വെടിനിർത്തൽ പ്രാബല്യത്തിലായ ലബനാനിൽ സംഘർഷം അവസാനിക്കുന്നില്ല; താമസക്കാർക്ക് അതിർത്തികളിലേക്ക് മടങ്ങാൻ നിയന്ത്രണം വെച്ച് ഇസ്രായേൽ

ബെയ്റൂത്ത്: ലബനാനിൽ വെടിനിർത്തൽ പ്രാബല്യത്തിൽ വന്നെങ്കിലും അതിർത്തി പ്രദേശങ്ങളിലേക്ക്​ മടങ്ങാൻ താമസക്കാർക്ക്​ നിയന്ത്രണവുമായി ഇസ്രായേൽ രംഗത്ത്.

14 മാസങ്ങൾ നീണ്ട ആക്രമണത്തിന്​ വെടിനിർത്തലിലൂടെ താൽക്കാലിക പരിഹാരമായെങ്കിലും ഇസ്രായേൽ-ലബനാൻ സംഘർഷം അവസാനിക്കുന്നില്ല. 60 ദിവസത്തേക്കാണ്​ വെടിനിർത്തൽ. അതിർത്തി പ്രദേശങ്ങളിലേക്ക്​ മടങ്ങാൻ കുടുംബങ്ങളെ അനുവദിക്കാൻ സമയമായില്ലെന്ന്​ ഇസ്രായേൽ പ്രധാനമന്ത്രി നെതന്യാഹുവും പ്രതിരോധ മന്ത്രി ഇസ്രായേൽ കറ്റ്​സും ഉത്തരവിട്ടു​.

തെക്കൻ ലബനാനിൽ ഇസ്രായേൽ സേന നിലയുറപ്പിച്ച ഭാഗങ്ങളിൽ പ്രവേശിക്കരുതെന്നും ഒഴിഞ്ഞു​പോകാൻ ഉത്തര​വിട്ട ഭാഗങ്ങളിലേക്ക് പൗരന്മാർ മടങ്ങരുതെന്നുമാണ്​ നിർദേശം.

ലിറ്റാനി പുഴയുടെ വടക്കു​ഭാഗത്തുള്ള ഹിസ്ബുല്ല പോരാളികൾ പിൻവാങ്ങണമെന്നും ഉപാധിയുണ്ട്. ദക്ഷിണ ലബനാൻ അതിർത്തിയിൽ നിന്ന്​ ഏതാനും പേരെ ഇസ്രായേൽ പിടികൂടിയതും വെടിനിർത്തൽ കരാർ പ്രതീക്ഷകൾക്ക്​ തിരിച്ചടിയായി​. ഇസ്രായേലിന്‍റെ സൈനിക പിൻമാറ്റത്തിന്​ ദിവസങ്ങൾ വേണ്ടി വരുമെന്നാണ്​ സൂചന. ദക്ഷിണ ലബനാനിലെ അതിർത്തി സുരക്ഷ, ലബനാൻ സൈന്യവും യുഎൻ സമാധാന സേനയും ഏറ്റെടുക്കും.യുഎസ്​ പ്രതിനിധി ഹമോസ്​ ഹോച്​സ്റ്റിൻ ബെയ്​റൂത്തിൽ ക്യാമ്പ്​ ചെയ്ത്​ ഇരുപക്ഷവുമായി ആശയ വിനിമയം തുടരുകയാണ്​.

അതേസമയം ഫലസ്തീൻ പോരാളികൾക്കൊപ്പം ചേർന്ന്​ അധിനിവേശത്തിനെതിരായ പോരാട്ടം തുടരുമെന്ന്​ ഹിസ്​ബുല്ല നേതൃത്വം പ്രതികരിച്ചു. ലബനാന്‍റെ പരമാധികാരവും സ്വാതന്ത്ര്യവും ഉറപ്പാക്കാൻ ജാഗ്രതയോടെ നിലയുറപ്പിക്കുമെന്നും ഹിസ്​ബുല്ല അറിയിച്ചു.

അതിർത്തിയിൽ തുരങ്കം നിർമിക്കുകയോ റോക്കറ്റ് വർഷിക്കുകയോ ചെയ്താൽ ആക്രമണം പുനരാരംഭിക്കുമെന്ന് ഇസ്രായേൽ പ്രധാനമന്ത്രി നെതന്യാഹു പറഞ്ഞു. ഇസ്രായേലിന്​ 860 മില്യൻ ഡോളറിന്‍റെ ​ആയുധസഹായം അനുവദിക്കാൻ ബൈഡൻ ഭരണകൂടം യുഎസ്​ കോൺഗ്രസിൽ ആവശ്യപ്പെട്ടു. ലബനാൻ കരാറുമായി ഇതിന്​ ബന്ധ​മില്ലെന്നാണ്​​ പെന്‍റഗൺ നൽകുന്ന വിശദീകരണം.