ഗോതമ്പ് ഇറക്കുമതി ചെയ്യും: ഉപരോധ ആഹ്വാനങ്ങള്‍ക്കിടെ റഷ്യയ്ക്ക് ചൈനയുടെ സഹായം
|യുക്രൈനില്‍ റഷ്യ ആക്രമണം ആരംഭിച്ച് മണിക്കൂറുകൾക്ക് ശേഷമാണ് ചൈനയുടെ ജനറൽ അഡ്മിനിസ്ട്രേഷൻ ഓഫ് കസ്റ്റംസ് ഗോതമ്പ് ഇറക്കുമതി തീരുമാനം പ്രഖ്യാപിച്ചത്
അമേരിക്ക ഉള്‍പ്പെടെയുള്ള രാജ്യങ്ങള്‍ പ്രഖ്യാപിച്ച ഉപരോധം മറികടക്കാന്‍ റഷ്യയ്ക്ക് ഒരു കൈ സഹായവുമായി അമേരിക്ക. റഷ്യയില്‍ നിന്നു വന്‍തോതില്‍ പെട്രോളിയവും പ്രകൃതിവാതകവും ഇറക്കുമതി ചെയ്യാനാണു ചൈനയുടെ നീക്കം. ഇതിന്റെ തുടക്കമായി റഷ്യയില്‍ നിന്നു ഗോതമ്പ് ഇറക്കുമതി ചെയ്യാന്‍ ചൈന തീരുമാനിച്ചു.
യുക്രൈനില്‍ റഷ്യ ആക്രമണം ആരംഭിച്ച് മണിക്കൂറുകൾക്ക് ശേഷമാണ് ചൈനയുടെ ജനറൽ അഡ്മിനിസ്ട്രേഷൻ ഓഫ് കസ്റ്റംസ് ഗോതമ്പ് ഇറക്കുമതി തീരുമാനം പ്രഖ്യാപിച്ചത്. റഷ്യൻ പ്രസിഡന്റ് വ്ലാദിമർ പുടിനും ചൈനീസ് പ്രസിഡന്റ് ഷി ജിൻപിങും ഫെബ്രുവരി 4ന് ബിജീങില്‍ കൂടിക്കാഴ്ച നടത്തിയിരുന്നു. ഈ കൂടിക്കാഴ്ചയിലുണ്ടായ കരാര്‍ പ്രകാരമാണ് ചൈന റഷ്യയില്‍ നിന്ന് ഗോതമ്പ് ഇറക്കുമതി ചെയ്യുന്നത്. ലോകരാജ്യങ്ങള്‍ റഷ്യയ്ക്ക് ഉപരോധം പ്രഖ്യാപിച്ചപ്പോഴും ചൈന കരാറുമായി മുന്നോട്ടുപോവുകയാണ്.
ഇറക്കുമതി ചെയ്യുമ്പോഴേക്കും ഗോതമ്പ് കേടാകുമെന്ന ആശങ്ക കാരണമായിരുന്നു ഇതുവരെ ചൈന റഷ്യയില്‍ നിന്ന് ഇറക്കുമതി ചെയ്യാതിരുന്നത്. എന്നാല്‍ ഫംഗസ് ബാധയേല്‍ക്കാതെ നോക്കുമെന്ന് റഷ്യ ഉറപ്പുനല്‍കിയതോടെ ഗോതമ്പും ബാർലിയും ഇറക്കുമതി ചെയ്യാനുള്ള കരാറില്‍ ചൈന ഒപ്പിട്ടു. ഗോതമ്പിലോ ബാർലിയിലോ ഫംഗസോ മറ്റ് അണുബധയോ കണ്ടെത്തിയാൽ ചൈനയിലേക്കുള്ള കയറ്റുമതി നിർത്തിവയ്ക്കും.
