദ്രങ്ങൾക്കു നേരെ ഇസ്രായേൽ സൈന്യം ആക്രമണം നടത്തി. തിരിച്ചടിയെന്നോണം ഇസ്രായേൽ സൈനിക കേന്ദ്രങ്ങളെ ലക്ഷ്യമിട്ട്​ മിസൈലുകൾ അയച്ചതായി ഹിസ്​ബുല്ലയും വ്യക്തമാക്കി. യെമനിലെ ഹൂത്തികൾ ഇസ്രായേലിനെ ലക്ഷ്യമിട്ടയച്ച ഡ്രോണുകൾ തങ്ങളുടെ പടക്കപ്പൽ പ്രതിരോധിച്ചതായി പെൻറഗൺ അറിയിച്ചു.

തെക്കൻ ഗസ്സയിലേക്കുള്ള ഇസ്രായേൽ കരസേനാ നീക്കത്തെ ശക്​തമായി പ്രതിരോധിച്ചു വരുന്നതായി ഹമാസ് അറിയിച്ചു​. ഉന്നത ഓഫീസർമാർ ഉൾപ്പെ​െട പിന്നിട്ട 24 മണിക്കൂറിനുള്ളിൽ 10 സൈനികർ കൊല്ലപ്പെട്ടതായി ഇസ്രായേൽ സൈന്യവും അവകാശപ്പെട്ടു. തുരങ്കത്തിനുള്ളിലുള്ള യഹ്​യ സിൻവറിനെ കൊലപ്പെടുത്തുകയെന്നത്​ യുദ്ധലക്ഷ്യങ്ങളിൽ പ്രധാനമാണെന്നും സൈന്യം പറയുന്നു.

ഗസ്സയിൽ വെടിനിർത്തൽ നടപ്പാക്കാൻ രക്ഷാസമിതിയുടെ പിന്തുണ തേടി യു.എൻ സെക്രട്ടറി ജനറൽ ആൻറണിയോ ഗുട്ടറസ്​ സന്ദേശം ​കൈമാറി. യു.എൻ ചാർട്ടർ 99-ം വകുപ്പു പ്രകാരം ലോകസമാധാനം മുൻനിർത്തി രക്ഷാസമിതി ഇടപെടൽ ​തേടാനുള്ള സെക്രട്ടറി ജനറലി​െൻറ അധികാ​രം മുൻനിർത്തിയാണ്​ നീക്കം. 2017ൽ സെക്രട്ടറി ജനറൽ പദവിയിലെത്തിയ ഗുട്ടറസ്​ ഇതാദ്യമായാണ്​ 99-ാം വകുപ്പ്​ പ്രയോജനപ്പെടുത്തുന്നത്​. അമേരിക്ക ഉൾപ്പെടെയുള്ള രാജ്യങ്ങളുമായി ചേർന്ന്​ മധ്യസ്​ഥ ചർച്ചകൾ പുനരാരംഭിച്ചതായി ഖത്തറും അറിയിച്ചു.