ഗസ്സയില്‍ നിന്നുള്ള ദൃശ്യം
ഇസ്രായേല്‍ കൂട്ടക്കുരുതി; മരണം 9000 കടന്നു, 3760 പേരും കുട്ടികള്‍; കണക്കുകള്‍ പുറത്തുവിട്ട് ഗസ്സ
|2,326 സ്ത്രീകളും 2975 പുരുഷന്‍മാരും മരിച്ചവരില്‍ ഉള്‍പ്പെട്ടതായും വ്യാഴാഴ്ച പുറത്തുവിട്ട കണക്കില്‍ പറയുന്നു.
തെല്‍ അവിവ്: ഇസ്രായേല്‍ ആക്രമണത്തില്‍ ഗസ്സയില്‍ ഇതുവരെ 9061 പേര്‍ കൊല്ലപ്പെട്ടതായി ആരോഗ്യ മന്ത്രാലയം. ഇതില്‍ 3760 പേരും കുഞ്ഞുങ്ങളാണ്. 2,326 സ്ത്രീകളും 2975 പുരുഷന്‍മാരും മരിച്ചവരില്‍ ഉള്‍പ്പെട്ടതായും വ്യാഴാഴ്ച പുറത്തുവിട്ട കണക്കില്‍ പറയുന്നു.
32000 പേര്‍ക്ക് പരിക്കേറ്റതായി മന്ത്രാലയ വക്താവ് അഷ്‌റഫ് അൽ-ഖുദ്ര ഗാസ സിറ്റിയിൽ വാർത്താ സമ്മേളനത്തിൽ പറഞ്ഞു.ഗസ്സയിൽ 2060 പേർ ഇപ്പോഴും അവശിഷ്ടങ്ങൾക്കിടയിൽ കുടുങ്ങിക്കിടക്കുന്നുണ്ടെന്നും അദ്ദേഹം പറഞ്ഞു."ഇസ്രായേൽ ആക്രമണത്തിൽ 135 ഡോക്ടർമാർ കൊല്ലപ്പെടുകയും 25 ആംബുലൻസുകൾ നശിപ്പിക്കുകയും ചെയ്തു," അൽ-ഖുദ്ര കൂട്ടിച്ചേർത്തു. ഒക്ടോബര്‍ 7 മുതല്‍ ഇസ്രായേല്‍ സൈന്യം ഗസ്സയിലെ നൂറിലധികം ആരോഗ്യകേന്ദ്രങ്ങളാണ് തകര്‍ത്തത്. ഇസ്രായേൽ ആക്രമണവും ഇന്ധനക്ഷാമവും കാരണം 16 ആശുപത്രികളുടെയും 32 പ്രാഥമിക ശുശ്രൂഷാ കേന്ദ്രങ്ങളുടെയും പ്രവര്‍ത്തനം തകരാറിലായി.
ഇന്ധന ക്ഷാമത്തിനിടയിൽ ഒരു "ആരോഗ്യ ദുരന്തം" ഉണ്ടാകുമെന്ന് വക്താവ് മുന്നറിയിപ്പ് നൽകി. ഇത് വടക്കൻ ഗാസയിലെ ഇന്തോനേഷ്യൻ ഹോസ്പിറ്റലിലെ പ്രധാന ജനറേറ്റർ നിർത്താൻ നിർബന്ധിതരാക്കി. അതേസമയം ഗസ്സ സിറ്റിയിലെ അൽ-ഷിഫ ഹോസ്പിറ്റലിലെ പ്രധാന ജനറേറ്റർ നിർത്താൻ പോവുകയാണെന്നാണ് റിപ്പോര്‍ട്ട്.
അതേസമയം ഇസ്രായേലിന്‍റെ വ്യോമ, കര ആക്രമണങ്ങൾ തുടര്‍ന്നുകൊണ്ടിരിക്കുകയാണ്. 9,061 ഫലസ്തീനികളും 1,538-ലധികം ഇസ്രായേലികളും ഉൾപ്പെടെ 10,600 ഓളം പേരാണ് യുദ്ധത്തില്‍ ആകെ കൊല്ലപ്പെട്ടത്.