ഗസ്സയില്‍ മരണസംഖ്യ 1500 കടന്നു; ഇന്ന് ലോകമെമ്പാടും ഫലസ്തീൻ ഐക്യദാർഢ്യ ദിനാചരണം

തെല്‍ അവീവ്: ഈജിപ്തിലെ റഫ അതിർത്തി വഴി ഉപരോധത്തിലമർന്ന ഗസ്സയിലേക്ക്​ മാനുഷിക സഹായം എത്തിക്കാനുള്ള നീക്കം ഇസ്രായേൽ എതിർപ്പ്​ മൂലം വിജയം കണ്ടില്ല. ബന്ദികളുടെ മോചനം നടക്കാതെ ഗസ്സയിലേക്ക്​ സഹായം അനുവദിക്കില്ലെന്ന നിലപാടിലാണ്​ ഇസ്രായേൽ. വ്യോമാക്രമണം കൂടുതൽ കടുത്തതോടെ ഗസ്സയിൽ മരണസംഖ്യ 1537 ആയി ഉയർന്നു. ലോകമൊന്നാകെ ഇന്ന്​ ഫലസ്തീൻ ഐക്യദാർഢ്യ ദിനാചരണം നടക്കും.

അന്തർദേശീയ സമ്മർദം വകവെക്കാതെ ഗസ്സക്കു മേൽ ഉപരോധവും ആക്രമണവും കൂടുതൽ ശക്​തമായി തുടരുമെന്ന്​ ഇസ്രായേൽ പ്രധാനമന്ത്രി നെതന്യാഹു വ്യക്​തമാക്കി. ഒന്നുകിൽ വിജയം അതല്ലെങ്കിൽ മരണം എന്നതു മാത്രമാണ്​ ഇസ്രായേലിനു മു​മ്പാകെയുള്ള മാർഗമെന്ന്​ പാർലമെന്‍റില്‍ നടത്തിയ പ്രസംഗത്തിൽ നെതന്യാഹു പ്രതികരിച്ചു. ഹമാസിനെ പൂർണമായും ഇല്ലായ്​മ ചെയ്യും വരെ യുദ്ധം അതെത്ര കഠിനമായാലും തുടരുമെന്നും നെതന്യാഹു മുന്നറിയിപ്പ്​ നൽകി. യു.എസ്​ സ്​റ്റേറ്റ്​ സെക്രട്ടറി ആന്‍റണി ബ്ലിങ്കണുമായുള്ള ചർച്ചയിലും നെതന്യാഹു നിലപാട്​ ആവർത്തിച്ചു. ഇതോടെ​ ഈജിപ്തിന്‍റെ റഫ അതിർത്തി മുഖേനയുള്ള സഹായനീക്കവും സുരക്ഷിതപാത ഒരുക്കലും ​വഴിമുട്ടി. ഹമാസ്​ പിടിയിലുള്ള ബന്ദികളുടെ മോചനത്തിന്​ ഖത്തർ മധ്യസ്​ഥതയിൽ നടക്കുന്ന ചർച്ചയെ ആശ്രയിച്ചിരിക്കുകയാണ്​ ഇനി മറ്റു കാര്യങ്ങൾ.

ഗസ്സക്കുമേൽ ആക്രമണം വ്യാപകമായതോടെ ആരോഗ്യ മേഖല ഉൾപ്പെടെ എല്ലാം തകർച്ചയിലേക്ക്​ നീങ്ങുകയാണ്​. മരണസംഖ്യക്കൊപ്പം പരിക്കേറ്റവരുടെ എണ്ണവും ഗസ്സയിൽ ഉയർന്നു. 6612 പേർക്കാണ്​ പരിക്ക്​. പുതുതായി ആരെയും പ്രവേശിപ്പിക്കാൻ ഇടമില്ലാത്ത സാഹചര്യത്തിലാണ്​ ഗസ്സയിലെ ആശുപത്രികൾ. ഇന്നലെ രാത്രി നടന്ന വ്യോമാക്രമണത്തിൽ താമസ കേന്ദ്രങ്ങളിൽ ബോംബ്​ പതിച്ച്​ കുട്ടികളും സ്​ത്രീകളും ഉൾപ്പെടെ നിരവധി പേർ മരിച്ചു. കരയാക്രമണം ഉൾപ്പെടെ എല്ലാം നിശ്​ചിത സമയത്ത്​ നടക്കുമെന്ന്​ സൈന്യം അറിയിച്ചു. ലബനാൻ അതിർത്തി മേഖലയിലും സംഘർഷത്തിന്​ മാറ്റമില്ല. ഹിസ്​ബുല്ലയുടെ ആക്രമണത്തിൽ പരിക്കേറ്റ ഇസ്രായേൽ സൈനികൻ കൊല്ലപ്പെട്ടു.

ഇസ്രായേൽ പ്രവിശ്യകൾക്കു നേരെയുള്ള ഹമാസ്​ റോക്കറ്റാക്രമണം ഇന്ന്​ വെളുപ്പിനും തുടർന്നു. തെൽ അവീവിലും ഫൈഹയിലും സിദ്​റത്തിലും റോക്കറ്റുകൾ പതിച്ചു. സയണിസ്​റ്റ്​ രാഷ്​ട്രത്തിന്‍റെ ചെയ്​തികൾക്കെതിരെ പോരാടുന്ന ഫലസ്​തീൻ ജനതയോടുള്ള ഐക്യദാർഡ്യം തുടരുമെന്ന്​ ഇറാൻ വിദേശകാര്യ മന്ത്രി പറഞ്ഞു. ഫലസ്​തീൻ ഐക്യദാർഢ്യ ദിനാചരണം ഇന്ന്​ നടക്കാനിരിക്കെ, ലോകത്തി​ന്‍റെ പല ഭാഗങ്ങളിലും ലക്ഷങ്ങൾ തെരുവിലിറങ്ങും.