രാജ്യങ്ങളുടെ പരമാധികാരത്തോടുള്ള ബഹുമാനത്തിന് ചൈന ആഹ്വാനം ചെയ്തെങ്കിലും റഷ്യയുടെ യുക്രൈന്‍ ആക്രമണത്തെ തള്ളിപ്പറയാന്‍ ചൈന തയ്യാറായിട്ടില്ല. അതിനിടെയാണ് ഒരു കൈ സഹായം കൂടി ചൈന റഷ്യയ്ക്ക് വാഗ്ദാനം ചെയ്തത്.
തീപിടിച്ച് ഗോതമ്പ് വില
യുക്രൈനിലെ റഷ്യൻ അധിനിവേശത്തോടെ ആഗോള വിപണിയില്‍ തീപിടിച്ചിരിക്കുകയാണ് ഗോതമ്പ് വില. യൂറോപ്യന്‍ വിപണിയായ യൂറോനെക്‌സ്റ്റ് പ്ലാറ്റ്‌ഫോമിൽ ഒരു ടൺ ഗോതമ്പിന് 344 യൂറോയാണ് വ്യാഴാഴ്ചയിലെ വില. 2008ന് ശേഷമുള്ള ഏറ്റവും ഉയർന്ന വിലയാണിത്. ലോകത്തെ മൊത്തം ഗോതമ്പ് ഉൽപ്പാദനത്തിന്റെ 29 ശതമാനവും റഷ്യയും യുക്രൈനും ചേർന്നാണ്.
ലോകം പണപ്പെരുപ്പ ഭീതിയിൽ നിൽക്കുന്ന വേളയിലാണ് ബ്രഡ് അടക്കമുള്ള അവശ്യവസ്തുക്കളുടെ അടിസ്ഥാനഘടകമായ ഗോതമ്പിന്റെ വിലയുയരുന്നത്. യുഎൻ ഫുഡ് ഏജൻസിയുടെ കണക്കു പ്രകാരം, ആവശ്യം വർധിച്ചതു നിമിത്തം പത്തു വർഷത്തെ ഉയർന്ന നിലയിലാണ് ആഗോള ഭക്ഷ്യവില. ലോകത്ത് ഏറ്റവും കൂടുതൽ ഉപയോഗിക്കുന്ന ഭക്ഷ്യധാന്യവും ഗോതമ്പാണ്.
റിഫിനിറ്റിവ് ഷിപ്പിങ് ഡാറ്റ പ്രകാരം റഷ്യ ഉൽപ്പാദിപ്പിക്കുന്ന എഴുപത് ശതമാനം ഗോതമ്പും കയറ്റുമതി ചെയ്യുന്നത് മധ്യേഷ്യയിലേക്കും ആഫ്രിക്കയിലേക്കുമാണ്. ഈജിപ്ത്, തുർക്കി, ബംഗ്ലാദേശ് എന്നീ രാഷ്ട്രങ്ങളാണ് ഏറ്റവും കൂടുതൽ ഗോതമ്പു വാങ്ങുന്നത്. നിലവിലെ പ്രതിസന്ധി ആഗോള വിപണിയിലേക്ക് കൂടുതൽ ഗോതമ്പ് കയറ്റുമതി ചെയ്യാൻ ഇന്ത്യക്ക് അവസരമൊരുക്കുന്നതാണെന്ന് വിദഗ്ധർ ചൂണ്ടിക്കാട്ടുന്നു. ആവശ്യത്തിന് ഗോതമ്പ് കൈവശമുള്ളത് കൊണ്ടു തന്നെ മേഖലയിലെ വിലക്കയറ്റം ആദ്യഘട്ടത്തില്‍ ഇന്ത്യയെ ബാധിക്കില്ല.
റഷ്യയ്ക്ക് യുക്രൈനിൽ എന്താണ് കാര്യം?
