ഗസ്സയില്‍ കൊല്ലപ്പെട്ട കുഞ്ഞുങ്ങളുടെ പേരുകളുമായി ഇറങ്ങി തെഹ്റാന് ടൈംസ്
ഗസ്സയിലെ മാലാഖമാര്‍; ഇസ്രായേല്‍ കൂട്ടക്കുരുതിയില്‍ കൊല്ലപ്പെട്ട കുഞ്ഞുങ്ങളുടെ പേരുകളുമായി തെഹ്റാന് ടൈംസ്
|ഗസ്സയില്‍ പൊലിഞ്ഞ പിഞ്ചുകുഞ്ഞുങ്ങള്‍ ലോകത്തിന് തീരാവേദനയായിരിക്കുകയാണ്
തെഹ്റാന്: ഗസ്സയില്‍ ഇസ്രായേലിന്‍റെ ആക്രമണം തുടരുകയാണ്...ഗസ്സ കുരുതിക്കളമായി മാറിയിരിക്കുന്നു. ഇസ്രായേല്‍ ഭീകരതയില്‍ കൊല്ലപ്പെട്ട കുഞ്ഞുങ്ങളുടെ നിഷ്ക്കളങ്കമുഖം ലോകമനസാക്ഷിയെ കീറിമുറിക്കുകയാണ്. 3500ലധികം കുഞ്ഞുങ്ങളുള്‍പ്പെടെ എണ്ണായിത്തിരത്തിലധികം പേരെ കൊന്നൊടുക്കിയിട്ടും കര,വ്യോമ,നാവികാക്രമണം കൂടുതല്‍ ശക്തമാക്കിയിരിക്കുകയാണ് ഇസ്രായേല്‍. എത്ര സമയമെടുത്താലും ഹമാസിനെ അമർച്ച ചെയ്യാതെ യുദ്ധത്തിൽ പിറകോട്ടില്ലെന്ന നിലപാടിലാണ് പ്രധാനമന്ത്രി ബെഞ്ചമിന്‍ നെതന്യാഹു.
ഗസ്സയില്‍ പൊലിഞ്ഞ പിഞ്ചുകുഞ്ഞുങ്ങള്‍ ലോകത്തിന് തീരാവേദനയായിരിക്കുകയാണ്. ഇതുവരെ 3547 കുഞ്ഞുങ്ങളാണ് യുദ്ധത്തിന് ഇരയായതെന്നാണ് റിപ്പോര്‍ട്ട്. കൊല്ലപ്പെട്ട കുഞ്ഞുങ്ങളുടെ പേരുകളുമായി ഇറങ്ങിയ ഇറാനില്‍ നിന്നും പ്രസിദ്ധീകരിക്കുന്ന തെഹ്റാന് ടൈംസ് എന്ന ദിനപത്രം നെഞ്ചിടിപ്പോടെയല്ലാതെ കാണാനാവില്ല. ഏഞ്ചല്‍സ് ഓഫ് ഗസ്സ(ഗസ്സയിലെ മാലാഖമാര്‍) എന്ന തലക്കെട്ടോടെയാണ് വിടരും മുന്‍പെ കൊഴിഞ്ഞുപോയ ആ കുഞ്ഞുങ്ങളുടെ പേരുകള്‍ പ്രസിദ്ധീകരിച്ചിരിക്കുന്നത്. ഗസ്സയിലെ കുട്ടികള്‍ കൂടുതൽ ഭയാനകമായ യാഥാർത്ഥ്യത്തെ അഭിമുഖീകരിച്ചുകൊണ്ടിരിക്കുകയാണെന്നും അത് ദൈനംദിന ജീവിതത്തെ ഒരു പേടിസ്വപ്നമാക്കി മാറ്റിയെന്നും തെഹ്റാന് ടൈംസില്‍ പ്രസിദ്ധീകരിച്ച ലേഖനത്തില്‍ പറയുന്നു.
ഭക്ഷണം, വെള്ളം, ഇന്ധനം,ശുചീകരണം എന്നിവയുള്‍പ്പെടെയുള്ള അത്യാവശ്യ ഘടകങ്ങളുടെ അഭാവവും നിരന്തരമായ ബോംബാക്രമണവും അവരുടെ പ്രദേശത്തെ യുദ്ധക്കളമാക്കി മാറ്റി. നിരപരാധികളായ കുട്ടികള്‍ ഉള്‍പ്പെടെ കൊല്ലപ്പെട്ടവരുടെ എണ്ണം 8000 കവിഞ്ഞു. സാധാരണക്കാരെ ക്രൂരമായി കൊലപ്പെടുത്തിയതിനെ മനുഷ്യത്വരഹിതമാക്കാനും ന്യായീകരിക്കാനും ഇസ്രായേൽ വിപുലമായ ഒരു മാധ്യമ പ്രചാരണം ആരംഭിച്ചതായും ലേഖനം കുറ്റപ്പെടുത്തുന്നു. ലോകം കണ്ടുകൊണ്ടിരിക്കുമ്പോള്‍ ആശുപത്രികള്‍, ക്രിസ്ത്യന്‍ ദേവാലയങ്ങള്‍,മുസ്‍ലിം പള്ളികള്‍, സ്കൂളുകള്‍, മറ്റ് അഭയകേന്ദ്രങ്ങള്‍ എന്നിവയെ ബോധപൂര്‍വം ലക്ഷ്യമിടുന്നു. ഒരു ആക്രമണം ഉണ്ടായാല്‍ തങ്ങളുടെ കുഞ്ഞുങ്ങളുടെ തിരിച്ചറിയാനായി അവരുടെ പേരുകള്‍ ശരീരത്തില്‍ എഴുതുന്ന നെഞ്ചുലക്കുന്ന കാഴ്ചക്കും ഗസ്സ സാക്ഷ്യം വഹിക്കുന്നു. അറബ് രാഷ്ട്രങ്ങൾ ഈ ദുരവസ്ഥയോട് പ്രതികരിക്കുന്നില്ലെന്ന് തോന്നുന്നു, അതേസമയം പാശ്ചാത്യ രാജ്യങ്ങൾ ഭയാനകമായ നിശ്ചയദാർഢ്യത്തോടെ, ഇസ്രായേൽ ഭരണകൂടം ചെയ്ത ഭയാനകമായ കുറ്റകൃത്യങ്ങളെ പിന്തുണയ്ക്കുന്നത് തുടരുന്നു.
ഗസ്സയിലെ കുഞ്ഞുങ്ങള്‍ അതിജീവനത്തിനായുള്ള പോരാട്ടത്തിലാണ്. അവരുടെ വേദനാജനകമായ ചിത്രങ്ങൾ സോഷ്യൽ മീഡിയയിൽ പങ്കുവെക്കുന്നതിനു പുറമേ, അവരുടെ ആസന്നമായ ദുരവസ്ഥയെ മറ്റെല്ലാവരും, പ്രത്യേകിച്ച് പാശ്ചാത്യ മുഖ്യധാരാ മാധ്യമങ്ങൾ അവഗണിക്കുന്നതായി തോന്നുന്നു.മനുഷ്യാവകാശങ്ങളുടെ സ്വയം പ്രഖ്യാപിത തലതൊട്ടപ്പന്‍മാരായ പ്രമുഖ അമേരിക്കൻ മാധ്യമങ്ങൾ പോലും കഴിഞ്ഞ 24 ദിവസങ്ങളിൽ ഫലസ്തീൻ കുട്ടികൾ അനുഭവിച്ച ദുരിതങ്ങളെക്കാൾ ഇസ്രായേലിന്‍റെ വിഡ്ഢിത്തങ്ങൾ സംപ്രേഷണം ചെയ്യാൻ ഇഷ്ടപ്പെടുന്നു.