യുഎസ് നേതൃത്വം നൽകുന്ന മുപ്പത് പാശ്ചാത്യൻ രാജ്യങ്ങളുടെ സൈനിക സഖ്യമായ നാറ്റോയിൽ അംഗത്വമെടുക്കാനുള്ള യുക്രൈന്റെ ശ്രമങ്ങളാണ് റഷ്യയെ ചൊടിപ്പിച്ചത്. കഴിഞ്ഞ വർഷം ജനുവരിയിലാണ് യുക്രൈൻ നാറ്റോയിൽ അംഗത്വം ആവശ്യപ്പെട്ടത്. അതിർത്തി രാഷ്ട്രത്തിൽ നാറ്റോ സഖ്യസേനയ്ക്ക് താവളമൊരുങ്ങുന്നത് റഷ്യ ആശങ്കയോടെയാണ് കാണുന്നത്. ശീതയുദ്ധ കാലത്തെ അനുഭവങ്ങൾ റഷ്യയെ ഭയപ്പെടുത്തുകയും ചെയ്യുന്നു. നാറ്റോയ്ക്കും തങ്ങൾക്കുമിടയിലെ 'നോ മാൻസ് ലാൻഡ്' ആയാണ് റഷ്യ യുക്രൈനെ കാണുന്നത്. നാറ്റോയിൽ അംഗത്വമെടുക്കുന്ന നിലപാടുമായി മുമ്പോട്ടു പോയാൽ കടുത്ത നടപടികൾക്കു വിധേയമാകുമെന്ന് റഷ്യൻ പ്രസിഡണ്ട് വ്‌ളാദിമിർ പുടിൻ നേരത്തെ തന്നെ മുന്നറിയിപ്പു നൽകിയിരുന്നു.
എന്നാൽ തങ്ങൾ പരമാധികാര രാഷ്ട്രമാണ് എന്നും സ്വന്തം തീരുമാനവുമായി മുമ്പോട്ടുപോകുമെന്നും യുക്രൈൻ പ്രസിഡണ്ട് വ്‌ളോദിമിർ സെലൻസ്‌കി നിലപാടെടുത്തു. നേരത്തെ സോവിയറ്റ് യൂണിയന്റെ ഭാഗമായിരുന്ന രാഷ്ട്രങ്ങൾക്ക് നാറ്റോ അംഗത്വം നൽകിയതാണ് സെലൻസ്‌കിയെ ഈ തീരുമാനമെടുക്കാൻ പ്രേരിപ്പിച്ചത്. ഇതോടെ യുക്രൈയൻ അതിർത്തികളിലും സഖ്യരാഷ്ട്രമായ ബെലറൂസിലും റഷ്യ സേനയെ വിന്യസിച്ചു. രണ്ടു ലക്ഷത്തിലേറെ സൈനികരാണ് അതിർത്തിയിൽ ഉണ്ടായിരുന്നത്. നാറ്റോയിൽ ചേരില്ലെന്ന ഉറപ്പ് യുക്രൈനിൽ നിന്നും പാശ്ചാത്യൻ രാജ്യങ്ങളിൽ നിന്നും ലഭിക്കണമെന്നാണ് പുടിന്റെ നിലപാട്.