സേവ് ദ ചിൽഡ്രൻ എന്ന സർക്കാരിതര സംഘടനയുടെ കണക്കനുസരിച്ച്, കഴിഞ്ഞ നാല് വർഷങ്ങളിൽ ലോകത്ത് കൊല്ലപ്പെട്ടതിനെക്കാൾ കൂടുതൽ ഫലസ്തീൻ കുട്ടികളാണ് കഴിഞ്ഞ മൂന്നാഴ്ചയ്ക്കിടെ ഗസ്സയിൽ കൊല്ലപ്പെട്ടത്.“ഗസ്സയിൽ കേവലം മൂന്നാഴ്‌ചയ്‌ക്കുള്ളിൽ കൊല്ലപ്പെട്ട കുട്ടികളുടെ എണ്ണം ആഗോളതലത്തിൽ- 20ലധികം രാജ്യങ്ങളിലായി- കഴിഞ്ഞ മൂന്ന് വർഷത്തിനിടെ ഒരു വർഷം മുഴുവൻ സായുധ സംഘട്ടനത്തിൽ കൊല്ലപ്പെട്ടതിനെക്കാൾ കൂടുതലാണ്,” എന്‍ജിഒ റിപ്പോര്‍ട്ടില്‍ പറയുന്നു. ഇസ്രായേൽ നടത്തുന്ന കര ആക്രമണം ഫലസ്തീൻ കുട്ടികൾക്ക് കൂടുതൽ ദുരിതം സമ്മാനിക്കുമെന്ന് ഞായറാഴ്ച മുന്നറിയിപ്പ് നൽകി.
ഫലസ്തീന്‍ കഴിഞ്ഞ ആഴ്ച പുറത്തുവിട്ട കണക്കില്‍ അമേരിക്കന്‍ പ്രസിഡന്‍റ് ജോ ബൈഡന്‍ സംശയം പ്രകടിപ്പിച്ചിരുന്നു. ബൈഡന്‍റെ പരാമർശങ്ങൾക്ക് മറുപടിയായി, ഗസ്സയിലെ പലസ്തീൻ ആരോഗ്യ മന്ത്രാലയം ഒക്ടോബർ 7 മുതൽ കൊല്ലപ്പെട്ട ഫലസ്തീനികളുടെ പട്ടിക പുറത്തിറക്കിയിരുന്നു. കൊല്ലപ്പെട്ടവരുടെ പേരിനൊപ്പം സര്‍ക്കാര്‍ തിരിച്ചറിയല്‍ നമ്പറും ചേര്‍ത്തിരുന്നു. 150-ലധികം പേജുകളുള്ള പട്ടികയിൽ ഒക്ടോബർ 26 വരെ 7000-ത്തിലധികം ഫലസ്തീനികൾ കൊല്ലപ്പെട്ടതായി കാണിക്കുന്നു. മരിച്ചവരിൽ 3,000-ത്തോളം കുട്ടികളാണ്.ഫലസ്തീൻകാരെയും അവരുടെ പോരാട്ടത്തെയും പാർശ്വവത്കരിക്കാൻ യുഎസ് പ്രേരിപ്പിക്കുമ്പോൾ, കഴിഞ്ഞ മൂന്നാഴ്ചയ്ക്കിടെ ഇസ്രായേൽ ഭരണകൂടം കൂട്ടക്കൊല ചെയ്ത 1,000 ഫലസ്തീൻ കുട്ടികളെ സ്മരിക്കാന്‍ തെഹ്റാന് ടൈംസ് തീരുമാനിക്കുകയായിരുന്നു. ഹൃദയഭേദകമായ ഇത്തരം ദുരന്തങ്ങൾ അവസാനിക്കുമെന്നും പലസ്തീൻ കുട്ടികളുടെ ജീവിക്കാനുള്ള അവകാശം ഇസ്രായേൽ ഭരണകൂടവും പാശ്ചാത്യ രാജ്യങ്ങളും മാനിക്കുമെന്നും ഞങ്ങൾ പ്രതീക്ഷിക്കുന്നു...ലേഖനത്തില്‍ പറയുന്നു.