മാറി നിൽക്കുന്ന യുഎസ്
യുദ്ധ ഭീഷണി ഉയർന്ന വേളയിൽ യുക്രൈനു വേണ്ടി നിലകൊണ്ട രാഷ്ട്രമാണ് യുഎസ്. ആവശ്യമെങ്കിൽ സൈനിക സഹായം നൽകുമെന്ന റിപ്പോർട്ടുകളുമുണ്ടായിരുന്നു. എന്നാൽ യുദ്ധം തുടങ്ങിയതിന് ശേഷം, സൈനിക നടപടികളിൽ നിന്നു വിട്ടു നിൽക്കുകയാണ് അമേരിക്ക. പകരം ഉപരോധം കടുപ്പിക്കുകയാണ് ചെയ്തത്. യുഎസിലുള്ള എല്ലാ സമ്പത്തും മരവിപ്പിക്കുമെന്ന് ബൈഡൻ പ്രഖ്യാപിച്ചിട്ടുണ്ട്. യുഎസിന് പുറമേ, യൂറോപ്പും റഷ്യയ്‌ക്കെതിരെ ഉപരോധം പ്രഖ്യാപിച്ചിട്ടുണ്ട്. അതേസമയം, ഉപരോധം റഷ്യമായി കാര്യമായി അലട്ടില്ല എന്നാണ് വിദഗ്ധരുടെ വിലയിരുത്തൽ. എണ്ണ, പ്രകൃതിവാതക കയറ്റുമതിയാണ് പ്രധാനമായും യൂറോപ്പുമായി റഷ്യക്കുള്ളത്. ഏത് ഉപരോധത്തിനിടയിലും അവ സുരക്ഷിതമായി കയറ്റി അയക്കപ്പെടും. കാരണം, അത് യൂറോപ്പിന്റെ കൂടി ആവശ്യമാണ്. എന്നാൽ നോർട് സ്ട്രീം-2 പൈപ്പ് ലൈൻ പദ്ധതി നിർത്തിവയ്ക്കാനുള്ള ജർമനിയുടെ തീരുമാനം റഷ്യക്ക് തിരിച്ചടിയാണ്. റഷ്യയിൽ നിന്ന് ജർമനി വരെ നീളുന്ന പ്രകൃതിവാതക പൈപ്പ്‌ലൈനാണ് നോർഡ് സ്ട്രീം 2. ചൈന നൽകുന്ന പിന്തുണയും റഷ്യക്ക് ബലമേകുന്നു. യുക്രൈനിൽ റഷ്യ നടത്തിയത് അധിനിവേശമല്ല എന്ന നിലപാടാണ് ചൈനയുടേത്.
മൂന്നാം ലോകയുദ്ധമോ?
റഷ്യ-യുക്രൈൻ യുദ്ധം മൂന്നാം ലോകമഹായുദ്ധത്തിന് കാരണമാകുമോ എന്ന് ലോകം ആശങ്കപ്പെടുന്നു. ആക്രമണം നീണ്ടു പോയാൽ ഇതോട് യുഎസും നാറ്റോയും എങ്ങനെ പ്രതികരിക്കുമെന്നതിനെ ആശ്രയിച്ചിരിക്കുമിത്. എന്നാൽ ലോകമഹായുദ്ധമല്ല, രണ്ടാം ശീതയുദ്ധത്തിനാണ് തുടക്കം കുറിച്ചിട്ടുള്ളതെന്ന് ചില വിദഗ്ധർ പറയുന്നു. യുക്രൈനിൽ സർവാധിപത്യം സ്ഥാപിക്കാനായാൽ മധ്യയൂറോപ്പിൽ റഷ്യക്ക് കൂടുതൽ സ്വാധീനം ഉണ്ടാക്കാനാകും. യുക്രൈൻ അധീനതയിലായാൽ നാറ്റോ അംഗ രാജ്യങ്ങളായ പോളണ്ടിന്റെ കിഴക്കൻ അതിർത്തിയിലേക്കും സ്ലൊവാക്യ, ഹംഗറി, റൊമാനിയ രാജ്യങ്ങളുടെ വടക്കൻ അതിർത്തിയിലേക്കും റഷ്യക്ക് എളുപ്പത്തിൽ എത്താനാകും. അയൽരാജ്യമായ ബെലറൂസ് ഇപ്പോൾ തന്നെ റഷ്യൻ സഖ്യരാഷ്ട്രമാണ്. ഭൂമിശാസ്ത്രപരമായി റഷ്യയ്ക്ക് ലഭിക്കുന്ന ഈ മേധാവിത്വം എസ്റ്റോണിയ, ലാത്വിയ, ലിത്വാനിയ തുടങ്ങിയ ബാൾട്ടിക് രാഷ്ട്രങ്ങളും ഭീഷണിയാകും.